سەناتتىڭ قارجى جانە بيۋدجەت كوميتەتىنىڭ دەپۋتاتتارى ۋاكىلەتتى مەملەكەتتىك ورگاندارمەن بىرگە «بيۋدجەتارالىق قاتىناستاردى جاڭا تاسىلدەردى ەسكەرە وتىرىپ قالىپتاستىرۋ» تاقىرىبىندا دوڭگەلەك ۇستەل وتكىزدى.
قارجى جانە بيۋدجەت كوميتەتىنىڭ توراعاسى سۇلتانبەك ماكەجانوۆ وڭىرارالىق ديسپروپورتسيالار قازىرگى كەزدەگى ماڭىزدى جانە باستى ماسەلەلەردىڭ ءبىرى بولىپ تابىلاتىنىن ايتا كەلىپ, مەملەكەت باسشىسى زاڭنامالىق دەڭگەيدە بيۋدجەتارالىق قاتىناستاردى تەڭەستىرۋ ءۇشىن تۇبەگەيلى رەفورمالاۋدى تاپسىرعانىن اتاپ ءوتتى.
– بىزگە مەملەكەت باسشىسىنىڭ تاپسىرماسىن ىسكە اسىرۋ تۋرالى اۋقىمدى مىندەت قويىلىپ وتىر. بۇل – ەڭ الدىمەن, بيۋدجەتارالىق قاتىناستارىمىزدىڭ حالقىمىز ءۇشىن كەپىلدىك بەرەتىن مەملەكەتتىك قىزمەتتەردىڭ قاجەتتىلىكتەرىنە شىن مانىندە جاۋاپ بەرۋى جانە بۇگىنگى تاڭداعى وڭىرلەردى دامىتۋداعى ديسپروپورتسيالاردى بارىنشا ازايتۋ, – دەدى سۇلتانبەك ماكەجانوۆ.
ۇلتتىق ەكونوميكا ۆيتسە-ءمينيسترى ازامات ءامرين سەناتورلارعا وڭىرلەردىڭ كىرىس بازاسىن كەڭەيتۋ جونىندە جۇرگىزىلگەن جۇمىستار تۋرالى ايتىپ بەردى. وسىلايشا, 2023 جىلدان باستاپ جەرگىلىكتى بيۋدجەتتەرگە سالىق تۇسىمدەرىنىڭ قوسىمشا تۇرلەرى تاپسىرىلدى. بۇل – 2025 جىلعا قاراي وڭىرلەردىڭ كىرىستەرىنىڭ ءوسىمىن 47 پايىزعا ارتتىرۋعا مۇمكىندىك بەرەدى.
جوعارى اۋديتورلىق پالاتانىڭ مۇشەسى يۋليا ەنگەل بايانداماسىندا سالانىڭ نەگىزگى ماسەلەلەرى: جەرگىلىكتى اتقارۋشى ورگانداردىڭ رەسپۋبليكالىق بيۋدجەتتەن سۋبۆەنتسيالاردى پايدالانۋىنا مونيتورينگ جانە باقىلاۋ تەتىگىنىڭ بولماۋى, بيۋدجەتارالىق ترانسفەرتتەردى ءبولۋ تەتىگىنىڭ اشىقتىعى جانە باسقا دا ماسەلەلەر تۋرالى ايتتى. ول وسىعان بايلانىستى جالپى سيپاتتاعى ترانسفەرتتەردى ەسەپتەۋ فۋنكتسيالارىن اۆتوماتتاندىرۋدى ۇسىندى. بۇل – باستاپقى دەرەكتەردى, كورسەتكىشتەر مەن كوەففيتسيەنتتەردى پايدالانۋعا اسەر ەتەتىن «ادام فاكتورىن» ازايتۋعا مۇمكىندىك بەرەدى.
سونىمەن قاتار ەنەرگەتيكا ۆيتسە-ءمينيسترى جاندوس نۇرماعامبەتوۆ, سولتۇستىك قازاقستان وبلىسى اكىمىنىڭ ءبىرىنشى ورىنباسارى مارات تاسماعانبەتوۆ جانە يندۋستريا جانە ينفراقۇرىلىمدىق دامۋ مينيسترلىگىنىڭ وكىلى بايانداما جاسادى.
سەناتور سۇلتانبەك ماكەجانوۆ دوڭگەلەك ۇستەل جۇمىسىن قورىتىندىلاي كەلىپ, بيۋدجەتارالىق قاتىناستاردى جەتىلدىرۋ جونىندەگى جۇمىستىڭ جالعاساتىنىن ايتتى. سونىمەن قاتار كەزدەسۋ بارىسىندا بىرقاتار ۇسىنىس بەرىلگەنىن جانە ولاردىڭ كەيىن جاڭا بيۋدجەت كودەكسىن ازىرلەۋ جونىندەگى جۇمىستار اياسىندا ازىرلەنەتىنىن جانە كورىنىس تاباتىنىن اتاپ ءوتتى.