ەلىمىزدە شاعىن بيزنەستى تەكسەرۋ جونىندەگى موراتوري 2024 جىلعا دەيىن ۇزارعانىنا قاراماستان, كاسىپكەرلەر قاۋىمى مەملەكەتتىك قۇرىلىمدار تاراپىنان زاڭسىز تەكسەرۋ جۇرگىزۋ فاكتىلەرى ازايماعانىن العا تارتادى. بۇل تۋرالى الماتى قالاسى پروكۋراتۋراسى مەن وڭىرلىك كاسىپكەرلەر پالاتاسىنىڭ بيزنەستى قورعاۋ ماسەلەلەرى جونىندەگى كەزدەسۋىندە ايتىلدى.
وتكەن جىلدىڭ وزىندە كاسىپكەرلەر تاراپىنان بيزنەستى قورعاۋ جەلىسى بويىنشا 462 ءوتىنىش تۇسكەن. بيزنەس وكىلدەرىنىڭ تالاپ-تىلەكتەرىن سارالاعان كاسىپكەرلەر پالاتاسى بيزنەسكە توسقاۋىل بولعان مۇنداي كەلەڭسىز ىستەردىڭ ىشىندە سالىقتىق جانە كەدەندىك اكىمشىلەندىرۋ جۇيەسىنە قاتىستى – 11, جەر ماسەلەلەرى بويىنشا – 24, مەملەكەتتىك ورگانداردىڭ ارەكەتىنە بايلانىستى 36 شاعىم تۇسكەنىن ايتادى.
«بىلتىر قالا پروكۋراتۋراسىمەن بىرلەسىپ, كاسىپكەرلىك سۋبەكتىلەرىن قىلمىستىق قۋدالاۋ اياسىنا نەگىزسىز تارتۋدى انىقتاۋ بويىنشا ءبىراز جۇمىس اتقارىلدى. اسىرەسە قۇقىق قورعاۋ ورگاندارىنىڭ قىزمەتىنە قىلمىستىق قۋدالاۋ جەلىسى بويىنشا تەكسەرىس كەزىندە, كاسىپكەرلىككە زاڭسىز ارالاسۋ جاعدايلارى نازارعا ءىلىندى. ناتيجەسىندە قالا پروكۋراتۋراسى 21 قىلمىستىق ءىستى ءوز بەتىنشە توقتاتتى, 51 ءىستى ەسكەرتۋدەن كەيىن تەرگەۋ ورگاندارىنىڭ ءوزى توقتاتۋىنا تۋرا كەلدى. سەبەبى بۇل قىلمىستىق ىستەر زاڭسىز تەرگەلگەن ءارى كاسىپكەرلەردىڭ قۇقى ورەسكەل بۇزىلعان. اتالعان جۇمىستار تۇراقتى نەگىزدە جۇرگىزىلەتىن بولادى», دەدى الماتى قالاسى كاسىپكەرلەر پالاتاسىنىڭ بيزنەستى قورعاۋ جونىندەگى ساراپشىسى تيمۋر زەينەشەۆ.
بۇدان بىلاي مۇنداي كەلەڭسىزدىكتەردىڭ جولىن كەسۋمەن قۇرامىنا پروكۋراتۋرا وكىلدەرى كىرەتىن كاسىپكەرلەردىڭ قۇقىعىن قورعاۋ جونىندەگى ءموبيلدى توپ اينالىسادى. ءموبيلدى جۇمىس توبى ىسكەر ازاماتتاردىڭ قۇقىن قورعاۋعا ارنالعان «QR كود» جوباسىن تانىستىردى. ەندىگى جەردە زاڭسىز تەكسەرۋگە تاپ بولعان كاسىپكەر QR-دى سكانەرلەۋ ارقىلى ارنايى سايتتا شاعىم قالدىرىپ, جاعدايعا بايلانىستى فوتو, بەينەتۇسىرىلىم تۇرىندەگى دالەلدەرىن جۇكتەي الادى. تسيفرلى تەحنولوگيانىڭ ارقاسىندا جولدانعان شاعىم ءتيىستى ورگانعا ءاپ-ساتتە تۇسەدى. شاعىم يەسىمەن پروكۋراتۋرا جانە كاسىپكەرلەر پالاتاسىنىڭ وكىلدەرى جارتى ساعاتتىڭ ىشىندە كەرى بايلانىس ورناتۋعا ءتيىس. ەگەر شاعىم راستالسا, ماسەلە ءموبيلدى توپتىڭ قۇزىرىنا وتەدى.
جوبانى تانىستىرعان مەدەۋ اۋدانى پروكۋرورىنىڭ ورىنباسارى باۋىرجان تولەندينوۆ, پروكۋراتۋرا كاسىپكەرلىك نىسانداردىڭ بارىنە QR-كود ورنالاستىرۋدى جوسپارلاپ وتىرعانىن جەتكىزدى. وسىلايشا, شاھارداعى دۇكەندەر مەن بازارلاردا, ءدارىحانالار مەن سۇلۋلىق سالوندارىندا, ءتىپتى فيتنەس ورتالىقتارى مەن كاسىپكەرلىك كەڭسەلەردە QR-كود ورناتىلماق. كاسىپكەرلەردەن تۇسكەن بارلىق سيگنال قالا پروكۋراتۋراسىنىڭ دەرەكقورىندا ساقتالىپ, اۋداندار بويىنشا توپتاستىرىلادى. وسىلايشا, بۇل اقپارات پروكۋراتۋرا مەن كاسىپكەرلەر پالاتاسىنا دابىلداردى تالداۋعا جانە قالانىڭ جۇيەلىك پروبلەمالارىنىڭ ءتىزىلىمىن قالىپتاستىرۋعا سەپ بولماق.
الماتى