پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە رەسپۋبليكالىق ماڭىزى بار اۆتوجولدار جەلىسىن ودان ءارى دامىتۋ جوسپارلارى تالقىلاندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ ايتۋىنشا, ەل اۋماعىندا جالپى ۇزىندىعى 13 مىڭ شاقىرىمعا جۋىق 8 اۆتوموبيل ترانزيتتىك ءدالىزى بار.
قازىرگى ۋاقىتتا «الماتى – تالدىقورعان – وسكەمەن – شەمونايحا – رف شەكاراسى» (768 كم), «اقتوبە – اتىراۋ – رف شەكاراسى» (746 كم), «مايقاپشاعاي – قالباتاۋ – سەمەي – پاۆلودار – رف شەكاراسى» (415 كم) جانە «الماتى – استانا – پەتروپاۆل – رف شەكاراسى» (31 كم) تراسسالارىندا جوندەۋ جۇمىستارى ءجۇرىپ جاتىر.
2030 جىلعا دەيىن «باتىس ەۋروپا – باتىس قىتاي» (1 363 كم) جانە «استانا – قوستاناي – رف شەكاراسى» (830 كم) دالىزدەرى مەن «اتىراۋ – ورال – رف شەكاراسى» (587 كم) تراسسالارىن ءى تەحنيكالىق ساناتقا سايكەستەندىرىپ جاڭارتۋ جوسپارلانىپ وتىر.
پرەمەر-مينيستر بۇل جۇمىستى كورشىلەس ەلدەردىڭ ۋاكىلەتتى مەملەكەتتىك ورگاندارىمەن ۇيلەستىرە وتىرىپ, رەسەي مەن قىتايعا قاراي لوگيستيكالىق باعىتتاردى جانە ترانسكاسپي حالىقارالىق كولىك باعىتىن دامىتۋدى جانداندىرۋ قاجەتتىگىن اتاپ ءوتتى.
ۇكىمەت باسشىسىنىڭ ايتۋىنشا, اتالعان ءتاسىل مەملەكەتتەر اراسىنداعى اۆتوجولداردىڭ تۇيىسكەن جەرىندەگى «تار جولداردى» تەزىرەك جويۋعا جانە سونىڭ ارقاسىندا جۇك اينالىمىن ەداۋىر ارتتىرۋعا مۇمكىندىك بەرەدى.
«حالىقارالىق اۆتوموبيل جانە باسقا دا لوگيستيكالىق دالىزدەردىڭ وتكىزۋ قابىلەتىن ارتتىرۋ قاجەت. جالپى وسى جۇمىسقا سەرپىن بەرۋ كەرەك. سونىمەن قاتار وتكىزۋ بەكەتتەرىن جاڭارتۋعا دا نازار اۋدارۋ قاجەت», دەدى ءاليحان سمايىلوۆ.
كەڭەس قورىتىندىسى بويىنشا قر يدم-گە ناقتى تاپسىرمالار بەرىلدى.