كارىم بەكەنوۆتىڭ ەسىمى قازاق بەينەلەۋ ونەرىنىڭ گرافيكا سالاسىندا ەرەك اتالادى. شىعارماشىلىق ءومىرى حالىق اڭىز ەرتەگىلەرى مەن ەپوستىق جىرلاردان باستاۋ العان گرافيك-سۋرەتشىنى ەسكە الۋعا ارنالعان كورمە ءا. قاستەەۆ اتىنداعى ونەر مۋزەيىندە ەسىك اشتى.
سۋرەتشى بەلگىلى ءبىر ماتىندەگى كەيىپكەرلەردى بەينەلەۋدە ۋاقيعالاردى كوزبەن كورگەندەي وقىرماندى تاپ سول الەمگە ەنگىزىپ جىبەرەدى. ول قازاق رۋحانياتىنىڭ قازىناسىنا ەنگەن «قوبىلاندى باتىر», «قىز-جىبەك», «تازشا بالا», «الداركوسە», «مىڭ ءبىر ءتۇن», «الەم حالىقتارىنىڭ ەرتەگىلەرى» سىندى تانىمال شىعارمالاردى, سونداي-اق بەيىمبەت ءمايليننىڭ «راۋشان – كوممۋنيست», ساكەن سەيفۋلليننىڭ «تار جول, تايعاق كەشۋ», ءسابيت مۇقانوۆتىڭ «بوتاگوز», قۇرمانباي تولىباەۆتىڭ ء«دان», شىڭعىس ايتماتوۆتىڭ «ماڭگۇرت», ءابىش كەكىلباەۆتىڭ ء«بىر شوكىم بۇلت», «شىڭىراۋ» تۋىندىلارىنىڭ يلليۋستراتسيالىق پاراقشالارىن جاساپ, بەزەندىردى.
ونەرتانۋشى گۇلنار جۇبانيازوۆانىڭ ايتۋىنشا, تانىمال ماتىندەردىڭ يلليۋستراتسياسى ونىڭ قولتاڭباسىندا قۇلپىرا تۇسەدى. تۇلعالىق قاسيەت پەن مىنەز ىرعاقتى سىزىقتارمەن كوركەمدەلەدى. سۋرەتشىنىڭ تاقىرىپقا قاراي ىزدەنىستەرى ەستەتيكالىق, پسيحولوگيالىق كۇيدى سەزدىرە, ونداعى ادامگەرشىلىك پەن تاربيەلىك ءماندى تانۋعا مۇمكىندىك بەرەدى. سونداي-اق ونىڭ گرافيكالىق كومپوزيتسيالارى ەرەكشە ءبىر كوركەمدىك پەن كونتراستىق ۇيلەسىمدىلىكتە شەشىلگەن.
كىتاپ كوركەمدەۋدەگى سۋرەتشىنىڭ كاسىبي شەبەرلىك تۇلعاسىن, ىشكى جان دۇنيەسىن, رۋحاني بولمىسىن ءاربىر جاساعان يلليۋستراتسيالىق كومپوزيتسياسىنان تانۋعا بولادى. ويتكەنى بەلگىلى ءبىر تاقىرىپتىڭ استارىنا بەينەلىك كومپوزيتسيا ارقىلى تەرەڭ تۇسىنىك بەرەتىن ءاربىر ىرعاقتى سىزىقتارى تاريحتىڭ وتكەن سارىنىن, ونداعى شىندىقتاردى ايقىنداعان.
ونەر يەسى حالقىمىزدىڭ جىر-داستاندارىن, بەلگىلى اقىن-جازۋشىلارىمىزدىڭ قۇندى ەڭبەكتەرىندەگى عاجايىپ ورتانى, ونداعى سيۋجەتتەردى جان دۇنيەسىمەن زەردەلەگەن. ونىڭ تۋىندىلارىندا قانشاما كەيىپكەر تاريحي وبرازعا اينالدى.
سۋرەتشىلەر وداعىنىڭ مۇشەسى, جۋرناليستەر وداعىنىڭ مۇشەسى, پوليگرافياعا ەڭبەگى سىڭگەن قايراتكەر, ۆتسسپس باسپاسىنىڭ ۇزدىگى, باسپالاردا جاريالانعان «كىتاپ ونەرى» حالىقارالىق جانە رەسپۋبليكالىق بىرنەشە بايقاۋدىڭ جەڭىمپازى – كارىم بەكەنوۆ 1938 جىلى 10 قازاندا اقمولا وبلىسى, شورتاندى اۋدانى, كليۋچي اۋىلىندا دۇنيەگە كەلدى. 1965 جىلى ن.ۆ.گوگول اتىنداعى الماتى كوركەمسۋرەت ۋچيليششەسىن ءبىتىرىپ, 1967-1968 جىلدارى «تسەلينوگراد حپم» سۋرەتشى كوركەمدەۋشى قىزمەتىن اتقاردى. 1973 جىلى ماسكەۋ پوليگرافيا ينستيتۋتىن ءتامامدادى. 1965-1997 جىلدارى ول ماماندىعى بويىنشا «مەكتەپ», «جەتى قارا», №1 باسپاحانا باسپاسىندا كوركەمدەۋشى رەداكتور, اعا تەحنيكالىق رەداكتور, باس سۋرەتشى, كوركەمسۋرەت ءبولىمىنىڭ مەڭگەرۋشىسى, 2007-2011 جىلدارى تەمىربەك جۇرگەنوۆ اتىنداعى قازۇوا-نىڭ «گرافيكالىق ديزاين» كافەدراسىنىڭ اعا وقىتۋشىسى بولىپ ەڭبەك ەتتى.
الماتى