جاقىندا سيريادا جەر سىلكىنىسى كەزىندە ءۇيىندى استىنان جاڭا تۋعان ءسابي قۇتقارىلعان بولاتىن. وتباسىنان تۇگەل ايىرىلعان نارەستەنى جاقىن تۋىستارى اسىراپ الدى, دەپ حابارلايدى Egemen.kz.
قۇلاعان عيماراتتاردىڭ ءۇيىندىسى استىندا دۇنيەگە كەلگەن بالانى تاتەسى مەن اعاسى اسىراپ الدى.
قۇتقارۋشىلاردىڭ بالانى الىپ شىققان ءساتى جەلىدە تەز تاراپ, مىڭداعان ادام ونى اسىراپ العىسى كەلەتىنىن ايتقان. بىراق دارىگەرلەر ايا تەك تۋىستارىنا بەرىلەدى دەگەن ەدى. دنق ساراپتاماسى ناتيجەسىندە اسىراپ العىسى كەلەتىن ايەلدىڭ تۋىسى ەكەنى راستالىپ, نارەستەنى اۋرۋحانادان الىپ كەتتى. دارىگەرلەر ونىڭ دەنساۋلىعى جاقسى ەكەنىن ايتتى.
«اتا-اناسىنىڭ, باۋىرلارىنىڭ ارتىندا قالعان جالعىز كوز وسى ايا عانا. ول ەندى مەنىڭ بالالارىمنىڭ ءبىرى. ونى ەشقايسىسىنان بولە جارمايمىن. ول ەرەكشە بالا», دەدى اسىراپ العان ايەلدىڭ كۇيەۋى حاليل ءال-ساۆادي.