پرەزيدەنت جانىنداعى ورتالىق كوممۋنيكاتسيالار قىزمەتىندە ءداستۇرلى بريفينگ ءوتتى. باسقوسۋدىڭ بۇل جولعى قوناعى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى قوزى-كورپەش جاڭبىرشين بولدى. بۇل ونىڭ جاڭا قىزمەتكە تاعايىندالعالى بەرى جۋرناليستەرمەن العاشقى كەزدەسۋى بولىپ وتىر.
«بۇگىن پارلامەنت پالاتالارىنىڭ بىرلەسكەن وتىرىسىندا ۇكىمەت پەن ەسەپ كوميتەتىنىڭ 2013 جىلعا ارنالعان رەسپۋبليكالىق بيۋدجەتتىڭ ورىندالۋ تۋرالى ەسەپتەرى بەكىتىلدى. ەسەپتەر پارلامەنت پالاتالارىنىڭ بىرلەسكەن وتىرىسىندا, ولاردىڭ كوميتەتتەرى مەن جۇمىس توپتارىندا جان-جاقتى قارالدى», دەدى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ق.جاڭبىرشين.
توراعا ءوز سوزىندە 2013 جىلى ەسەپ كوميتەتى 26 باقىلاۋ شاراسىن جۇزەگە اسىرعانىن دا اتاپ ءوتتى. سونداي-اق, ول ەسەپ كوميتەتى ۇكىمەتكە, ورتالىق مەملەكەتتىك جانە جەرگىلىكتى اتقارۋ ورگاندارىنا, سونداي-اق, كۆازيمەملەكەتتىك سەكتور سۋبەكتىلەرىنە 68 ۇسىنىم مەن 309 تاپسىرما جولداپ, ولار تيىسىنشە 98 جانە 80 پايىزعا ورىندالعانىن دا نازاردان تىس قالدىرمادى.
«ەسەپ كوميتەتىنىڭ بيۋدجەتتىڭ ەسەپتى مەرزىم ىشىندەگى ورىندالۋى تۋرالى قورىتىندىلارى دەپۋتاتتاردىڭ باعالاۋلارىمەن سايكەس كەلىپ, ۇكىمەت ونى سىندارلى تۇردە قابىلداعان.
«ۇكىمەت بيۋدجەتتى ورىنداۋ بارىسىندا وتە مول جۇمىس اتقاردى. رەسپۋبليكالىق بيۋدجەتتى ورىنداۋدى باقىلاۋدىڭ جانە 2013 جىلعا ارنالعان باقىلاۋ-تالداۋ شارالارىنىڭ قورىتىندىلارى نەگىزىندە ءبىز ۇكىمەتكە ۇسىنىم ازىرلەدىك. ول سالىقتىق جانە كەدەندىك اكىمشىلىكتىڭ ساپاسىن جاقسارتۋعا, باعدارلامالىق قۇجاتتاردى, ينۆەستيتسيالىق جوبالاردى جۇزەگە اسىرۋدىڭ تيىمدىلىگىن ارتتىرۋعا باعىتتالعان», دەدى ول. سونىمەن قاتار, بيۋدجەتتى جوسپارلاۋ ءۇردىسىن, ترانسفەرتتەردى ەسەپتەۋ مەن جەرگىلىكتى بيۋدجەتتەرگە تۇسەتىن ءتۇسىمدى بولجاۋدى, اكتسيونەرلىك قوعامداردىڭ جارعىلىق كاپيتالىن مەملەكەتتىڭ قاتىسۋىمەن تولىقتىرۋدى جەتىلدىرۋ جولدارى ۇسىنىلعان.
ءابدىراحمان قىدىربەك,
«ەگەمەن قازاقستان».