قاريالارعا قۇرمەت كورسەتىپ, كوڭىلىن اۋلاپ, ريزاشىلىعىنا بولەنۋ – ىزگى قوعامنىڭ ءبىر قۇندىلىعى. بۇل رەتتە زەينەت جاسىنداعى قارت كىسىلەرگە مەملەكەت تاراپىنان كورسەتىلەتىن قولداۋدىڭ ءتۇرى كوپ. وسى باعىتتاعى ءىس-شارالار جونىندە استانا قالاسىنىڭ كوممۋنيكاتسيالار قىزمەتى الاڭىندا جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ايگۇل تالاسوۆا كەڭىنەن ايتىپ بەردى.
سپيكەر العا تارتقان مالىمەتتەر بويىنشا, جاسى كەلىپ زەينەتكە شىققان ازاماتتار مەملەكەت تاراپىنان جولعا قويىلعان جۇيەلى قىزمەتتەردى پايدالانا الادى. اتاپ ايتقاندا, ەلوردا زەينەتكەرلەرىنىڭ جىلىنا ءبىر رەت ششۋچينسك-بۋراباي كۋرورتتىق اۋماعىندا, قاتاركول كولىنىڭ جاعاسىندا ورنالاسقان قارتتار مەن مۇگەدەكتەرگە جانە مۇگەدەك بالالارعا ارنالعان وڭالتۋ ورتالىعىندا دەمالۋىنا ءارى ەمدەلۋىنە جان-جاقتى جاعداي جاسالعان. جاسى بويىنشا زەينەتكەرلەر جولداما قۇنىنىڭ 25%-ىن جانە ەڭ تومەن مولشەردەگى زەينەتاقى الاتىندار 18%-ىن عانا تولەۋگە بولادى. ال ۇلى وتان سوعىسىنىڭ ارداگەرلەرىنە, ولارعا تەڭەستىرىلگەن تۇلعالارعا تەگىن.
– ستوماتولوگيالىق پروتەزدەۋ قىزمەتى ەكى جىلدا ءبىر رەت كورسەتىلەدى. بيىل استانا قالاسىندا ءتىس پروتەزدەۋگە جانە اۋىز قۋىسىنىڭ پروتەزىنە دەيىنگى سانيتارلىق تازالاۋعا 3 مىڭ ورىن ءبولىندى. قازىرگى ۋاقىتتا ءتىس پروتەزدەۋ جانە سانيتارلىق قىزمەت كورسەتۋ بويىنشا مەملەكەتتىك ساتىپ الۋ كونكۋرسى جاريالاندى. ودان كەيىن مەملەكەتتىك ساتىپ الۋ وتكىزىلەدى. ناتيجەسىندە, قىزمەت كورسەتۋشىمەن, ستوماتولوگيامەن شارت جاسالادى. ودان ءارى باق ارقىلى قالا تۇرعىندارى ەكى جىلدا ءبىر رەت بەرىلەتىن ءتىس پروتەزدەۋىنە جازىلۋ ۋاقىتى مەن ورنى تۋرالى قۇلاقتاندىرىلادى, دەدى ا.تالاسوۆا.
سونىمەن قاتار اتالعان باسقارما وكىلىنىڭ ايتۋىنشا, قارتتار كۇنىنە وراي (1 قازاندا) 2,5 اەك كولەمىندە ءبىر رەتتىك اقشالاي تولەمدەر بەرىلەدى. بۇعان قوسا قاتتى وتىندى ساتىپ الۋ بويىنشا الەۋمەتتىك كومەك جان باسىنا شاققانداعى تابىسى ءتورت ەڭ تومەن كۇنكورىس دەڭگەيىنەن اسپايتىن, وتباسى مۇشەلەرىندە باسقا تۇرعىن ءۇيى بولماعان جاعدايدا پەشپەن جىلىتاتىن جەكە تۇرعىن ۇيدە تۇراتىن, ونىڭ جەكە مەنشىك يەسى (جالعا الۋشىسى) نەمەسە يەسىنىڭ وتباسى مۇشەلەرى بولىپ كەلەتىن زەينەتكەرلەرگە, مۇگەدەكتىگى بار ادامدارعا, مۇگەدەكتىگى بار بالالارعا, الەۋمەتتىك ءمانى بار اۋرۋلارعا شالدىققاندارعا, كوپبالالى انالارعا جانە كوپبالالى وتباسىلارعا, جەتىم بالالارعا, اتا-اناسىنىڭ قامقورلىعىنسىز قالعان بالالارعا, بالالار ۇيلەرىنىڭ تۇلەكتەرىنە كورسەتىلەدى. وتەماقى 16 اەك كولەمىندە جىلۋ مەرزىمىنە تولەنەدى. سونداي-اق تۇرعىن ءۇيدى گازداندىرۋعا بەرىلەتىن بىرجولعى الەۋمەتتىك كومەك تە وسىنداي. گاز قازاندىعىن سالۋ جانە مونتاجداۋ بويىنشا شىعىنداردى وتەۋ – 130 اەك-تەن اسپايتىن سومادا.
– ومىرلىك قيىن جاعدايعا تاپ بولعان ادامدارعا ءبىر رەتتىك الەۋمەتتىك كومەك مۇگەدەكتىگى بار تۇلعالارعا كورسەتىلەدى. ال ءدارى-دارمەك ساتىپ الۋ جانە مەديتسينالىق قىزمەتتەردى الۋ شىعىندارىن جابۋعا ارنالعان تولەم جىلىنا ءبىر رەت اقشالاي 13 اەك كولەمىندە بەرىلەدى. تابيعي ءزىلزالا نەمەسە ءورت سالدارىنان زارداپ شەككەن ازاماتتارعا الەۋمەتتىك كومەك اقشالاي تولەم تۇرىندە مىنا كولەمدە ۇسىنىلادى: جالعىز تۇرعىن ۇيگە ەلەۋلى زيان كەلتىرىلگەن, ب ۇلىنگەن, جويىلعان جاعدايدا وتباسىنا – 400 اەك; وتباسى مۇشەلەرى قايتىس بولعاندا, قازا بولعاندا – 150 اەك. سونداي-اق ەلوردادا تۇراقتى تۇراتىن جانە تۇرعىن ءۇيدىڭ مەنشىك يەلەرى بولىپ سانالاتىن از قامتىلعان وتباسىلارعا, كوممۋنالدىق تولەۋگە جۇمسالاتىن شىعىنداردىڭ جيىنتىق تابىسىنان 5% اساتىن وتباسىنا بەرىلەتىن «تۇرعىن ءۇي كومەگىن تاعايىنداۋ» مەملەكەتتىك قىزمەتى كورسەتىلەدى. بۇل تولەمنىڭ ورتاشا كولەمى – ايىنا 25 مىڭ تەڭگەگە دەيىن, دەدى ا.تالاسوۆا.
سونىمەن قاتار اتاۋلى الەۋمەتتىك كومەك جان باسىنا شاققانداعى ورتاشا تابىسى كەدەيلىك شەگىنەن اسپايتىن ادامعا, وتباسىنا ورتاشا تابىس پەن كەدەيلىك شەگى اراسىنداعى ايىرما رەتىندە شارتسىز نەمەسە شارتتى اقشالاي كومەك تۇرىندە بەرىلەدى. بۇل رەتتە استانا قالاسىندا 2023 جىلدىڭ 1-توقسانىندا كەدەيشىلىك شەگى 35 265 تەڭگەنى قۇراعانىن ايتا كەتكەن ءجون. بۇعان قوسا ەلوردادا زەينەتكەرلەر ءۇشىن جولاۋشىلار كولىگى مارشرۋتتارىندا تەگىن ءجۇرۋ قاراستىرىلعان.