اعايىندارىمىزدىڭ ءبىرى اياق استىنان قايتىس بولىپ اۋىلعا بارىپ-كەلۋگە تۋرا كەلدى وتكەندە. جاسى ەلۋگە دە كەلمەگەن اپايىمىزدى جەر قوينىنا تاپسىرعاننان كەيىن بىلدىك – مارقۇمنىڭ ارتىندا اڭىراپ ۇلى مەن قىزى عانا ەمەس, ەكى بانكتەن العان 6 ميلليونداي قارىزى دا قالعان ەكەن.
اۋداندىق اۋرۋحانادا قاراپايىم مەدبيكە بولىپ جۇمىسىن ىستەپ, كۇندەلىكتى كۇيبەڭ تىرلىككە شىرمالعان ول كىسىنىڭ شالقىپ-تاسىپ ءومىر سۇرگەنىن كورگەن جوقپىز. كەي ايەلدەر سياقتى قارىزعا باتسا دا قىمبات كيىنىپ, التىن-بريلليانت تاعىنىپ, توي-تومالاقتا دا توبە كورسەتە قويمايتىن. ءۇي مەن جۇمىستىڭ ورتاسىندا شاپقىلاپ, توقساننان اسقان قايىن اتاسىنىڭ اۋزىنا اسىن توسىپ جۇرگەن كەلىننىڭ باسپاناسى دا تالاي جىل جوندەۋ كورمەگەن. سوندا اۋىلداعى اعايىن ءۇشىن اسا قوماقتى قارجىنى ول نە ءۇشىن, كىم ءۇشىن العان؟
قازاعا جينالعان ەت جاقىندارىن مازالاعان وسى سۇراقتىڭ جاۋابىن ەستىگەندە توبەمنەن جاي تۇسكەندەي بولدى. سويتسەك اپايىم «Tesla» دەيتىن كومپانيانىڭ «وتە ءتيىمدى جوباسىنا» تىركەلگەن ەكەن. جالعىز ول ەمەس, اۋدانداعى ءۇش مەكتەپ پەن اۋرۋحانانىڭ مىڭعا تارتا قىز-كەلىنشەگى تايلى-تاياعىمەن قالماي الگى نە پيراميدا ەكەنى بەلگىسىز, نە كاسىپ ەكەنى تۇسىنىكسىز «Tesla»-عا تاۋەلدى بولىپ قالعان. كومپانياعا شاقىرعاننىڭ ءبىرى جۇمىسىنداعى تىكەلەي باسشىسى بولسا, قولداپ-قولپاشتاپ, ماقتاۋىن اسىرعانى – ابىسىنى. اۋىلداعى الاياقتىقتىڭ تىزبەگى وسىنداي تانىس-تامىر, اعايىن-تۋىستىقتان باستالادى.
ءبىر سوزبەن ايتقاندا, قارجى الاياقتارى ەندى اۋىلعا دا اۋىز سالا باستاعان. ەڭ سوراقىسى ولار ارامدىققا قۇرىلعان سحەمالارىن اۋىل-ايماقتا بەلسەندى تۇردە تاراتىپ, ءالى دە جالعاستىرىپ كەلەدى. اۋىلدىڭ كوزى اشىق «زيالىسى» سانالاتىن مۇعالىمى مەن دارىگەرى الاياقتاردىڭ «وسى اپتادا 100 مىڭ سالساڭ, كەلەسى اپتا 200 مىڭ تاباسىڭ, اقشاڭ ءوسىپ, ءبىر جىلدا كولىك الاسىڭ» دەگەن ەرتەگىسىنە سەنىپ كەلگەنىنە قايران قالاسىڭ كەيدە. ناعىز «تۇيەنى جەل شايقاسا, ەشكىنى اسپاننان ىزدەنىڭ» كەرى بولىپ تۇر.
«Tesla»-نىڭ الاياقتىق ءتاسىلىنىڭ وزگە قارجى پيراميدالارىنان ەش ايىرماشىلىعى جوق. الدىمەن ءبىر ادام قوماقتى قارجى سالادى, ارتىنان 2-3 «دوسىن» تىركەيدى, ولاردىڭ ارقايسىسى ءارى قاراي 3-4 «سەرىگىن» سۇيرەپ ءجۇرىپ, ولاردى وزدەرى ءالى قولدارىنا دا ۇستاپ كورمەگەن «مول اقشانىڭ استىندا قالاسىڭ» دەگەن وتىرىككە سەندىرىپ ءجۇرىپ كىرگىزەدى. ءتىپتى قاتارعا كىرگەن كەلىنشەكتەردىڭ بىرىنە جۇرتتىڭ كوزىنشە سۋ جاڭا كولىكتىڭ كىلتىن تابىس ەتىپ: «مىنە, «Tesla»-نىڭ ارقاسىندا 10 مىڭ دوللاردىڭ «تەمىر تۇلپارىن» الدى» دەپ جارناماسىن دا جاساعان. ال اۋىلداعى حالىقتا قايدان اقشا بولسىن؟ بۇلاردىڭ تىم شەكتەن شىققانى سونشالىق, مارقۇم بولعان تۋىسىمىزدى الماتىعا وزدەرىمەن بىرگە ەرتىپ اپارىپ, جانىندا بىرگە ءجۇرىپ بانكتەن نەسيە الدىرتقان. ءبىر بانكتەن راسىمدەگەن نەسيەسىن تولىق وتەمەي جاتىپ, ەكىنشىسىنەن دە قارىزعا اقشا العان. اككىلەردىڭ ارباۋىنا مىقتاپ تۇسكەن مارقۇم ءوزىنىڭ ارتىنان 25 جاستاعى ۇلىن دا تىركەپ, سونىڭ اتىنان دا ءبىراز اقشا سالىپ كەلگەن ەكەن...
الەمدىك تانىمال ءارى جەتەكشى كومپانيالاردىڭ لوگوتيپتەرىن پايدالانۋ – قارجى پيراميدالارىنىڭ ءجيى قولداناتىن قيتۇرقى «قاعيداتتارىنىڭ» ءبىرى. الايدا اشىعىن ايتقاندا اۋىلداعى اعايىننىڭ دەنى «Tesla»-نىڭ اقشا شىعاراتىن كونۆەيەر ءوندىرۋشىسى ەمەس, ەلەكتروكولىك «بۋتيگى» ەكەنىن بىلە بەرمەيدى. الەمدىك نارىقتى جاۋلاپ العان بۇل كومپانيانىڭ قازاقستاندا رەسمي ورتالىعى دا جوق. تەك سونىڭ اتىن جامىلىپ, قيىننان قيىستىرىپ قارجى پيراميداسىن جاساپ العاندار كوپ. الداۋ-ارباۋسىز, ادال ەڭبەكپەن «Tesla»-نىڭ ۋداي قىمبات «تەمىر تۇلپارىن» تاقىمداپ جۇرگەندەر بولسا بولار. الايدا الىستاعى اۋىل جۇرتىنىڭ ماردىمسىز جالاقىسى «قارجىلىق كوپىرشىككە» اينالىپ كەتىپ جاتقانى جانعا باتادى.
راس, ەلىمىزدە الاياقتىق پەن قارجى پيراميدالارىنا قارسى كەشەندى جۇمىس جۇرگىزىلىپ كەلەدى. بۇل ماسەلەگە پرەزيدەنت تە اسا ءمان بەرىپ, قۇزىرلى ورگاندارعا ءتيىستى تاپسىرما بەردى. بىراق قالانىڭ تسيفرلىق ساۋاتى جەتكىلىكتى تۇرعىندارىنىڭ ءوزىن تاقىرعا وتىرعىزىپ كەتىپ جاتقان قارجى پيراميدالارى ءۇشىن اۋىلداعى اعايىننىڭ اڭقاۋلىعى ءتىپتى «ىزدەگەنگە – سۇراعان» بولىپ تۇر. جاقىندا باس پروكۋراتۋرا وڭىرلەردە «زاڭ كەرۋەنى» كوشپەلى اكتسيالارى وتكىزىلەتىنى تۋرالى حابارلادى. ءىس-شارا بارىسىندا پروكۋراتۋرا مەن پوليتسيا قىزمەتكەرلەرى اۋىل-ايماقتاعى حالىققا قارجى پيراميدالارى مەن الاياقتىقتان ساقتانۋ شارالارى تۋرالى اقپارات بەرۋدى كوزدەپ وتىر. بۇل «كەرۋەننىڭ» الماتىدان 250 شاقىرىم قاشىقتا جاتقان ءبىزدىڭ اۋىلعا بارعان-بارماعانىن ناقتى بىلمەدىم, بىراق ءتۇپ-توركىنى اقش-تان شىعاتىن «Tesla»-نىڭ اقپاراتى مەن جارناماسى كەگەننىڭ ءاربىر ۇيىنەن ەڭ قۇرىعىندا ءبىر رەت ايتىلعانىنا كوزىم انىق جەتەدى.