ىشكى ىستەر مينيسترلىگىنىڭ رەسمي وكىلى شۇعىلا تۇرلىبەك 20 اقپاندا وتكەن بريفينگتە قازاقستاندا قوس ازاماتتىق فاكتىلەرىن انىقتاۋ بويىنشا اتقارىلىپ جاتقان جۇمىستار تۋرالى ايتتى, دەپ حابارلايدى Egemen.kz.
ءىىم وكىلى اتاپ وتكەندەي, قازاقستان قوس ازاماتتىقتى مويىندامايدى.
«وتكەن جىلى قوس ازاماتتىق العانى ءۇشىن 841 ادام اكىمشىلىك جاۋاپكەرشىلىككە تارتىلسا, 138-ءى سوت شەشىمىمەن ەلدەن شىعارىلدى, قالعاندارىنا ايىپپۇل سالىندى. سوڭعى بەس جىلدا ازاماتتىققا قاتىستى زاڭنامانى بۇزعانى ءۇشىن 3515 ادام قىلمىستىق جاۋاپكەرشىلىككە تارتىلدى, ونىڭ ىشىندە 3000 ادامعا ايىپپۇل سالىندى, 473-ءى ەلدەن شىعارىلدى. بارلىعىنان قازاقستان ازاماتتىعى الىنىپ تاستالدى», دەدى شۇعىلا تۇرلىبەك.
بيىل قوس ازاماتتىق فاكتىلەرىنىڭ الدىن الۋ ماقساتىندا باسقا ازاماتتىقتى قاساقانا جاسىرۋ ءۇشىن جاۋاپكەرشىلىكتى كۇشەيتەتىن زاڭنامالىق اكتىلەرگە تۇزەتۋلەر ەنگىزۋ جوسپارلانىپ وتىر.
شۇعىلا تۇرلىبەك ەلىمىزدىڭ ازاماتتىعىنان ايىرىلعان ادامنىڭ قازاقستان ازاماتىنىڭ تولقۇجاتىن نەمەسە جەكە كۋالىگىن پايدالانعانى, سونداي-اق زاڭدا بەلگىلەنگەن مەرزىمدە حابارلاماعانى ءۇشىن زاڭنامادا اكىمشىلىك جاۋاپكەرشىلىك قاراستىرىلعانىن ەسكە سالدى.
سونداي-اق قوس ازاماتتىق فاكتىسىن جاسىرعانى ءۇشىن 200 اەك-كە دەيىن ايىپپۇل سالۋ نەمەسە ەلدەن شىعارۋ قاراستىرىلعان.
«باسقا ازاماتتىقتى قابىلداۋ كەزىندە زارداپتاردى بولدىرماۋ ءۇشىن باسقا ەلدەرگە كەتكەن جانە باسقا ازاماتتىقتى قابىلداعان قازاقستاننىڭ بۇرىنعى ازاماتتارى 30 كۇن ىشىندە قازاقستاننىڭ كونسۋلدىق مەكەمەسىنە ازاماتتىقتى جوعالتۋدى تىركەۋگە ءوتىنىش بەرۋى كەرەك», دەدى شۇعىلا تۇرلىبەك.