باتىس قازاقستان وبلىسىندا ەل پرەزيدەنتىنىڭ جۇلدەسى ءۇشىن ءىV حالىقتىق سپورت ويىندارى باستالدى. جارىسقا وبلىستىڭ بارلىق 12 اۋدانىنان جانە ورال قالاسىنان كوماندالار قاتىسۋدا. سپورتشىلاردىڭ جالپى سانى مىڭ جارىمنان اسادى. سايىستار ۆولەيبول, شاعىن فۋتبول, توعىزقۇمالاق, دويبى, شاحمات, كىر تاسىن كوتەرۋ, قول كۇرەسى, قازاق كۇرەسى, ۇستەل تەننيسى, جازعى پرەزيدەنتتىك كوپسايىس, وتباسىلىق جارىستار, بيليارد جانە سامبو كۇرەسى بويىنشا جۇرۋدە.
– شارانىڭ باستى ماقساتى – حالىق ويىندارىن كوپشىلىككە تاراتۋ جانە دامىتۋ. اسىرەسە, وتباسىلىق جارىستار ءبۇتىن ءبىر شاڭىراقتى سپورتقا دەن قويۋعا جەتەلەيدى. وسىنداي جارىستاردى كوپ ءوتكىزۋ ارقىلى سپورتپەن اينالىساتىن كوپشىلىكتىڭ قاتارىن ارتتىرۋعا بولادى. بۇقارالىق سپورت پەن حالىقتىق ويىندار قازاقستاندى مەكەندەيتىن ۇلت پەن ۇلىستار اراسىنداعى دوستىقتىڭ نىعايا تۇسۋىنە سەپتىگىن تيگىزەرى ءسوزسىز, – دەيدى باتىس قازاقستان وبلىستىق تۋريزم, دەنە شىنىقتىرۋ جانە سپورت باسقارماسىنىڭ ءبولىم باستىعى تۇراربەك بەكارىستانوۆ. – بۇعان دەيىن ءار اۋداندا ىرىكتەۋ ويىندارى وتكەن بولاتىن. وسى سەبەپتى مۇندا ەڭ مىقتى كوماندالار قاتىسۋدا. بۇل جارىستاردا جۇلدە العاندار شىلدە ايىنىڭ 3-6 كۇندەرى وتەتىن رەسپۋبليكالىق ءىV حالىق سپورتى ويىندارىنا قاتىسادى. ورايى كەلگەندە ايتا كەتەيىك, ەل پرەزيدەنتى جۇلدەسى ءۇشىن ءجۇرەتىن رەسپۋبليكالىق سايىس ورال قالاسىندا وتەدى.
سونىمەن, بارلىق سپورت بازالارىندا ءبىر مەزگىلدە بىرنەشە سايىس تۇرلەرى باستالىپ تا كەتتى. وبلىستىق مامانداندىرىلعان وليمپيادالىق رەزەرۆتەگى بالالار مەن جاسوسپىرىمدەردىڭ مەكتەبى سپورت زالىندا كەشە تاسقالا مەن جاڭاقالا اۋداندارىنىڭ كوماندالارى ۆولەيبولدان كۇش سىناستى. ءناتيجەسىندە 2:1 ەسەبىمەن جاڭاقالا كومانداسى جەڭىسكە جەتتى. ءبىز وسى جەڭىمپاز كوماندانىڭ كاپيتانى تيمۋر بايتەنوۆپەن تىلدەسكەن ەدىك.
– ءبىزدىڭ اۋدانىمىزدا سپورتتىق شارالارعا وتە جاقسى كوڭىل بولىنەدى. تۇرعىندار اراسىندا سپورتپەن اينالىساتىندار كوپ. كوماندامىز اۋدانداعى جارىستا دا ايقىن باسىمدىقپەن جەڭىسكە جەتكەن ەدى. ەندى وبلىستىق جارىستا دا جۇلدەلى ورىننان كورىنەمىز بە دەگەن ءۇمىت بار. وسىنداي حالىقتىق ويىنداردىڭ ءجيى وتكەنى دۇرىس. سوندا جاستاردىڭ سپورتقا دەگەن قىزىعۋشىلىعى ارتادى, – دەيدى ول.
قىزۋ ءجۇرىپ جاتقان سايىستا وزگە ەتنوس وكىلدەرى دە كوزگە كوپ شالىندى. تاسقالا اۋدانىنان كەلگەن سەرگەي وبرازكوۆ وتباسىنداعى ءتورتىنشى بالا ەكەن.
– مەنىڭ قازاق دوستارىم كوپ. ولارمەن وسى ۆولەيبولمەن اينالىسا باستاعاننان تانىستىم. ۇيىمشىلمىز. ءبىر وتباسىنىڭ بالالارىنداي تاتۋمىز. ءبىراز جىلدان بەرى جەڭىستى دە, جەڭىلىستى دە بىرگە كورىپ كەلەمىز. بۇگىنگى كەزدەسۋ ءبىزدىڭ پايدامىزعا شەشىلمەدى. بىراق, جۇلدەلى ورىنداردان ءۇمىتتىمىز, – دەيدى سەرگەي وبرازكوۆ.
حالىقتىق سپورت ويىندارىنىڭ اشىلۋ سالتاناتى ەرتەڭ وتەدى دەپ كۇتىلۋدە. ءبىز وقىرمانداردى الداعى نومىرلەردىڭ بىرىندە ونىڭ ءوتۋ بارىسىمەن تانىستىراتىن بولامىز.
تەمىر قۇسايىن. ورال.