ەلوردادا قارت كىسىلەردىڭ ءال-اۋقاتى مەن قولداۋىنا ەرەكشە نازار اۋدارىلىپ وتىر. ونلاين-بريفينگتە قالانىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ايگۇل تالاسوۆا بۇل باعىتتا اتقارىلىپ جاتقان جۇمىستار جايىن تارقاتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ەلوردا زەينەتكەرلەرى جىلىنا ءبىر رەت جەڭىلدەتىلگەن باعادا ساناتوري-كۋرورتتىق ەم-دومدى كاتاركول كولىنىڭ جاعاسىنداعى ششۋچينسك-بۋراباي كۋرورتتىق ايماعىندا – قارتتارعا, مۇگەدەكتەر مەن بالالارعا ارنالعان وڭالتۋ ورتالىعىندا الا الادى. سوعىس ارداگەرلەرى مەن ولارعا تەڭەستىرىلگەن ادامدارعا جولداما تەگىن بەرىلەدى.
سونداي-اق 1 قازاندا اتاپ وتىلەتىن قارتتار كۇنىنە وراي 2,5 اەك مولشەرىندە بىرجولعى اقشالاي تولەم اۋدارىلادى.
قاجەت بولعان جاعدايدا زەينەتكەرلەرگە قاتتى وتىن ساتىپ الۋ بويىنشا الەۋمەتتىك كومەك ءبولىنۋى مۇمكىن. ونى جاسى بويىنشا زەينەتكەرلەر, مۇگەدەكتىگى بار ادامدار, مۇگەدەكتىگى بار بالالار, الەۋمەتتىك ماڭىزدى اۋرۋلارى بار ادامدار, كوپبالالى وتباسىلار, جەتىم بالالار, اتا-اناسىنىڭ قامقورلىعىنسىز قالعان بالالار, پەشپەن جىلىتىلاتىن جەكە تۇرعىن ۇيلەردە تۇراتىن, ونىڭ مەنشىك يەلەرى (جالداۋشىلارى) نە مۇشەلەرى سانالاتىن بالالار ءۇيىنىڭ تۇلەكتەرى الا الادى. مەنشىك يەسىنىڭ (جالداۋشىنىڭ) وتباسى, ولاردا جانە وتباسى مۇشەلەرىندە باسقا تۇرعىن ءۇي بولماعان جانە جان باسىنا شاققانداعى ورتاشا تابىسى ءتورت ەڭ تومەنگى كۇنكورىس دەڭگەيىنەن اسپايتىن بولسا, جىلىتۋ ماۋسىمىنا 16 اەك مولشەرىندە كومەك بەرىلەدى.
ايگۇل تالاسوۆانىڭ ايتۋىنشا, زەينەتكەرلەرگە گاز قازاندىعىن ورناتۋ بويىنشا شىعىندارى وتەلۋى مۇمكىن.
سونداي-اق تىزىمدە ومىرلىك قيىن جاعدايعا تاپ بولعاندارعا ءدارى-دارمەك ساتىپ الۋعا جانە اقىلى مەديتسينالىق قىزمەتتەردى قارجىلاي تۇردە الۋعا جىلىنا 1 رەت 13 اەك مولشەرىندە بىرجولعى الەۋمەتتىك كومەك بار.
«استانا قالاسى بويىنشا ءتىس پروتەزدەۋ جانە اۋىز قۋىسىن پروتەزگە دەيىنگى ساناتسيالاۋ قىزمەتتەرىنە بيىل 3000 ورىن ءبولىندى. قازىرگى ۋاقىتتا ءتىس پروتەزدەۋ جانە ساناتسيا قىزمەتتەرىن ۇسىنۋعا مەملەكەتتىك ساتىپ الۋ بويىنشا كونكۋرس جاريالاندى, سودان كەيىن تەندەر وتكىزىلەدى, ناتيجەسىندە قىزمەت كورسەتۋشىمەن (ستوماتولوگيامەن) شارت جاسالادى. بۇدان ءارى باق ارقىلى قالا تۇرعىندارىنا ءتىس پروتەزدەۋگە جازىلۋدىڭ مەرزىمى مەن ورنى تۋرالى حابارلانادى, ول ەكى جىلدا ءبىر رەت بەرىلەدى. ءتىس پروتەزدەۋگە ۇمىتكەرلەردى تىركەۋگە سايكەس قىزمەت جىل بويى كورسەتىلەدى», دەپ ءتۇسىندىردى ايگۇل تالاسوۆا.
سونىمەن قاتار زەينەتكەرلەر قالالىق جولاۋشىلار كولىگىنىڭ قىزمەتىن تەگىن پايدالانا الادى.
«شاراپات» الەۋمەتتىك قىزمەت كورسەتۋ ورتالىعىندا جانە بەلسەندى ۇزاق ءومىر ءسۇرۋ ورتالىعىندا اعا بۋىن وكىلدەرىنە قولداۋ مەن كومەك كورسەتىلەدى.