الماتىدا «ايبىن» رەسپۋبليكالىق اسكەري-پاتريوتتىق جيىنىنا قاتىساتىن كوماندالار بەلگىلى بولدى. قالاداعى دەسانتتىق-شابۋىلداۋ قۇراماسىنىڭ الاڭىندا وتكەن جارىسقا الماتى, قوناەۆ جانە تالدىقورعان قالالارىنىڭ اسكەري-پاتريوتتىق كلۋبتارى قاتىستى. ولارمەن دەسانتتىق-شابۋىلداۋ اسكەر-لەرىنىڭ قۇرامالارى مەن اسكەري بولىمدەرى پىسىقتاۋ جۇمىستارىن جۇرگىزۋدە.
ءىس-شارا شەبەرلىگى شىڭدالا باستاعان شىمىر جىگىتتەردىڭ قويان-قولتىق ۇرىس ادىستەرىن پاش ەتۋىمەن باستالدى. كاسىبي ماشىعى جوعارى ماماندار جاس ۇلانداردىڭ ونەرىن باعالاۋدا فيزيكالىق مۇمكىندىكتەرىمەن قاتار ينتەللەكتۋالدىق الەۋەتىنە دە ايرىقشا ماڭىز بەردى. دەسانتتىق-شابۋىلداۋ اسكەرلەرى قولباسشىسىنىڭ كەڭەسشىسى وتستاۆكاداعى پودپولكوۆنيك كابير ناۋرۋشەۆ: «جاس دەسانتشىلار ءوز ەلىن سۇيەتىن جانە ونىڭ تاۋەلسىزدىگىن قورعاي الاتىن ناعىز پاتريوتتار دەپ بىلەمىز. ايبارى مىقتى ازاماتتار – ەل تىرەگى. ولارعا جۇكتەلەتىن جاۋاپكەرشىلىك جوعارى. بولاشاق اسكەري ادامعا باتىرلىقپەن قاتار اسقان سەزىمتالدىق, ۇشقىر قيال, اقىل-پاراسات قاجەت», دەپ جارىسقا قاتىسۋشىلارعا جىگەر بەردى.
سايىستا ءاربىر كوماندا مۇشەسى كلۋب باسشىلارى مەن نۇسقاۋشىلار ۇيرەتكەن داعدىلاردىڭ ءبارىن مۇلتىكسىز ورىنداۋعا كۇش سالدى. پنەۆماتيكالىق مىلتىق اتۋ, اۆتوماتتى بولشەكتەۋ جانە قۇراستىرۋ, جالپى اسكەري قورعانىس كوستيۋمىن كيۋ ءنورماتيۆىن پىسىقتاۋ بويىنشا ونەرلەرىن ورتاعا سالدى. جىگىتتەر كەرمەگە تارتىلىپ, نازىك جاندى پاتريوتتار جەڭىل جاتتىعۋلار بويىنشا ءوزارا باق سىناستى.
جارىس قورىتىندىسى بويىنشا ءبىرىنشى ورىندى قوناەۆ گارنيزونى اسكەري ءبولىمىنىڭ «جاس دەسانتشى» كومانداسى, ەكىنشى ورىندى الماتى دەسانتتىق-شابۋىلداۋ قۇراماسىنىڭ «تۇركسىب» كومانداسى, ءۇشىنشى ورىندى ماتەريالدىق-تەحنيكالىق قامتاماسىز ەتۋ پولكىنىڭ «بارىس» كومانداسى يەلەندى.
بارلىق ءپان بويىنشا ەڭ جوعارى ناتيجە كورسەتكەن تالدىقورعان گارنيزونىنىڭ 18404 اسكەري ءبولىمىنىڭ كومانداسى جانكۇيەرلەر ىقىلاسىنا بولەنىپ, جارىستىڭ باس جۇلدەسىن جەڭىپ الدى.
ايرىقشا ونەرىمەن دارالانعان «تۇركسىب» كلۋبىنىڭ تاربيەلەنۋشىسى امينا زاۋروۆا وتكەن جىلدىڭ جەلتوقسان ايىندا «جاس سارباز» اسكەري-پاتريوتتىق قوزعالىسىنا قابىلدانعان. ساباقتاردىڭ ارقاسىندا ول سالىستىرمالى تۇردە قىسقا مەرزىمدە اتۋ مەن سپورتتا كەرەمەت ناتيجەلەرگە قول جەتكىزگەنىن ايتادى.
– ءبىز رايىمبەك باتىر اتىنداعى دەسانتتىق-شابۋىلداۋ قۇراماسىنا كۇن سايىن ساباققا كەلەمىز. نۇسقاۋشىلار بىزگە اتىس قارۋىن بولشەكتەۋگە جانە قۇراستىرۋعا, العاشقى مەديتسينالىق كومەك كورسەتۋ نەگىزدەرىنە, جەر بەدەرىن باعدارلاۋعا, ءپاراشيۋتتى جيناۋعا جانە باسقا دا پاندەرگە ۇيرەتەدى. ءبىزدىڭ جەتىستىكتەرىمىزدى ءوزىمىز ءبىلىم الاتىن №78 مەكتەپ-گيمنازيا ماقتان تۇتادى, – دەيدى امينا.
«تۇركسىب» اسكەري-پاتريوتتىق كلۋبى 61993 اسكەري ءبولىمىنىڭ بازاسىندا ءۇش جىلدان بەرى جۇمىس ىستەيدى. اتىس دايىندىعى جونىندەگى نۇسقاۋشى سەرجانت رامازان سۇلەيمانوۆتىڭ پىكىرىنشە, اسكەري-قولدانبالى پاندەرگە دەگەن قىزىعۋشىلىق, بىرىنشىدەن, بالالاردى سمارتفوننان الشاقتاتادى, ەكىنشىدەن, ولاردىڭ بويىنداعى سەنىمدىلىگىن ارتتىرىپ ءتوزىم مەن تارتىپكە تاربيەلەيدى. جىلدان-جىلعا جارىسقا قاتىسۋشى ورەندەردىڭ شەبەرلىگى شىڭدالا تۇسكەن. جوعارى سىنىپ تالاپكەرلەرى قاتارداعى اسكەري قىزمەتشىلەردەي وزدەرىن سەنىمدى ۇستايدى دەيدى ۇيىمداستىرۋشىلار.
اتاپ وتسەك, «ايبىن» جاستاردىڭ جىل سايىنعى اسكەري-پاتريوتتىق جيىنىنا 14 پەن 18 جاس ارالىعىنداعى قازاقستاننىڭ اسكەري-پاتريوتتىق كلۋبتارىنىڭ, اسكەري كوللەدجدەردىڭ, مەكتەپ-ينتەرناتتاردىڭ جانە «جاس ۇلان» رەسپۋبليكالىق مەكتەپتەرىنىڭ تاربيەلەنۋشىلەرى قاتىسادى. جوباعا قاتىسا وتىرىپ, دەسانتتىق-شابۋىلداۋ اسكەرلەرىنىڭ اسكەري-پاتريوتتىق كلۋبتارىنىڭ وكىلدەرى ۇنەمى جوعارى ناتيجەلەر كورسەتىپ, جۇلدەلى ورىندارعا يە بولىپ كەلەدى. ولاردىڭ اراسىندا حالىقارالىق جارىستاردا ەل نامىسىن ابىرويمەن قورعاپ جۇرگەن تالانتتى جاستار دا بار.
الماتى