استانا. 20 ماۋسىم. بۇگىن ءتۇن ورتاسى اۋا سان-پاۋلۋدا ۋرۋگۆاي جانە انگليا كوماندالارى ءبىر-بىرىمەن ەكىنشى تۋردىڭ ويىنىن وتكىزدى. ماتچ 2:1 ەسەبىمەن وڭتۇستىك امەريكا وكىلدەرىنىڭ پايداسىنا شەشىلدى. بۇل تۋرالى egemen.kz حابارلادى.
ۋرۋگۆاي – انگليا 2:1 (1:0).
19 ماۋسىم. سان-پاۋلۋ. «ارەنا كورينتيانس» ستاديونى. 62 575 كورەرمەن. تورەشى – كارلوس ۆەلاسكو كارباليۋ (يسپانيا).
ۋرۋگۆاي: فەرناندو مۋسلەرا, مارتين كاسەرەس, حوسە حيمەنەس, ديەگو گودين, الۆارو پەرەيرا, الۆارو گونسالەس (حورحە فۋسيلە, 78), ەگيديو ارەۆالو, نيكولاس لودەيرو (كريستيان ستۋاني, 67), كريستيان رودريگەس, لۋيس سۋارەس (سەباستيان كواتەس, 88), ەدينسون كاۆاني.
انگليا: دجو حارت, گلەن دجونسون, گەري كەحيلل, فيل دجاگيەلكا, لەيتون بەينس, ستيۆەن دجەررارد, دجوردان حەندەرسون (ريكي لامبەرت, 87), راحيم ستەرلينگ (روسس باركلي, 64), ۋەين رۋني, دەنني ۋەلبەك (ادام لاللانا, 7), دانيەل ستارريدج.
گولدار: لۋيس سۋارەس (39, 85), ۋەين رۋني (75).
ەسكەرتۋلەر: ديەگو گودين (9) – ستيۆەن دجەررارد (68).
برازيلياداعى چەمپيونات الدىندا اعىلشىن جانكۇيەرلەرىنىڭ ءوزى ەلدىڭ ۇلتتىق كومانداسىنىڭ دوپ دوداسىندا ايتارلىقتاي تابىسقا جەتەتىنىنە ونشالىقتى سەنىمدى بولعان جوق. ولاردىڭ كوپشىلىگى «ءۇش ارىستان» ءۇشىن شيرەك فينالعا شىعۋ ۇلكەن جەتىستىك بولىپ تابىلاتىنىن جاسىرماي ايتتى. الايدا, روي حودجونستىڭ شاكىرتتەرى ەندى بۇل بەلەستى باعىندىرا المايتىن سياقتى.
انگليا قۇراماسى قازىر جاھاندىق جارىستا ەكى ويىن ويناپ ۇلگەردى. جانە سونىڭ ەكەۋىندە دە 1:2 دەگەن ورتاق ەسەپپەن جەڭىلىستىڭ اششى ءدامىن تاتتى. فۋتبولدىڭ وتانىنان كەلگەن جىگىتتەردىڭ العى كۇنگە اسىققان ارماندارىنىڭ الاۋىن وزدەرىنە تانىس لۋيس سۋارەس ەسىمدى جالعىز شابۋىلشى ءبىر دەممەن ءوشىرىپ تاستادى. كەزدەسۋدىڭ ءبىرىنشى تايمىندا ويىننىڭ باياۋ قارقىنمەن وربىگەنىنە قاراماستان, كوماندالار ءوز جانكۇيەرلەرىن بىرقاتار تارتىستى وقيعالارىمەن ەلىكتىرىپ تۇردى. وسى تۇستاردا قاقپا قۇلپىن اشۋدىڭ تاماشا مۇمكىندىكتەرىن كريستيان رودريگەس, ەدينسون كاۆاني جانە ۋەين رۋني سىندى ويىنشىلار جىبەرىپ الدى. الايدا, گول ءبىر-اق رەت سوعىلدى. ونى لۋيس سۋارەس اعىلشىندار قاقپاسىنا تۋرا باعىتتادى. ۋرۋگۆاي جانكۇيەرلەرى وسىنىڭ الدىندا كوستا-ريكامەن وتكەن ويىندا الاڭعا شىقپاعان تاپ وسى فورۆاردتان ءۇمىت كۇتىپ وتىر ەدى. راس, لۋيس ويىننىڭ باسىندا ءوزىنىڭ ارەكەتىمەن ەرەكشەلەنە قويمادى, ويىن تىزگىنىن دە قولعا سيرەك الدى. دەگەنمەن, وزىنە تاپ كەلگەن ءبىرىنشى مۇمكىندىكتى كەرەمەت پايدالانىپ, دجو ءحارريدى قاپىدا قالدىردى.
ەكىنشى تايم وسكار تابارەس شاكىرتتەرىنىڭ شابۋىلىمەن باستالدى. بىراق اعىلشىندار ۋاقىت وزعان سايىن باسىمدىلىقتارىن ارتتىرا بەردى. ناتيجەسىندە ەكىنشى تايمنىڭ ورتاسىنان باستاپ ۋرۋگۆايلىقتار ءوز الاڭى ماڭىنا تىقسىرىلىپ تاستالدى. سونىڭ پاتىندە اعىلشىندار ەسەپتى دە تەڭەستىرە الدى. قاپتالدان گلەن دجونسون جەتكىزگەن دوپقا ۋەين رۋني ەگەلىك ەتتى. ول قاقپا الدىنداعى قاربالاس شاقتا فەرناندو مۋسلەرانى قاپىدا قالدىردى.
وسىدان جىگەرلەنگەن بريتانيالىقتار بۇدان دا ءارى كەتتى. قاۋىرت شابۋىلدار يىرىمىندە دانيەل ستارريدج ايىپ الاڭى سىزىعىنان وتە قاتتى ۇردى. ۋرۋگۆاي قاقپاشىسى بۇل دوپتى اۋپىرىممەن سىرتقا جونەلتتى. بىراق امەريكالىقتاردا وسىنداي قىسىلتاياڭ كەزدەرى تۇيىقتان ساڭىلاۋ تاۋىپ, شىعىپ كەتەتىن ءبىر ادام بار ەكەن. ول – لۋيس سۋارەس ويىن بىتۋگە 5 مينۋت قالعاندا كەزەكتى قاۋىپتىڭ بۇلتىن وزىمەن بىرگە ىلگەرى اكەتىپ, العا تۇرا ۇمتىلدى. ءبىر كەزدە ول دجو حارتپەن بىرگە-ءبىر شىقتى دا, قاقپاشى جانىنان دوپتى زۋ ەتكىزدى. گول! سونىمەن, ەسەپ 2:1-گە جەتتى.
ويىننىڭ سوڭىندا ۋرۋگۆايلىقتار ۋاقىتتى سوزۋعا تىرىسىپ باقتى. سول جاپپاي قورعانىس ولار ءۇشىن ءساتتى اياقتالدى. بۇل ۇتىلىس ەندى كەلەسى كەزەڭگە وتە المايتىندار ساپىنا انگليا كومانداسىنىڭ دا ەنىپ كەتكەنىن پاش ەتتى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.