استانا. 20 ماۋسىم. بۇگىن ماۋسىمنىڭ 20-نا قاراعان ءتۇنى برازيليانىڭ استاناسى – برازيليا قالاسىنداعى ۇلتتىق ستاديوندا س توبىنداعى كولۋمبيا جانە كوت-د`يۆۋار قۇرامالارى ەكىنشى تۋردىڭ ويىنىن وتكىزدى. ماتچ 2:1 ەسەبىمەن امەريكالىقتاردىڭ پايداسىنا شەشىلدى. بۇل تۋرالى egemen.kz حابارلادى.
كولۋمبيا - كوت-د`يۆۋار 2:1 (0:0).
19 ماۋسىم. برازيليا. ۇلتتىق ستاديون. تورەشى - حوۆارد ۋەبب (انگليا).
كولۋمبيا: داۆيد وسپينا, حۋان سۋنيگا, كريستيان ساپاتا, ماريو يەپەس, پابلو ارمەرو (سانتياگو ارياس, 72), ابەل اگيلار (الەكس مەحيا, 79), كارلوس سانچەس, حۋان كۋادرادو, حامەس رودريگەس, ۆيكتور يباربو (حۋان كينتەرو, 53), تەوفيلو گۋتەررەس.
كوت-د`يۆۋار: بۋباكار بارري, سەرج ورە, ديدە زوكورا, سۋلەيمان بامبا, ارتۋر بوكا, سەرە دە (ماتيس بوللي, 73), شەيك تيوتە, جەرۆينو, يايا تۋرە, ماكس گرادەل (سالومون كالۋ, 67), ۆيلفريد بوني (ديدە دروگبا, 60).
گولدار: حامەس رودريگەس (64), حۋان كينتەرو (70), جەرۆينو (73).
ەسكەرتۋلەر: ديدە زوكورا (55), شەيك تيوتە (90).
بۇل كۇنى وسىنىڭ الدىندا جەڭىس تويىن تويلاعان ەكى كوماندا ۇشىراستى. وڭتۇستىك امەريكا قۇرلىعىنىڭ وكىلدەرى گرەكيا قۇراماسىن وتە سەنىممەن (3:0) ۇتىپ شىقسا, افريكالىقتار جاپونداردى 2:1 ەتىپ ءسۇرىندىردى. بۋكمەكەرلەر وسى ماتچتىڭ الدىندا كولۋمبيالىقتاردىڭ ازداعان باسىمدىقپەن فاۆوريت بولاتىنىن ايتقان ەكەن. ءتۇپتىڭ تۇبىندە ءوزى دە سولاي بولىپ شىقتى. ال بۇل ماتچتىڭ جەڭىمپازدارى ءىس جۇزىندە كەلەسى كەزەڭگە شىعاتىن ەدى.
ءار تايمنىڭ ءارتۇرلى كورىنىس بەرگەنىنە قاراماستان, ويىن جۇرتتىڭ كۇتكەن دەڭگەيىنەن تابىلدى. ۇزىلىسكە دەيىن شىن مانىندە ەكى كوماندادا دا گول سوعاتىنداي مۇمكىندىك بولعان جوق. ەڭ ءبىر قولايلى ءساتتى حامەس رودريگەس جەتكىزگەن دوپتى قاقپاعا تۋرا باعىتتاي الماعان تەوفيلو گۋتەررەس جىبەرىپ الدى.
ەكىنشى تايمنىڭ باسى تۋرا ءبىرىنشى بولىكتەگىدەي جوعارى قارقىنمەن باستالدى. مۇنى, اسىرەسە, كولۋمبيا قۇراماسى كوبىرەك ۇستاندى. 58-مينۋتتا حۋان كۋادرادو دوپتى قيىس بۇرىشتان ۇرىپ, قاقپا باعانىنا تيگىزدى. كوپ ۇزاماي «كوفەشىلەر» بۇل باسىمدىلىقتارىن گولعا اينالدىرا ءبىلدى. دوپ بۇرىشتامادا بەرىلگەندە, ايىپ الاڭى ىشىندە بولعان تالاستا رودريگەس جانىنداعى ديدە دورگبادان بۇرىن قيمىلداپ, ونى باسىمەن قاقپاعا باعىتتاپ ۇلگەردى. ارادا 6 مينۋت ۋاقىت وتكەندە, الگىندەگى رودريگەس قارسى بەتتە دوپقا قول جەتكىزىپ, كەزەكتى كەڭ قاناتتى شابۋىلدى باستاپ بەردى. ونىڭ اياعىنان جەتكەن دوپتى ويىنعا ەندى قوسىلعان حۋان كينتەرو قاقپاعا ءدال ۇرىپ ءتۇسىردى. ەسەپ وسىلايشا دەمدە 2:0-گە جەتتى.
بىراق بۇل يۆۋارلىقتاردىڭ ەڭسەسىن قاتتى تۇسىرە قويماعان سياقتى. مۇنى وسىدان كەيىن ولاردىڭ بىرنەشە رەت تەگەۋرىندى شابۋىل ۇيىمداستىرۋلارى بايقاتتى. سونداي جىگەرلى جورىقتاردىڭ ءبىرىن ءوزى باستاعان جەرۆينە سول قاپتالمەن اتىلىپ شىعىپ, جولاي بىرنەشە باسەكەلەسىن وراعىتىپ ءوتتى. سوسىن ايىپ الاڭىنىڭ ىشىنە كىردى دە, بىردەن قاقپاشىننىڭ وڭ جاعىن الا ۇردى. گول! ول وسىلايشا رودريگەس سىندى وسى تۋرنيردەگى گولى سانىن ەكەۋگە جەتكىزدى. يتالياننىڭ «روما» كومانداسىنىڭ شابۋىلشىسى وسى ارقىلى اتىن تاريحقا ەنگىزدى – وسى كەزگە دەيىن كوت-د`يۆۋار قۇراماسىنىڭ بىردە-ءبىر ويىنشىسى الەم چەمپيوناتىندا ەكى ويىن قاتارىنان گول سوعىپ كورمەگەن ەكەن.
وسى دوپتان كەيىن «پىلدەر» ويىننىڭ قالعان ۋاقىتىندا قارسى قاقپا جاقتان شىقپاي قويدى. الايدا, سول تولاسسىز شابۋىلداردان ءتيىستى ناتيجە شىعارا المادى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.