استانا. 19 ماۋسىم. بۇگىن ءتۇن ورتاسى اۋا ا توبىنداعى كامەرۋن جانە حورۆاتيا قۇرامالارى ماناۋس قالاسىندا ەكىنشى تۋردىڭ ويىندارىن وتكىزدى. ماتچ 4:0 ەسەبىمەن حورۆاتتاردىڭ جەڭىسىمەن اياقتالدى. بۇل تۋرالى egeven.kz حابارلادى.
كامەرۋن – حورۆاتيا 0:4 (0:1).
19 ماۋسىم. ماناۋس. «امازونيا» ستاديونى. 39 982 كورەرمەن. تورەشى – پەدرۋ پروەنسا (پورتۋگاليا).
كامەرۋن: شارل يتاندج, ستەفان مبيا, ورەلەن شەدجۋ (داني نۋنكەۋ, 46), نيكوليا نكۋلۋ, بەنۋا اسسۋ-ەكوتتو, الەكساندر سونگ, جوەل ماتيپ, ەيونگ ەنو, ەريك شۋپو-موتينگ (ەدگار ساللي, 75), ۆەنسان ابۋباكار (پەر ۆەبو, 70), بەندجامين مۋكاندجو.
حورۆاتيا: ستيپە پلەتيكوسا, داريو سرنا, ۆەدران چورلۋكا, دەيان لوۆرەن, دانيەل پرانيچ, يۆان راكيتيچ, لۋكا مودريچ, يۆان پەريشيچ (انتە رەبيچ, 78), ساممير (ماتەو كوۆاچيچ, 72), يۆيتسا وليچ (ەدۋاردو, 69), ماريو ماندجۋكيچ.
گولدار: يۆيتسا وليچ (11), يۆان پەريشيچ (48), ماريو ماندجۋكوۆيچ (61, 73).
ەسكەرتۋلەر: الەكساندر سونگ (40) – ەدۋاردو (86).
ءاۋ باستان كۆارتەتتەگى اۋتسايدەر سانالعان كامەرۋن قۇراماسى سول بولجامنىڭ بەكەر ەمەس ەكەنىن بىردەن ءبىلدىرىپ, ءتۋرنيردىڭ ەكىنشى ماتچىنان كەيىن-اق پلەي-وفف شايقاستارىنا شىعۋ قۇقىعىنان ايرىلدى. ەگەر «اساۋ ارىستاندار» مۇنىڭ الدىندا مەكسيكامەن وتكەن ماتچتا ديەگو دوس سانتوستىڭ ەكى گولىن ساناماي تاستاعان تورەشىنىڭ جۇگەنسىزدىگى ارقىلى عانا قارسىلاسىنا ويىن سوڭىنا دەيىن قارسىلاسىپ باقسا, حورۆاتيامەن كەزدەسۋدە ەكىنشى تايمنىڭ باسىنان باستاپ, شىلپاراداي شاشىلىپ قالدى. بىراق فينكەنىڭ كومانداسى ويىندى جامان باستاعان جوق. كامەرۋن فۋتبولشىلارى ءاربيتردىڭ ىسقىرىعى ەستىلىسىمەن, دۇركىرەپ العا شاپتى. ولار حورۆاتتاردى جان-جاقتان قىسىمعا الىپ, ستاندارتتى جاعدايلارعا جۇگىندى دە... «قىزىل شارشىلى جەيدەلىلەردىڭ» ءبىرىنشى قارسى شابۋىلىندا-اق ءوز قاقپالارىنا دوپ جىبەرىپ الدى. ونى رەسەي فۋتبولىنا جاقسى تانىس يۆيتسا وليچ ءتۇسىردى. ال كومبيناتسيانى داريو سرنادان دوپ العان ماريو ماندجۋكيچ باستادى. ول دوپتى كەلەسى كەزەكتى يۆان پەريشيچكە اسىردى. ودان پاس العان يۆيتسا بار كۇشىمەن سولقىلداتا سوقتى. ەسەپ وسىلاي اشىلدى.
حورۆاتتار بۇدان كەيىن الاڭدا دوپقا ەگەلىك ەتە باستادى. ارا-تۇرا قارسى قاقپانى نىساناعا الىپ تۇرعان ولاردىڭ ەسەپتى ۇلعايتۋعا دا مۇمكىندىكتەرى از بولعان جوق. ويىن وسىلايشا ءوز اۋانىمەن جىلجىپ, ۇزىلىسكە تاياپ قالعاندا, الاڭ ۇستىندە جۇرتتى ەلەڭ ەتكىزگەن تاعى ءبىر وقيعا ورىن الدى. «اساۋ ارىستانداردىڭ» جارتىلاي قورعاۋشىسى الەكساندر سونگ 40-مينۋتتا قاراپتان-قاراپ تۇرىپ ماندجۋكيچكە قارسى دورەكى ارەكەت جاسادى. مۇنى كورگەن پورتۋگال تورەشىسى پەدرۋ پروەنسا وعان ويلانباستان «قىزىل قاعاز» كورسەتتى.
كامەرۋن قاقپاسى تورىن بۇلك ەتكىزگەن ەكىنشى دوپ ەكىنشى تايمنىڭ باستالعان شاعىندا سالىندى. ول دوپتى قارسىلاستار شابۋىلشىسىنىڭ الدىنا لاقتىرىپ تاستاعان قاقپاشى يتاندجدىڭ قاتەلىگىنەن مۇمكىن بولدى. ونى العان پەريشيچ بىردەن ءتورت باعاننىڭ ورتاسىن كوزدەۋگە اسىقپادى. ول بىرنەشە قادام ىلگەرى كەلىپ, وزىنە قولايلى ءسات جاسالعانشا شىداپ باقتى. سونداي مەزەت جاسالعاندا, دوپتى قاقپاشىنىڭ جانىنان زۋ ەتكىزدى. وسىمەن ماتچ تاعدىرى دا شەشىلىپ قويىلعانداي بولدى. سەبەبى, الاڭدا ون ويىنشىمەن قالعان افريكالىقتاردىڭ ەكى دوپتىڭ ايىرماسىن قايتارا الاتىنىنا ەندى ەشكىم دە سەنگەن جوق. سونىڭ ىشىندە فۋتبولشىلاردىڭ وزدەرى دە ونداي نيەتتە بولماسا كەرەك. ولار وسىدان كەيىن مۇلدەم باسىلىپ قالدى. مۇنىڭ ەسەسىنە, حورۆاتتار قايتادان كۇش الدى. ارادا ەكى مينۋت وتكەندە, ماندجۋكيچ تاعى ءبىر گول سالىپ كەتە جازدادى. ول يتاندجبەن جەكپە-جەك شىعىپ, قاقپاعا دوپ باعىتتاي الماي قالدى. ال قارسى شابۋىل كەزىندە داني نۋنكەۋ بار كۇشىن سالىپ سوققى جاسادى. بىراق دوپ قاقپادان قيىس كەتتى. وسىدان كەيىن حورۆاتيانىڭ شابۋىلى كەڭ قاناتپەن ءوربي ءتۇستى. سونىڭ بىرىندە دانيەل پرانيچ ءوزى قول جەتكىزگەن بۇرىشتاما دوبىن الاڭعا ءوزى جەتكىزدى. ول ماندجۋكيچتىڭ باسىنا تۋرالاپ كەلدى. سول كەزدە «باۆاريانىڭ» شابۋىلشىسى بۇل مۇمكىندىكتى قۇر جىبەرمەدى. ارادا 12 مينۋت وتكەندە بۇل فورۆارد تاعى ءبىر گول سوعىپ, چەمپيوناتتا دۋبل جاساۋشىلار قاتارىن ءتۇزدى. بۇل جولعى شابۋىلدى ويىنعا تىڭنان قوسىلعان ويىنشىلار ۇيىمداستىردى. اۋەلى قاپتالدان جەكە جورىققا شىققان ماتەو كوۆاچيچ تەگى برازيليالىق ەدۋاردوعا دوپ بەردى. ونىڭ سوققىسىن يتاندج قايتارىپ ۇلگەردى. بىراق سودان كەرى قايتقان دوپتى ماندجۋكيچ قايتادان قاقپاعا باعىتتاعاندا, وعان گولكيپەر دە, قورعاۋشىلار دا كەدەرگى جاساي المادى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.