جاس ءانشى دانەليا تولەشوۆا اقش-تا وتكەن America’s Got Talent شوۋىندا تاعى دا ونەر كورسەتتى. ول دۋنكان لوۋرەنستىڭ Arcade ءانىن ورىندادى. بايقاۋدىڭ رەسمي پاراقشاسىندا ءانشىنىڭ ونەر دوداسىنىڭ جاڭا ماۋسىمىنا قاتىسقان ساتىنەن بەينەجازبا جاريالاندى.
قازاق قىزىنىڭ ونەرى جوبانىڭ ادىلقازىلارى مەن بارشا كورەرمەننىڭ كوڭىلىنەن شىقتى. دانەلياعا ولار ەرەكشە قوشەمەت كورسەتتى. ەسكە سالا كەتەيىك, تولەشوۆا بۇل جوباعا بۇعان دەيىن دە قاتىسقان بولاتىن. 2020 جىلى لوس-اندجەلەستە America’s Got Talent شوۋىنىڭ 15-ماۋسىمىنىڭ ءفيناليسى اتاندى. America’s Got Talent 2006 جىلدىڭ 21 ماۋسىمىنان بەرى وتكىزىلىپ كەلەدى. شىعارماشىلىق بايقاۋدىڭ باس جۇلدەسى – 1 ميلليون دوللار.
ءدۇبىرلى دودانىڭ بيىلعى 18-ماۋسىمىنىڭ قازىلار القاسىنا ءداستۇرلى تۇردە جوبانىڭ نەگىزىن قالاۋشى, پروديۋسەر سايمون كوۋەلل, سۋپەرمودەل حايدي كلۋم جانە كانادالىق سىقاقشى, تەلەجۇرگىزۋشى حوۋي ماندەل كىردى.
دانەليا تولەشوۆانىڭ وسىعان دەيىنگى شىعارماشىلىق جولىن باقىلاپ وتىرساق, ونىڭ داۋىستىق قابىلەتى دە, ءوزىن جاقسى جاعىنان كورسەتە ءبىلۋى دە قارقىندى دامىپ كەلە جاتقانىن بايقايمىز.
بيىل اتالعان جوبا وتكەن جىلداردىڭ جەڭىمپازدارى مەن فيناليستەرىنىڭ ونەرىن ۇسىندى. ناتيجەسىندە, كەلەسى كەزەڭگە وتەتىندەردىڭ ەسىمدەرى دە جاريالاندى. دانەليا, وكىنىشكە قاراي, ولاردىڭ اراسىندا بولمادى. قازىرگى ۋاقىتتا دانەليا اقش-تا تۇرادى, سوندا وقيدى. ءارى قاراي مۋزىكالىق مانسابىن جالعاستىرۋدى جوسپارلاپ ءجۇر.