قازاق ءبىلىمى مەن عىلىمىنىڭ كيەلى ورداسى – ءال-فارابي اتىنداعى قازاق ۇلتتىق ۋنيۆەرسيتەتىنىڭ شاڭىراق كوتەرگەنىنە بيىل 80 جىل تولدى.سونىمەن بىرگە قوعامدىق ساناعا اقپارات تاراتۋ ارقىلى قوزعاۋ سالۋ ونەرىنە ۇيرەتەتىن, ياعني جۋرناليستىك ماماندىققا ماشىقتاندىراتىن فاكۋلتەتتىڭ دە قازاق توپىراعىندا ىرگەتاسى قالانعانىنا 80 جىل بولدى.
قوس مەرەيلى تويعا ارنالعان «ۇلت سوزگەرلەرى ۇشقان ۇيا» اتتى كىتاپتا وسى جىلداردا جۋرناليستيكا فاكۋلتەتىندە ءبىلىم العان بارلىق تۇلەك ءتىزىمى ءتۇزىلدى. ەگەر اراسىندا ءبىرلى-جارىم ادامنىڭ اتى كىرمەي قالماسا, مۇمكىندىگىنشە تولىق قامتىلعان بۇل تىزبە بويىنشا فاكۋلتەتىمىزدە كەشەگى 2013 جىلعا دەيىن 9952 شاكىرت تاربيەلەنىپتى. وسى تۇلەكتەر اراسىنان ۇلت رۋحانياتىنا, مەملەكەتىمىزدىڭ مۇددەسىنە ەرەكشە ەڭبەك سىڭىرگەن, جۋرناليستيكا سالاسىندا ءىزى بار, اتى ۇرپاق جادىندا جاڭعىرعان تۇلعالاردىڭ فوتوبەينەسىن, ءومىربايانىن, ول تۋرالى ەستەلىكتەر, فاكۋلتەت ومىرىندەگى ستۋدەنت پەن ستۋدەنت نەمەسە ستۋدەنت پەن ۇستاز اراسىنداعى قىزىقتى دا تاعىلىمدى ساتتەر, سونىمەن قاتار, تاريحي قۇجاتتار مەن فوتوايعاقتار دا بەرىلدى. ولاردىڭ ءبارى حرونولوگيالىق تارتىپپەن كىتاپ ماكەتى بويىنشا قالىپتالدى. بەتتەلدى.
وقىرمانعا مەڭزەۋ رەتىندە ايتارىمىز – جيناق حالىقارالىق ستاندارتتار بويىنشا شىعارىلعان ەنتسيكلوپەديا ەمەس, انىقتامالىققا دا جاتپايدى. زەرتتەۋ ەڭبەك شارتتارىنا دا كەلمەيدى. بۇل فاكۋلتەتىمىزدىڭ 80 جىلدىق مەرەيتويىنا ارنالعان, جوعارىدا اتالعان باسىلىمدارعا ءتان ەرەكشەلىكتەر توعىسقان مەرەيتويلىق جيناق. بۇل – فاكۋلتەتىمىزدىڭ شەجىرە-كىتابى. ەگەر وقىرمان تاراپىنان ۇسىنىستار مەن تىلەكتەر ءتۇسىپ جاتسا, الداعى مەرەيتويعا ارنالعان ۇجىمدىق ەڭبەكتە ەسكەرۋگە دايىنبىز.
كىتاپتىڭ اتىنا سوڭعى كەزدە اقپارات قۇرالدارىندا ايتىلىپ ءجۇرگەن «سوزگەر» دەگەن جاڭا اتاۋ قولدانىلدى. بۇل اتاۋ «ءسوز زەرگەرلەرى» دەگەن تىركەستەن تۋىنداعان, شاماسى. فاكۋلتەتتە قازىر جۋرناليستيكا مامانى عانا دايارلانبايدى. مۇندا باسپاگەرلەر دە, قوعاممەن بايلانىس ماماندارى دا, باق بەزەنشىلەرى دە, وسى سالالاردىڭ بولاشاق عالىمدارى مەن ۇستازدارى دا ءبىلىم الادى. ولاردىڭ ءبارى دە ءسوز يەلەرى. سوندىقتان, بارىنە ورتاق اتاۋ رەتىندە «سوزگەر» تەرمينى قولايلى بولدى.
كىتاپتى باسپاعا دايىنداعان «قۇزىرەتتى باسپاگەر» ورتالىعى. جالپى رەداكتسياسىن باسقارعان – فيلولوگيا عىلىمدارىنىڭ دوكتورى, پروفەسسور ءومىرحان ءابديمان ۇلى; بەزەندىرگەن قويشىبەك مۇباراك; تۇلەكتەر ءتىزىمىن تۇزگەندەر: ر.جاقسىلىقباەۆا, ن.داناەۆا; كىتاپتى الامىن دەۋشىلەر جۋرناليستيكا فاكۋلتەتىنىڭ «قۇزىرەتتى باسپاگەر» ورتالىعىنا حابارلاسۋىنا بولادى.
ساعاتبەك مەدەۋبەك ۇلى,
ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ كافەدرا مەڭگەرۋشىسى, فيلولوگيا عىلىمدارىنىڭ كانديداتى.
الماتى.