ورتالىق كوممۋنيكاتسيالار قىزمەتىندەگى كەزەكتى بريفينگتىڭ ءبىرى استانا كۇنى قارساڭىندا جانە مەرەكە كۇنى وتكىزىلەتىن مادەني ءىس-شارالاردىڭ باعدارلاماسىن تانىستىرۋعا ارنالدى. بۇل جونىندە استانا قالالىق ىشكى ساياسات باسقارماسىنىڭ باسشىسى بولات تىلەپوۆ, استانا قالالىق مادەنيەت باسقارماسىنىڭ باسشىسى بولات ماجاعۇلوۆ, س. سەيفۋللين اتىنداعى مۋزەيدىڭ ديرەكتورى نەسىپبەك ايت ۇلى جانە ق. قۋانىشباەۆ اتىنداعى مۋزىكالىق دراما تەاترىنىڭ رەجيسسەرى بولات ۇزاقوۆ ايتىپ بەردى. 6 شىلدەدە ەلىمىزدىڭ ايتۋلى مەملەكەتتىك مەرەكەلەرىنىڭ ءبىرى – استانا كۇنى اتاپ وتىلەدى. استانا ەلىمىزدىڭ ەلورداسى عانا ەمەس, ول تاۋەلسىز مەملەكەتىمىزدىڭ ۇلتتىق يدەياسىنىڭ ەڭ باستى تۇعىرلارىنىڭ ءبىرى بولىپ تابىلادى. سوندىقتان ەلوردانىڭ تاريحي قالىپتاسۋىنان بۇرىن, باس قالانىڭ ەل دامۋىنداعى ورنى جانە مەملەكەتتىڭ ءبىرتۇتاس بولۋىنداعى ءرولى ايتىلادى. «بۇل جولى جىلدا كوپشىلىك كوڭىلىنەن شىعىپ جۇرگەن ءداستۇرلى شارالاردان بولەك, باعىتى جاڭا, مازمۇنى تىڭ مەرەكەلىك باستامالار دا بار, – دەدى ب.تىلەپوۆ. – ەڭ باستىسى, استانالىقتار مەن قالا مەيماندارىنا مەرەكەلىك كوڭىل كۇي سىيلاۋمەن قاتار, بارشا وتانداستارىمىزدى استانانىڭ دامۋىمەن ماقتانىپ, مارقايتاتىن شارالار بولماق». ۇيىمداستىرىلاتىن جانە وتكىزىلەتىن مادەني ءىس-شارالاردىڭ جالپى سانى جەتپىستى قۇرايدى. ونىڭ ىشىندە باستى نازار قالا كوشەلەرى مەن الاڭدارىندا, ساياباقتار مەن گۇلزارلاردا وتەتىن شارالارعا اۋدارىلىپ وتىر. سەبەبى, جۇرگىزىلگەن ساۋالداما بويىنشا, وسىنداي بۇقارالىق سيپاتقا يە جالپىحالىقتىق شارالار كوپشىلىك كوڭىلىنەن شىعاتىندىعىن كورسەتكەن. سونىمەن بىرگە, رەسپۋبليكالىق دەڭگەيدەگى اۋقىمدى ءىس-شارالار دا ەرەكشە نازاردا ۇستالادى. بۇل نەگىزىنەن يدەولوگيالىق قاعيداتتى ساقتاۋ تۇرعىسىنان الىنىپ وتىر. ونداعى ماقسات – مەرەكە كۇنىندە ەلوردا اينالاسىنا وتانداستارىمىزدى ۇيىستىرۋ. قالالىق ىشكى ساياسات باسقارماسىنىڭ باسشىسى سول ءىس-شارالاردىڭ بىرقاتارىن اتاپ ءوتتى. مىسالى, «ايالاعان استانا» اتتى بالالاردىڭ رەسپۋبليكالىق ونەر بايقاۋى ەلىمىزدىڭ تۇكپىر-تۇكپىرىندەگى دارىندى بالالاردىڭ باسىن قوسىپ, ولاردىڭ تالانتىن اشۋعا كومەكتەسەدى. سونداي-اق, جىل سايىن ۇيىمداستىرىلاتىن تەاتر فەستيۆالى بۇل جولى دا شىمىلدىعىن اشاتىن بولادى. فەستيۆال اياسىندا ەلىمىزدەگى تەاتر ۇجىمدارىمەن قاتار, شەتەلدىك تەاتر مايتالماندارى دا وزدەرىنىڭ قويىلىمدارىن ۇسىنادى. استانالىقتار مەن قالا مەيماندارى «ماڭگىلىك ەل» جىر ءمۇشايراسىن دا تاماشالايدى. «ونىڭ باستى تاقىرىبى – مەملەكەت باسشىسى ساياساتىنىڭ ستراتەگيالىق باعىتى جانە «ماڭگىلىك ەل» ۇلتتىق يدەياسىنىڭ ورىندالۋىنداعى استانانىڭ ءرولى مەن ماڭىزى بولماق», – دەدى ب.تىلەپوۆ. استانا قالالىق مادەنيەت باسقارماسىنىڭ باسشىسى ب.ماجاعۇلوۆ مەرەكەلىك ءىس-شارالار باعدارلاماسىنىڭ اۋقىمدىلىعىن ايتا كەلىپ, استانا كۇنى مەرەكەسى قانشا كۇندى قامتيتىندىعىنا توقتالدى. «مەرەكەلىك مادەني شارالار 20 ماۋسىمدا باستالىپ, 4 شىلدەگە دەيىن قارقىن الادى, – دەدى ول وسى جونىندە. – ءارى قاراي, ياعني 5, 6 جانە 7 شىلدەدە مەرەكەلىك شارالار نەگىزگى مادەني-رۋحاني, سپورتتىق جانە ويىن-ساۋىق شارالارىمەن جالعاسىن تابادى. ولار بىرنەشە بلوكقا بولىنگەن. ءبىرىنشى – رەسپۋبليكالىق اۋقىمداعى مەرەكەلىك شارالار. بۇعان «ايالاعان استانا» رەسپۋبليكالىق تەلەۆيزيالىق بالالار بايقاۋىن, «ماڭگىلىك ەل» ءمۇشايراسىن, تەاتر فەستيۆالىن قوسۋعا بولادى». استانا كۇنىن مەرەكەلەۋدە, سونداي-اق, «قازاق ەلى» مونۋمەنتى الاڭىندا «شۋاقتى قالا» كونتسەرتتىك باعدارلاماسى دا ۇيىمداستىرىلماق. ونى تاماشالاۋعا شەكتەۋ قويىلمايدى, حالىقتىڭ ەركىن قوزعالۋىنا جاعداي قاراستىرىلعان. مۇنداي مادەني شارالار قالانىڭ وزگە دە الاڭدارىندا ۇيىمداستىرىلادى. ن.ايت ۇلى مەرەكە اياسىندا «ماڭگىلىك ەل» – ۇلت مۇراتى» تاقىرىبىمەن جاريالانعان جىر بايگەسى جونىنەن حاباردار ەتتى. اقىننىڭ اتاپ وتۋىنشە, جىر ءمۇشايراسىنا قىتاي مەن موڭعوليادا تۇراتىن قانداستارىمىزدى قوسقاندا, 60-تان استام شىعارما كەلىپ تۇسكەن. «بيىلعى جىلعى ءمۇشايرانىڭ ءبىر ەرەكشەلىگى, جىر بايگەسىنە جاستار كوپ قاتىستى, – دەدى ن.ايت ۇلى. – اقىندارىمىز «ماڭگىلىك ەل» تاقىرىبىن تاماشا جىرلادى. ويتكەنى, بۇل تاقىرىپ ءبىزدىڭ اتا-بابالارىمىزدىڭ عانا ارمانى ەمەس, ول بارلىعىمىزدىڭ كوپتەن كۇتكەن ارمانىمىز. ءبىزدىڭ اقىندارىمىز وزدەرىنىڭ پوەزياسى ارقىلى استانانىڭ شەجىرەسىن جاساپ جاتىر». ن.ايت ۇلىنىڭ سوزىنە قاراعاندا, 15 اقىنعا جۇلدە تاعايىندالىپتى. ونىڭ سىرتىندا دەمەۋشىلەر تاعايىنداعان قوسىمشا جۇلدەلەر دە بار ەكەن. جەڭىمپازدار مەن جۇلدەگەرلەر 1 شىلدە كۇنى «كونگرەسس-حولل» سارايىنداعى ونەر شەبەرلەرىنىڭ قاتىسۋىمەن وتەتىن مەرەكەلىك كەشتە جاريا ەتىلەدى ەكەن. ال ب.ۇزاقوۆ تەاتر فەستيۆالى جونىندە ايتىپ بەردى. رەجيسسەردىڭ اتاپ وتۋىنشە, بيىلعى تەاتر فەستيۆالىنىڭ اياسى بىلتىرعىعا قاراعاندا ءبىرشاما كەڭەيە تۇسكەن. «فەستيۆالعا تۇركيا مەن رەسەيدەن ءبىر-بىردەن تەاتر ۇجىمدارىن شاقىرىپ وتىرمىز, – دەدى ول. – ونداعى ماقساتىمىز – ەڭسەلى ەلوردامىزدى تەاتر فەستيۆالىنىڭ ورداسى ەتسەك دەگەن وي. استانادا ءتۇرلى تاقىرىپتاعى حالىقارالىق مادەني شارالار ءوتىپ كەلەدى. فەستيۆالعا كەلەتىن ونەر ۇجىمدارىن الدىن الا تاڭداپ, ىرىكتەپ الدىق. ويتكەنى, تەاترلار ساحنالايتىن قويىلىمداردان كوپشىلىك وزدەرىنە رۋحاني ازىق الۋى ءتيىس. وسى جاعىنا باسا ءمان بەردىك. ال فەستيۆالعا 13 تەاتر ۇجىمى شاقىرىلدى. العاشقى قويىلىم 1 شىلدەدە شىمىلدىعىن اشادى». ءاليسۇلتان قۇلانباي, «ەگەمەن قازاقستان».