ەلوردا كاسىپورىندارىندا جىل سايىن ءوندىرىس پەن ەكسپورت كولەمى ءوسىپ كەلەدى. «Astana Invest» ارنايى ەكونوميكالىق ايماقتاردى دامىتۋ دەپارتامەنتىنىڭ ديرەكتورى ديار اسقاروۆ ونلاين-بريفينگتە ونەركاسىپ ورىندارىنىڭ دامۋى تۋرالى ايتىپ بەردى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
وتكەن جىلى استانادا ونەركاسىپ ءوندىرىسىنىڭ كولەمى 101,7% ناقتى كولەم يندەكسىمەن 1,9 ترلن تەڭگەگە دەيىن ءوستى. وڭدەۋ ونەركاسىبىندە 101,2%-بەن 1,7 ترلن تەڭگەگە ءونىم ءوندىرىلدى. ال ەلوردا ونەركاسىبىنىڭ جالپى كولەمىنىڭ 91% قۇرايدى. ەلەكترمەن جابدىقتاۋ, گاز, بۋ جانە اۋا باپتاۋ كاسىپورىندارى - 7,6%, سۋمەن جابدىقتاۋ, كارىز جۇيەسى, قالدىقتاردى جيناۋ مەن ءبولۋدى باقىلاۋ - 1,3% قۇرايدى.
ەلورداداعى وڭدەۋ ونەركاسىبىنىڭ نەگىزگى سالالارىنىڭ قاتارىنا مەتاللۋرگيا, ماشينا جاساۋ, سۋسىندار, رەزەڭكە, پلاستماسسا, وزگە دە مەتالل ەمەس مينەرالدىق ونىمدەر, تاماق ونىمدەرى جاتادى.
«2025 جىلعا دەيىن قالانىڭ جالپى وڭىرلىك ءونىمىن 10%-عا دەيىن ۇلعايتۋ جوسپارلانىپ وتىر. بۇگىنگى تاڭدا وسى جىلدىڭ 1 جارتىجىلدىعىندا قالانىڭ ءجوو-دەگى وڭدەۋ ونەركاسىبىنىڭ ۇلەسى 9,4%-ى قۇرادى. ەلوردانىڭ وڭدەۋ ونەركاسىبى ەكسپورتىنىڭ كولەمى 2022 جىلدىڭ قاڭتار-تامىزىندا 1,7 ملرد اقش دوللارىن قۇرادى جانە وتكەن جىلدىڭ سايكەس كەزەڭىمەن سالىستىرعاندا 2,5 ەسە ءوستى», دەدى ديار اسقاروۆ.