كەشە ءتۇن ورتاسى اۋا اياقتالعان گەرمانيا – پورتۋگاليا ماتچىنىڭ قورىتىندىسى سودان بەرى ماماندار مەن جانكۇيەرلەردىڭ اۋىزدارىنان تۇسپەي تۇر. وسىندا «نەمىس ماشينەسى» كورسەتكەن ويلى دا ويناقى ويىننان كەيىن چەمپيوندىققا تالاس جونىندەگى پىكىر دە وزگەرە باستاعان سياقتى. ايتكەنمەن, مۇندا ءالى وزگەرمەي تۇرعان ءبىر نارسە بار. ول – دوپ دوداسىنداعى ويىنداردىڭ ءبارىنىڭ ىمىراسىز قالىپتا بارىنشا تارتىستى ءوتىپ جاتقانى. سالىستىرمالى تۇردە سىپايىلاۋ ءوتىپ, جاھاندىق جارىستاعى ءبىرىنشى تەڭ ناتيجەنى اكەلگەن يران – نيگەريا ماتچىنان كەيىن دە فۋتبول فاناتتارىنىڭ بۇل تۋراسىنداعى كوزقاراستارىنا سىزات تۇسكەن جوق.
ايتسا ايتقانداي, تالاي سىننان وتكەن «نەمىس ماشينەسى» شەشۋشى شاقتاردا ءاردايىم ءتاستۇيىن قالىپقا ءتۇسىپ, ىڭعايى كەلىپ جاتسا, الدىنا كەلگەن كىم-كىمدى دە تاپتاپ وتە شىعاتىنىن وسى جولى تاعى دا انىق تانىتتى. ونىڭ ديىرمەنىنە ءتۇسىپ كەتكەن كريشتيانۋ رونالدۋ مەن ونىڭ ارىپتەستەرى ءۇشىن بۇل بارىنشا ءساتسىز كۇن بولدى.
كەزدەسۋدىڭ باسىن «بۋندەستيم» ءوز اكتيۆىنە جازدى. بۇكىل الاڭنىڭ بيلىگىن بىردەن ءوز قولىنا العان گەرمانيا قۇراماسى بىرنەشە شابۋىل ۇيىمداستىرىپ ۇلگەردى. ولاردىڭ بىرىندە ءتىپتى, بۇرىشتامادان دوپ تا بەردى. بۇدان كەيىن پورتۋگالدار العا ۇمتىلدى. وسى شابۋىلدىڭ وتىندە جۇرگەن رونالدۋ بىرەر سوققى جاساپ تا كوردى. بۇدان ءارى ەكى جاقتىڭ الما-كەزەك شابۋىلىنا كەزەك كەلدى. سونىڭ ءبىر ساتىندە پورتۋگال قاقپاشىسى رۋي پاتريسيۋ ءوز قاقپاسىنا دوپ كىرىپ كەتۋىنە سەبەپشى بولا جازدادى. ونىڭ لاقتىرعان دوبى تاياۋ ماڭداعى حەديرەنىڭ اياعىنا بارىپ سارت ەتتى. ونى العان سامي بىردەن احۋالدى پايىمداپ, داربازاعا قاراي زاۋلداتتى. قۇداي ساقتاعاندا, ونىڭ اتقان دوبى باعاننىڭ ءدال جانىنان زۋ ەتە ءتۇستى. بىراق بۇل ساتتىلىك ەكى مينۋتقا عانا سوزىلدى. سونىڭ ارتىنشا ايىپ الاڭىنا كىرگەن گەتتسەنى جواۋ پەرەيرا جەرگە الا جىعىلدى. سەرب تورەشىسى ميلوراد ماجيچ ويلانباستان 11 مەترلىك نۇكتەنى كورسەتتى. ونى توماس ميۋللەر مۇلتىكسىز ورىندادى – 1:0.
تايمنىڭ ورتاسى اۋا گەرمانيالىقتار قارقىندى ەپتەپ باسەڭدەتتى. وسىنى پايدالانعان قارسى جاق تىزگىندى ءوز قولدارىنا الا باستادى. الايدا, ولاردى قاقپاعا تىكەلەي سوققى جاساپ, قاۋىپ شاقىراتىن وتكىرلىك جەتىسپەي جاتتى. «ەۋروپالىق برازيليالىقتار» كوبىنە الاڭ ورتاسىمەن شاپقىلاۋمەن بولدى. مۇنداي سىلبىر ويىندى بايقاعان نەمىستەر ءبىر كەزدە تاعى دا قاۋىرت قيمىلعا ەرىك بەردى. الدىمەن توني كرووس الاڭنىڭ تۇكپىر جاعىنان قارسىلاستار ايىپ الاڭىنداعى مەسۋت وزيلگە كەرەمەت پاس جەتكىزدى. ال وزيل ارىپتەستەرى جەتۋىن كۇتىپ تۇردى دا, جۇگىرىپ جەتكەن گەتتسەنىڭ الدىنا دوپتى كولبەي تاستاي سالدى. بىراق ونىڭ الدىنان شىعا كەلگەن پەرەيراعا تيگەن دوپ ارتقى اۋتقا كەتتى. وسىدان كەيىن بەرىلگەن بۇرىشتاما «بۋندەستيم» ءۇشىن كەزەكتى گولمەن اياقتالدى. بۇرىشتان كرووس جونەلتكەن دوپقا ماتس حۋممەلس بۇرىن جەتىپ, باسىمەن سولق ەتكىزدى. گول! ماتچتىڭ 32-مينۋتىندا ەسەپ وسىلاي 2:0-گە جەتتى. ال ءۇزىلىستىڭ ءدال الدىندا يواحيم ءليوۆتىڭ شاكىرتتەرى ءۇشىنشى گولدى دا ءتۇسىرىپ, كەزدەسۋدىڭ قورىتىندىسىن تولىق شىعارىپ قويعانداي بولدى.
كەزدەسۋدىڭ ەكىنشى بولىگىندە ويىننىڭ كورىنىسى كوپ وزگەرگەن جوق. ال بۇدان دا كۇيرەي جەڭىلۋى مۇمكىن ەكەنىن سەزگەن پاۋلۋ بەنتۋ بۇل كەزەڭدە قورعانىستى كۇشەيتە تۇسۋگە كۇش سالدى. نەمىستەر بولسا, بۇرىنعىسىنشا العا ورشەلەنە ۇمتىلۋدى قويدى. ويىن سوڭعى ءتورتىنشى گول سوعىلعانعا دەيىن وسىنداي ىرعاقپەن ءجۇرىپ جاتتى. اقىرىندا, 78-مينۋتتا كرووستىڭ وڭ قاپتالعا اسىرعان دوبى كەزەكتى گولدىڭ نەگىزى بولدى. ول جاقتاعى شيۋررلە دوپتى سوسىن جەرلەتىپ قاقپاشى الاڭىنا جەتكىزدى. ونى پاتريسيۋ كەرى تەۋىپ قايتاردى. مىنە, سول قايتقان دوپ ميۋللەردىڭ اياعىنا توپ ەتە ءتۇستى. گول!
بۇدان كەيىن كۋريتيبا قالاسىندا F توبىنداعى يران جانە نيگەريا قۇرامالارى الاڭعا شىقتى. مۇنىڭ الدىنداعى گولعا دا, وقيعاعا دا باي ويىندارعا قاراعاندا, ەكى جاق تا بارىنشا ساقتىققا دەن قويعان بۇل كەزدەسۋ كوڭىلسىزدەۋ كورىندى. ءاۋ باسىندا بۇل شايقاستاعى جەڭىستىڭ قۇنى وتە جوعارى سانالعان. ول جەڭگەن كوماندانى ەكىنشى ورىنعا شىعۋعا مۇمكىندىك اپەرەدى دەپ ەسەپتەلدى. سەبەبى, ءبىرىنشى ورىننىڭ ارگەنتيناعا بۇيىراتىنىنا ەشكىم شەك كەلتىرە قويماعان. ناتيجەسىندە ەشبىر گول سوعىلماعان تەڭ ويىنعا كەزەك كەلدى. ال مۇنىڭ ءوزى ەندى بوسنيا ءۇشىن تاپتىرماس كورسەتكىش بولىپ تابىلادى.
كەزدەسۋ نەگىزىنەن نيگەريا قۇراماسىنىڭ باسىمدىلىعىمەن ءوتتى. سوعان قاراماستان, ونىڭ شابۋىلشىلارى قارسى جاق بەتكە اسا كوپ بارا المادى. بۇعان يراندىقتار قورعانىس شەبىنىڭ وتە مۇقيات ويناعانى مۇمكىندىك بەرمەدى. دەگەنمەن, ۇزىلىسكە دەيىن افريكالىقتار ساپىنداعى ۆيكتور موزەس ەكى رەت ەسەپ اشاتىن ساتتەردى پايدالانا المادى.
ۇزىلىستەن كەيىن موزەستىڭ تاعى ءبىر سوققىسىن پارسى قاقپاشىسى اليرەزا حاگيگي قايتارىپ ۇلگەردى. مۇنداي ءساتتى كارلۋش كەيرۋشتىڭ شاكىرتتەرى دە جىبەرىپ الدى. ايتالىق, رەزا گووحاننەياد ۇرعان سوققىدان ءوز قاقپاسىن گولكيپەر ۆينسەنت ەنەاما قورعاپ قالدى. دەگەنمەن, ويىننىڭ بۇل بولىگى الدىڭعىعا قاراعاندا دا, مامىراقان قالىپتا ءوتتى. سوندىقتان وندا ەسەپ اشىلماۋىن زاڭدىلىق دەپ قابىلداعانىمىز ءجون شىعار.
كەشە تاڭ الدىندا ناتال قالاسىندا چەمپيوناتتىڭ G توبىنداعى گانا جانە اقش قۇرامالارى ءوزارا كەزدەستى. تارتىستى وتكەن ويىن 2:1 ەسەبىمەن امەريكالىقتاردىڭ پايداسىنا شەشىلدى. امەريكا قۇراماسى وسىندا كەلگەن ءوزىنىڭ كوپ ساندى جانكۇيەرلەرىنىڭ كوڭىلدەرىنەن شىعا ءبىلدى. ول بىرىنشىلىكتەگى ءبىرىنشى كەزدەسۋىندە گانادان كەلگەن «قارا جۇلدىزداردىڭ» اپتىعىن ويلى ويىندارىمەن باستى. وندا امەريكالىقتار چەمپيوناتتاعى ەڭ تەز گولدى دا سوقتى. ونى 1-مينۋتتا كلينت دەمپسي ايىپ الاڭىنىڭ سىرتىندا تۇرىپ, ۇرىپ ءتۇسىردى.
افريكالىقتار ءبىرىنشى تايمدا دوپقا كوبىرەك يەلىك ەتتى. الايدا, ودان تيم حوۆارد قورعاعان قاقپاعا ناقتى قاۋىپ تونەتىن ءساتتى كوپ ۇيىمداستىرا المادى. ەكىنشى تايمدا گانا قۇراماسى ويىنشىلارىنىڭ بەلسەندىلىكتى كۇرت ارتتىرا تۇسۋىمەن جاعداي دا كۇرت وزگەرىپ كەتتى. ۇزاققا سوزىلعان بۇل شابۋىل 82-مينۋتتا اندرە ايۋدىڭ ەسەپتى تەڭەستىرۋىمەن اياقتالدى. ەندى قيسىن بويىنشا وسىعان جىگەرلەنگەن افريكا فۋتبولشىلارى مۇنى جەڭىستى نۇكتەگە دەيىن جەتكىزۋگە ءتيىستى ەدى. بىراق سوڭعى ساتتەردە شالتتىق تانىتقان امەريكالىقتار ولاردىڭ الدىن وراپ كەتتى. ولار 86-مينۋتتا كەزەكتى بۇرىشتاما دوبىن ورىنداۋ كەزىندە العا شىقتى. دوپتى ايىپ الاڭىنا قاراي گرەم زۋسي اۋەلەتە جەتكىزدى. وعان بۇرىن جەتكەن دجون برۋكس قاقپاعا باسپەن ۇرىپ كىرگىزدى.
كەشە تۇندە بەلگيا – الجير, برازيليا – مەكسيكا قۇرامالارى كەزدەستى. ال تاڭ الدىندا رەسەي – وڭتۇستىك كورەيا كوماندالارى جاسىل الاڭعا شىقتى.
سەرىك ءپىرنازار,
«ەگەمەن قازاقستان».