ماقتاارال اۋدانىنداعى باۋىرجان مومىش ۇلى اتىنداعى №6 مەكتەپ-گيمنازيانىڭ اتى دۇركىرەپ تۇر. بۇل وقۋ ورنىن ماقتاارالدىڭ التىن مەكتەبى دەسە دە ابدەن جاراسادى.
2010-2011 وقۋ جىلىندا ۇبت-نىڭ ورتاشا كورسەتكىشى – 108,87, 2011-2012 وقۋ جىلىندا – 102,4, 2012-2013 وقۋ جىلىندا – 107,64, 2013-2014 وقۋ جىلىندا 113,4 بالل بولدى.
بىلتىر «التىن بەلگىگە» ۇمىتكەر 50 وقۋشىنىڭ 29-ى, بيىل 38 وقۋشىنىڭ 27-ءسى, ياعني 71,5 پايىزى ءۇمىتتى اقتادى!
ۇستىمىزدەگى جىلى ۇبت سىناعىنا مەكتەپ-گيمنازيانى بىتىرەتىن 54 وقۋشى, ياعني 100 پايىزى قاتىستى. جوعارىدا كەلتىرگەنىمىزدەي, 27 تۇلەك «التىن بەلگى» الدى. ۇزدىك اتتەستاتقا ۇمىتكەر 15 وقۋشىنىڭ ءبارى دە تۇگەلدەي سەنىمدى اقتاپ شىقتى.
بيىلعى 54 تۇلەكتىڭ 42-ءسى بارلىق ءپاندى تەك «5» دەگەن باعاعا تاپسىردى.
ماقتاارالدىڭ ب.مومىش ۇلى اتىنداعى مەكتەپ-گيمنازياسىندا ماقتانارلىق كورسەتكىش كوپ. ا.بەكمانوۆا, ە.ۆەگنەر, ن.ءجۇنىسوۆا, ك.ساحيەۆا جەتەكشىلىك ەتەتىن سىنىپتاردان كوپتەگەن وقۋشىلار ەڭ جوعارى كورسەتكىشتەرگە يە بولدى. نۇرلان ەرتاەۆ, ءاسيا ايكەنجە, نۇرلان نوكەربەك─123 بالل, ديانا توكامان, ماليكا باباش, داۋلەت ءازىم – 121 بالل, قورلان سەرىك, ايسۇلۋ ەركىن 120 بالل الدى. سونداي-اق, 30 وقۋشى 111-119, 15 وقۋشى 100-110 ارالىعىندا بالل جينادى.
باۋىرجان مومىش ۇلى اتىنداعى مەكتەپ-گيمنازيانى كوپ جىلدان بەرى ىزدەنىمپاز, جاڭاشىل ۇستاز ءومىرحان قوزىباق باسقارادى. شيرەك عاسىرلىق مۇعالىمدىك ءتاجىريبەسى بار ديرەكتورعا قازىر بۇكىل وڭتۇستىك ءوڭىرى قىزىعادى. مەكتەپ مۇعالىمدەرى دە, شاكىرتتەرى دە وزدەرىن «باۋىرجانشىلدارمىز!» دەيدى. قازاق ەلىنە, تۋعان حالقىنا قالتقىسىز قىزمەت ەتۋ, ناعىز پاتريوت, ابزال ازامات بولماقتى پارىز سانايدى. ۇلتىنىڭ نامىس تۋىنا اينالعان قاھارمان قولباسشى, تەرەڭ ويشىل, جاۋىنگەر جازۋشى مومىش ۇلى مۇراتتارىنا ادال بولۋعا ۇمتىلادى.
«ۇبت سىناعىنا دايىندالۋدا, «التىن بەلگى» مەن ۇزدىك اتتەستاتتى كوبىرەك الۋىمىزدا ەشقانداي قۇپيا, جاسىرىن سىر جوق. قۇپيا دا, سىر دا تەك شىنايى ەڭبەكتە, شىن ىزدەنىستە. باۋىرجان مومىش ۇلى دا شىندىق پەن شىنايىلىقتى, ەرىنۋدى بىلمەس ەڭبەكتى بيىك باعالاعان», دەسەدى ءومىرحان مىرزا جەتەكشىلىك ەتەتىن ۇجىمداعى ۇلاعاتتى ۇستازدار.
مەكتەپىشىلىك باسقارۋ جۇيەسى زاماناۋي زياتتى جولعا قويىلعان. مەكتەپ-گيمنازيا جەتەكشىسىنىڭ تىكەلەي تالاپشىلدىعىمەن 10-11 سىنىپ وقۋشىلارىنان اپتا سايىن بايقاۋ سىناعى الىنادى. تومەن ۇپاي كورسەتكەن شاكىرتتىڭ ارقايسىسىمەن, ولاردىڭ اتا-انالارىمەن سۇحباتتار, ساراپتاما جيىندارى وتكىزىلەدى. سولاردىڭ قورىتىندىلارىنا قاراي جۇمىس جالعاسىن تابادى.
2006-2007 وقۋ جىلىنان بەرى ءار توقسان سايىن جانە جىلدىق «+5» تەستى الىنادى. بۇل جۇيەنىڭ تيىمدىلىگى كوپ. وقۋشىلاردى تەستكە داعدىلاندىرادى جانە ءاربىر ءپان مۇعالىمىنىڭ وقۋ باعدارلاماسىن قانشالىقتى دەڭگەيدە مەڭگەرتە العانىن ايقىندايدى. ءار جىل سايىن ءپان مۇعالىمدەرى جاڭا سۇراقتارمەن تولىقتىرىپ, جاڭا تەست ۆاريانتتارىن كىرىكتىرىپ وتىرادى.
مەكتەپ-گيمنازيانىڭ تاعى ءبىر ەرەكشەلىگى – ماتەماتيكا ءپانىن وقىتۋعا ايرىقشا نازار اۋدارادى. بۇل – تەك وسى پانگە ارتىقشىلىق جاساۋ ەمەس. ماتەماتيكا ارقىلى وزگە ساباقتاردى وقىتۋدىڭ دا ساپاسىن ارتتىرا ءتۇسۋدى ماقسات ەتەدى.
ون بەس مۇعالىم كەمبريدج ءادىس-ءتاسىلى بويىنشا ارنايى دايارلىقتان ءوتىپ كەلىپ, تاجىريبەنى تىندىرىمدى پايدالانۋدا.
مومىش ۇلى مەكتەبىندەگى ءاشىراي مارالوۆا, تامارا قارابالاەۆا, ۆاحيشا يساتاەۆا, كلارا سارىباەۆا, نۇرزادا المەتوۆا, نۇرزيا قونىسوۆا, عازيزا تولەنباەۆا, جاۋقازىن ساۋىتوۆا, ءزاميرا بيىمبەتوۆا, گۇلۆيرا ۋاليەۆا, مايرا جاناەۆا, نۇرگۇل جاقسىباەۆا, اقنۇر وراقباەۆا, اقمارال بەكمانوۆا, باعداگۇل ايازبەكوۆا, مۇحتار بيىمبەتوۆ, ساكەن جۇماقوۆ, تاعى باسقا دا مۇعالىمدەردىڭ جاس ۇرپاققا ءبىلىم مەن تاربيە بەرۋدەگى جالىقپاس, جەمىستى جۇمىستارىن جۇرتشىلىق جوعارى باعالايدى.
مەرەيىڭ ارتا بەرگەي, ماقتاارالدىڭ التىن مەكتەبى!
مارحابات بايعۇت,
«ەگەمەن قازاقستان».
وڭتۇستىك قازاقستان وبلىسى.
سۋرەتتە: وقو اكىمى اسقار مىرزاحمەتوۆ مەكتەپ-گيمنازيادا.