كەشە «نۇر وتان» پارتياسىنىڭ ورتالىق اپپاراتىندا پارتيالىق باقىلاۋ كوميتەتىنىڭ وتىرىسى ءوتتى. وندا پارتيانىڭ قوعامدىق قابىلداۋ بولمەلەرىنەن مەملەكەتتىك ورگاندارعا جولداناتىن ازاماتتاردىڭ وتىنىشتەرىن قاراۋ ماسەلەلەرى تالقىلاندى. وتىرىسقا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك قاتىستى.
جيىنعا توراعالىق ەتكەن «نۇر وتان» پارتياسى پارتيالىق باقىلاۋ كوميتەتىنىڭ توراعاسى, پارلامەنت ءماجىلىسىنىڭ دەپۋتاتى قۋانىش سۇلتانوۆ تالقىلاناتىن ماسەلە ءوزىنىڭ وزەكتىلىگىمەن ەرەكشەلەنەتىنىنە توقتالدى. كوميتەت توراعاسىنىڭ اتاپ وتۋىنشە, ازاماتتاردىڭ ءوتىنىشتەرىن قاراۋ زامان تالابىنا جاۋاپ بەرۋى ءتيىس. بۇل ماسەلەدە بارلىق مەملەكەتتىك ورگاندار مەن قوعامدىق ينستيتۋتتاردىڭ جاۋاپكەرشىلىگى ەرەكشە ءرول اتقارادى. مەملەكەت باسشىسى ءوز جولداۋىندا ەلىمىزدى الەمدەگى اسا دامىعان 30 ەلدىڭ قاتارىنا قوسۋ مىندەتىن قويىپ وتىر. سوندىقتان پارتيا وسى باعىتتا باسەكەلەستىككە قابىلەتتىلىكتىڭ ۇلگىسىن كورسەتۋى قاجەت. «پارتيانىڭ جۇمىسىن جانداندىرۋ ماقساتىندا وتكەن جىلى «ەلەكتروندى پارتيا» جوباسى جۇزەگە اسىرىلا باستادى, – دەدى قۋانىش سۇلتانوۆ. – بۇل ازاماتتاردىڭ وتىنىشتەرىن قاراۋدىڭ اشىقتىعى مەن تيىمدىلىگىن ارتتىرۋعا مۇمكىندىك بەرەدى».
پارتيالىق باقىلاۋ كوميتەتىنىڭ توراعاسى, سونداي-اق, وسى جىلدىڭ ساۋىرىندە وتكەن وتىرىستا كوتەرىلگەن ماسەلەلەردىڭ ناتيجەلەرىنەن دە حاباردار ەتتى. ول پارتيالىق جارنانى ءوز ۋاقىتىندا تولەۋدى ۇيىمداستىرۋعا قاتىستى. وسىعان بايلانىستى پارتيالىق باقىلاۋ كوميتەتى وڭىرلىك باقىلاۋ كوميسسيالارىمەن اتالعان ماسەلە بويىنشا وتىرىستار وتكىزگەن. سونىڭ ناتيجەسىندە وتكەن بەس ايدا پارتيالىق جارنا تولەۋ 100 پايىزعا قامتاماسىز ەتىلدى. پارتيالىق ءتارتىپ نىعايدى. بۇل كوميتەتتىڭ ەڭ باستى ماسەلەسىنىڭ ءبىرى بولىپ تابىلادى.
كۇن تارتىبىندەگى ماسەلە بويىنشا «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءسوز سويلەدى. «نۇر وتان» بيلىك پارتياسى بولعاندىقتان, ءبىز تازا جانە اشىق جۇمىس ىستەۋىمىز كەرەك, – دەدى باۋىرجان بايبەك. – حالىقتىڭ جانە پارتيالاستاردىڭ الدىندا ەسەپتىلىك بولۋى قاجەت. حالىق پەن پارتيا اراسىندا تىكەلەي بايلانىس ورناتىلۋى ءتيىس. بۇگىندە پارتيا 12 جوبانى ىسكە اسىرۋدى قولعا الىپ وتىر. سونىڭ ءبىرى – «كەدەرگىسىز كەلەشەك» جوباسى. اتالعان جوبا مۇمكىندىگى شەكتەۋلى جانداردىڭ الەۋمەتتىك جاعدايىن كوتەرۋگە باعىتتالعان».
مەملەكەت باسشىسى پارتيانىڭ حV سەزىندە سويلەگەن سوزىندە ءححى عاسىرداعى كوشباسشى پارتيا – جالپىحالىقتىق باقىلاۋدىڭ باستى قۇرالى دەپ اتاپ كورسەتكەن ەدى.
«سوندىقتان «نۇر وتان» مەملەكەتتىك ەمەس ۇيىمداردىڭ باسىن قوسا وتىرىپ, حالىقتىڭ مۇڭ-مۇقتاجىن بيلىككە جەتكىزۋلەرى كەرەك, – دەدى پارتيا ءتوراعاسىنىڭ ءبىرىنشى ورىنباسارى. – ال ونىڭ نەگىزگى قۇرالى – پارتيالىق باقىلاۋدى, پارتيالىق جاۋاپكەرشىلىكتى كۇشەيتۋ. سەبەبى, پارتيانىڭ ساياسي دوكتريناسىندا كورسەتىلگەن ازاماتتارعا قىزمەت ەتەتىن مەملەكەت ۇستانىمىنا سايكەس, بۇقارا مەن بيلىك قارىم-قاتىناسىنىڭ مۇلدە جاڭا سيپاتتا, تەك ارىپتەستىك پەن زاڭدى بۇلجىتپاي ورىنداۋ نەگىزىندە قالىپتاستىرۋدى تالاپ ەتەدى. ەگەر الەمدەگى ەڭ دامىعان 30 ەلدىڭ قاتارىنا ەنەمىز دەسەك, ءبىز ارقاشان دا حالىقتىڭ سەنىمىنە يە بولۋىمىز قاجەت».
كوپشىلىكتىڭ «نۇر وتان» پارتياسىنا دەگەن سەنىمى جىل وتكەن سايىن ارتىپ كەلەدى. ءسوز بارىسىندا شەشەن بۇعان ناقتى مالىمەتتەر دە كەلتىردى. باۋىرجان بايبەكتىڭ اتاپ وتكەنىندەي, پارتيا ءتورت نەگىزگى قاعيدات بويىنشا جۇمىس ىستەۋدە. ول – اشىقتىق, تيىمدىلىك, حالىق الدىندا ەسەپتىلىك جانە جاۋاپتىلىق. «نۇر وتان» – ازاماتتىق قوعام سۋبەكتىسى. بۇگىندە پارتيانىڭ 241 قوعامدىق قابىلداۋ ورنى ءتيىمدى جۇمىس ىستەيدى. وتكەن جىلدىڭ وزىندە عانا پارتيانىڭ وسى قابىلداۋ بولمەلەرىنە 800 مىڭ ادام وتىنىشپەن كەلىپتى. ءوتىنىشتەردىڭ 130 مىڭى مەملەكەتتىك ورگانداردىڭ قاراستىرۋىنا جولدانعان. ال 40 پايىزدان استامى جەرگىلىكتى جەرلەردە شەشىمىن تاۋىپتى. «بيىلعى جىلدىڭ بەس ايىندا, – دەدى ول وسى جونىندە, – ازاماتتاردان 200 مىڭ ءوتىنىش ءتۇستى. بۇگىنگى كۇنى ونىڭ 75 پايىزى شەشىلدى, قالعانى قاداعالاۋعا الىندى».
قوعامدىق قابىلداۋ ءبولمەلەرىنىڭ جاڭاشا جۇمىس ىستەۋى ءوز ناتيجەسىن كورسەتىپ وتىر. ءبىرىنشىدەن, ول ءار ءوڭىردىڭ, ءار اۋداننىڭ الەۋمەتتىك-ەكونوميكالىق جاعدايى تۋرالى ناقتى ستاتيستيكا قالىپتاستىرۋعا, ەكىنشىدەن, پارتيانىڭ سايلاۋالدى تۇعىرناماسىن جۇزەگە اسىرۋ مونيتورينگىن جۇرگىزۋگە جانە مەملەكەتتىك, سالالىق باعدارلامالاردىڭ ءتيىمدى ورىندالۋىن باعالاۋعا مۇمكىندىك بەرەدى.
وتىرىستا, سونداي-اق, «نۇر وتان» پارتياسىنىڭ حاتشىسى قۇمار اقساقالوۆتىڭ بايانداماسى, دەنساۋلىق ساقتاۋ مينيسترلىگىنىڭ جاۋاپتى حاتشىسى سەرىكبول مۋسينوۆتىڭ, ءبىلىم جانە عىلىم مينيسترلىگىنىڭ جاۋاپتى حاتشىسى ءاليا عاليموۆانىڭ, الماتى وبلىسىنىڭ اكىمى اڭسار مۇساحانوۆتىڭ, وڭتۇستىك قازاقستان وبلىسىنىڭ اكىمى اسقار مىرزاحمەتوۆتىڭ ەسەپتەرى تىڭدالدى. اتالعان ماسەلە بويىنشا پارتيالىق باقىلاۋ كوميتەتىنىڭ مۇشەلەرى مايرا ايسينا, سەرگەي گروموۆ, يرينا ارونوۆا, ءانۋار ءىلياسوۆا, ساۋىتبەك ابدراحمانوۆ پىكىر ءبىلدىردى.
وتىرىستىڭ قورىتىندىسىندا ازاماتتاردىڭ ءوتىنىشتەرىمەن جۇمىس ىستەۋدىڭ تيىمدىلىگىن ارتتىرۋ جونىندە ۇسىنىمدار جاسالدى.
ءاليسۇلتان قۇلانباي,
«ەگەمەن قازاقستان».