سىرتقى ىستەر ءمينيسترى ەرلان ىدىرىسوۆ تاجىكستان سىرتقى ساياسات مەكەمەسىنىڭ باسشىسى سيرودجيدين اسلوۆتىڭ قازاقستانعا رەسمي ساپارى شەڭبەرىندە ونىمەن كەزدەستى, دەپ حابارلادى قر ءسىم-ءىنىڭ ءباسپاسوز قىزمەتى.
كەلىسسوزدەر بارىسىندا ەكىجاقتى ىنتىماقتاستىقتىڭ قازىرگى جاعدايى مەن بولاشاعى جانە وڭىرلىك ءوزارا ىقپالداستىق پەن حالىقارالىق كۇن ءتارتىبىنىڭ وزەكتى ماسەلەلەرى قاراستىرىلدى.
ە.ىدىرىسوۆ قازاقستان ءۇشىن تاجىكستان ورتالىق ازياداعى ماڭىزدى ساياسي جانە ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. بۇل ورايدا ساۋدا-ەكونوميكالىق قاتىناستاردى تەرەڭدەتۋ ايرىقشا ماڭىزدى. تاراپتار ءۇشىن ەكىجاقتى ىنتىماقتاستىقتىڭ باسىم باعىتتارى كەن ءوندىرۋشى ونەركاسىپ, ءتۇستى مەتاللۋرگيا, ماشينا جاساۋ, ەنەرگەتيكا, جەڭىل ونەركاسىپ, كولىك پەن كوممۋنيكاتسيا, سونىمەن قاتار, اۋىل شارۋاشىلىعى سالالارىندا ءوزارا ىقپالداسۋ بولىپ تابىلادى.
سۇحباتتاستار ىنتىماقتاستىقتىڭ جاڭا نىساندارىن دامىتۋدىڭ باستى تەتىگى – كەزەكتى وتىرىسى بيىل دۋشانبە قالاسىندا وتەتىن ەكونوميكالىق ىنتىماقتاستىق بويىنشا ەكىجاقتى ۇكىمەتارالىق كوميسسيانىڭ قىزمەتىن بەلسەندىلەندىرۋ دەپ بەلگىلەدى.
ەكى ەلدىڭ سىرتقى ساياسات مەكەمەلەرىنىڭ باسشىلارى, سونىمەن قاتار, ورتالىق ازيا ءوڭىرىنىڭ سۋ-ەنەرگەتيكالىق حال-احۋالىن تالقىلادى. «بۇل سالاداعى ىنتىماقتاستىق ءوزارا سەنىمدىلىكتى ارتتىرۋ, اشىقتىق پەن بارلىق ەلدەر مۇددەلەرىن ءوزارا ەسكەرۋدى قامتاماسىز ەتۋ ارقىلى مۇمكىن بولادى دەگەن سەنىمدەمىز», دەپ مالىمدەدى قر ءسىم-ءىنىڭ باسشىسى.
وسىعان بايلانىستى ە.ىدىرىسوۆ ايماقتىق ينتەگراتسيا ۇدەرىسىنىڭ زور ماڭىزىن ەرەكشە اتاپ ءوتتى. «ءبىز ايماقتاعى ينتەگراتسيالىق بايلانىستاردى ىنتالاندىرۋعا تىرىسامىز. ورتالىق ازيا ارقاشان سىرتقى ساياساتىمىزدىڭ باسىم باعىتى بولدى جانە بولىپ قالادى جانە ءبىزدىڭ كۇشىمىز وسى قاتىناستاردى دامىتۋعا باعىتتالادى», – دەدى ول.
ەكى ەلدىڭ سىرتقى ىستەر مينيسترلەرى وڭىرلىك جانە حالىقارالىق ۇيىمدار شەڭبەرىندەگى كوپجاقتى ىنتىماقتاستىق دەڭگەيىنە قاناعات ءبىلدىردى. سونىمەن قاتار, قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن قولداعانى ءۇشىن تاجىك تاراپىنا ريزاشىلىعىن جەتكىزدى.
كەلىسسوزدەردىڭ باستى قورىتىندىسى رەتىندە ەكى ەلدىڭ ساياسي ۇنقاتىسۋىنىڭ نىعايۋىنا مۇمكىندىك بەرەتىن 2014-2015 جىلدارعا ارنالعان ەكى ەل سىرتقى ساياسات مەكەمەلەرى اراسىنداعى ىنتىماقتاستىق جوسپارىنا قول قويىلدى.