پارلامەنت ماجىلىسىندەگى «نۇر وتان» پارتياسىنىڭ فراكتسياسى جانىنداعى ەكونوميكالىق ساياسات جونىندەگى كەڭەس «قازاقستان رەسپۋبليكاسىنداعى ارنايى ەكونوميكالىق ايماقتار قىزمەتىنىڭ تيىمدىلىگى مەن ولاردىڭ جۇمىسىن جاقسارتۋ جولدارى تۋرالى» دەگەن تاقىرىپتا ءماجىلىس توراعاسىنىڭ ورىنباسارى «نۇر وتان» پارتياسى فراكتسياسىنىڭ باسشىسى داريعا نازارباەۆانىڭ قاتىسۋىمەن وتىرىس وتكىزدى.
وتىرىستى ءماجىلىس دەپۋتاتى, «نۇر وتان» پارتياسىنىڭ فراكتسياسى جانىنداعى ەكونوميكالىق ساياسات جونىندەگى كەڭەس توراعاسى مەيرام پىشەمباەۆ جۇرگىزدى.
كەڭەستە يندۋستريا جانە جاڭا تەحنولوگيالار ۆيتسە-ءمينيسترى ە. ساعاديەۆ بايانداما جاسادى.
«بۇگىنگى كۇنى, قازاقستاندا 10 ارنايى ەكونوميكالىق ايماق بار. قازىرگى ۋاقىتتا 6 اەا-ءنىڭ ينفراقۇرىلىمى جالپى دايىن, 4 اەا-ءنىڭ ينفراقۇرىلىم جۇمىسى باستالىپ جاتىر. ونى رەتكە كەلتىرۋ ءۇشىن قارجى بولىنگەن. بۇگىنگە دەيىن اەا-لەردە 85 جوبا ىسكە اسىرىلىپ, 72 جوبا اياقتالۋعا جاقىن. 6000-داي ادام جۇمىسقا ورنالاستى. 300 ملرد. تەڭگەنىڭ ءونىمى شىعارىلعان.
ءار اەا-ءنىڭ ءوز ەرەكشەلىگى بار. وسىعان قاراي, زاڭدارعا قاجەتتى وزگەرىستەر ەنگىزىلۋى قاجەت. وسى ماسەلە بويىنشا مينيسترلىكتە جۇمىس ىستەلىپ جاتىر. قازىرگى تاڭدا ارنايى ەكونوميكالىق ايماقتاردى دامىتۋ ءۇشىن مەملەكەتتىك بيۋدجەتتەن بولىنگەن قاراجاتتىڭ 1 تەڭگەسىنە (75,5 ملرد.تەڭگە – ينفراقۇرىلىم) جەكە ينۆەستيتسيالاردىڭ 3 تەڭگەسى قۇرايدى (228 ملرد.تەڭگە). بۇدان باسقا, بولىنگەن بيۋدجەتتىك قاراجاتتىڭ 60 پايىزى سالىق رەتىندە قايتارىلعان», – دەدى ءوز سوزىندە ۆيتسە-مينيستر.
وتىرىستا «استانا – جاڭا قالا» اەا باسشىسى م.ماسەلوۆ, «Karaganda Invest» باسشىسى ا.ىسقاقوۆتىڭ باياندامالارى تىڭدالدى. سونداي-اق, قازاقستاننىڭ ۇلتتىق كاسىپكەرلەرى پالاتاسى توراعاسىنىڭ ورىنباسارى ر.وشاقباەۆ پەن ارنايى ەكونوميكالىق ايماقتار كاسىپكەرلەرى قاۋىمداستىعىنىڭ توراعاسى ە.شايمەردەنوۆا جارىسسوزگە شىقتى.
باسقوسۋدا ارنايى ەكونوميكالىق ايماقتاردى دامىتۋ ماسەلەلەرى قارالىپ, اەا قىزمەتىنىڭ ناتيجەلىلىگىن ارتتىراتىن جۇمىستى قايتا ەكشەۋ مەن جاڭا جۇمىس تاسىلدەرىن انىقتاۋ بويىنشا ۇسىنىستار تالقىلاندى. تالقىلاۋ قورىتىندىلارى بويىنشا ۇسىنىمدار قابىلداندى, دەپ حابارلادى ءماجىلىستىڭ ءباسپاسوز قىزمەتى.