12 ماۋسىمدا قازاقستان پرەزيدەنتى جانىنداعى شەتەل ينۆەستورلارى كەڭەسىنىڭ بۋرابايدا وتكەن وتىرىسىندا ەلباسى ن.ءا.نازارباەۆ قازاقستاندا 10 ەلدىڭ ازاماتتارى ءۇشىن ۆيزاسىز ءتارتىپ ورناتىلاتىنىن جاريالادى.
قازاقستان ۇكىمەتى 2014 جىلدىڭ 15 شىلدەسىنەن 2015 جىلدىڭ 15 شىلدەسىنە دەيىنگى ارالىقتا اقش, نيدەرلاند, ۇلىبريتانيا, فرانتسيا, گەرمانيا, يتاليا, مالايزيا, بىرىككەن اراب امىرلىكتەرى, كورەيا رەسپۋبليكاسى مەن جاپونيا ازاماتتارى ءۇشىن ۆيزاسىز ءتارتىپ ورناتۋ بويىنشا ءتيىستى شەشىم قابىلدادى.
اتالعان ارالىقتا وسى ون ەلدىڭ ديپلوماتيالىق, قىزمەتتىك, ۇلتتىق تولقۇجاتتارىنا يە ازاماتتارىنا مەملەكەتتىك شەكارانى وتكەننەن باستاپ 15 كۇننىڭ ىشىندە كوپرەتتىك تۇردە قازاقستان رەسپۋبليكاسىنىڭ اۋماعىنا ۆيزاسىز كىرىپ, شىعىپ, ترانزيتپەن وتۋگە مۇمكىندىك بەرىلەدى. جوعارىدا اتالعان ەلدەردىڭ ازاماتتارى قازاقستان رەسپۋبليكاسى اۋماعىندا 15 كۇننەن ارتىق بولاتىنداي دايەكتى قاجەتتىلىك پايدا بولسا, ولار زاڭمەن بەكىتىلگەن ءتارتىپ بويىنشا قازاقستاننىڭ ىشكى ىستەر ورگاندارىندا «ىسكەرلىك» ساناتتاعى جانە قازاقستان سىرتقى ىستەر مينيسترلىگىندە «ينۆەستورلىق» ساناتتاعى تيەسىلى ۆيزالارىن الۋى قاجەت.
2014 جىلى 15 شىلدەدەن 2015 جىلدىڭ 15 شىلدەسىنە دەيىن ۆيزاسىز ءتارتىپتىڭ ورناۋى العاش ەنگىزىلەتىن تاجىريبە بولىپ تابىلادى. بۇل جوبانىڭ ىسكە اسىرىلۋى قورىتىندىلارى بويىنشا قازاقستان ۇكىمەتى ونى جالعاستىرۋ نە توقتاتۋ تۋرالى شەشىمگە كەلەدى.
قازاقستاننىڭ بۇل باستاماسى ەكىجاقتى سەرىكتەستىك قاتىناستاردىڭ نىعايۋىنا, شەتەل ىسكەرلەرى مەن تۋريستەرگە ەلىمىزدە وڭدى جاعداي تۋدىرۋعا باعىتتالعان. جوبا شەڭبەرىندە جوعارىدا اتالعان ەلدەر ازاماتتارى قازاقستانعا ۆيزاسىز كەلىپ, تاريحي, تۋريستىك جانە تابيعي نازار اۋدارارلىق ورىندارىن ءوز كوزدەرىمەن كورىپ, قازاقستان مادەنيەتىمەن جاقىنىراق تانىسىپ, بيزنەس بايلانىستار ورناتا الادى.
«بۇل – وزگە مەملەكەتتەرمەن ىنتىماقتاستىقتى جەڭىلدەتۋگە, ينۆەستيتسيالاردى تارتۋعا جانە استاناداعى ەكسپو-2017 حالىقارالىق مامانداندىرىلعان كورمەسىنىڭ قارساڭىندا حالىقارالىق قاتىناسقا جاعداي جاساۋعا باعىتتالعان ەلىمىزدىڭ ەرەكشە قادامى», دەپ قازاقستاندا اككرەديتتەلگەن شەتەل ەلشىلەرىمەن جانە كونسۋلدارىمەن كەزدەسۋىندە قازاقستان رەسپۋبليكاسى سىرتقى ىستەر مينيسترىنىڭ ءبىرىنشى ورىنباسارى – ەكسپو-2017-ءنىڭ ۇلتتىق كوميسسارى ءراپىل جوشىباەۆ مالىمدەدى.
سونىمەن قاتار, قازاقستان ۆيزاسىز ءتارتىپتى ءبىر جاقتى ورناتىپ, جوعارىدا اتالعان جانە وزگە دە مۇددەلى ەلدەرمەن ەلىمىزدىڭ ازاماتتارى ءۇشىن ۆيزالىق تالاپتاردى جەڭىلدەتۋ بويىنشا كەلىسسوزدەردى بەلسەندىلەندىرە تۇسەدى.
«بولاشاقتا, ۆيزاسىز ەلدەر ءتىزىمىن كەڭەيتكەن كەزدە, قازاقستان ءاربىر ەلگە كىرەردەگى ۆيزا الۋ ءۇردىسىنىڭ قانشالىقتى قيىن بولاتىندىعىنا ەرەكشە نازار اۋدارىپ, قازاقستان ازاماتتارىنا ۆيزا الۋ ءۇشىن وڭدى جاعداي جاسايتىن ەلدەر ءۇشىن ۆيزالىق ءتارتىپتى الىپ تاستايتىن بولادى», دەپ اتاپ ءوتتى ر.جوشىباەۆ.
«ەگەمەن-اقپارات».