استانا. 15 ماۋسىم. بۇگىن تاڭ الدىندا ماناۋس قالاسىندا چەمپيوناتتىڭ D توبىنداعى انگليا جانە يتاليا قۇرامالارى ءوزارا ۇشىراستى. تارتىستى وتكەن ويىن 2:1 ەسەبىمەن يتاليانداردىڭ پايداسىنا شەشىلدى. بۇل تۋرالى egemen.kz حابارلادى.
كۇش-قۋاتتارى شامالاس كوماندالاردىڭ اراسىندا تاجىريبەسى كوپتەۋى جانە شەبەرلىگى ءبىرشاما ووعارىسى باسىم ءتۇستى. بىلايىنشا, اعىلشىندار دا قارسى قاقپا الدىنداعى قاۋىپتى ساتتەردى از جاساعان جوق. بىراق شەشۋشى ساتتە ولار وسى مۇمكىندىكتەردى اعىندى سۋداي شاشىراتىپ الدى. ال ونسىز دا العا شىققان يتاليانداردىڭ «فۋتبول وتانىنان» كەلگەندەردى تاس-تالقان ەتىپ جەڭىپ شىعۋعا تولىق مۇمكىندىكتەرى بولدى. باسقاسىن ايتپاعاندا, ولاردىڭ سوققىلارىن ەكى رەت دجو حارتس قورعاعان قاقپانىڭ باعانى قايتاردى.
كەزدەسۋدى اعىلشىندار ەكپىندى باستادى. الايدا, ۋاقىت ۇزاعان سايىن يتاليانداردىڭ ۇستەمدىگى ارتا ءتۇسىپ, اقىرىندا ولار ويىن تىزگىنىن تۇگەل قولدارىنا الىپ قويدى. سول ەكپىندەرىمەن اپەننين تۇبەگىنىڭ جىگىتتەرى بۇرىشتامادان گول سوعىپ كەتتى. ونى 35-مينۋتتا كلاۋديو ماركيزيو سالدى. ايتكەنمەن, يتاليانىڭ بۇل باسىمدىلىعى ەكى مينۋتتان ارتىققا بارعان جوق. اعىلشىندار ۋيەني رۋني مەن دانيەل ءستارريدجدىڭ قاتىسۋىمەن جاسالعان كومبيناتسيانىڭ اقىرىندا ەسەپتى تەڭەستىرىپ تە ۇلگەردى. ال تايمنىڭ سوڭىندا ماريو بالوتەللي مەن انتونيو كاندرەۆا ەكى مۇمكىندىكتى بوسقا جىبەرىپ الدى.
بۇل تاندەم وسى قاتەلىكتەرىن ەكىنشى تايمنىڭ باسىندا بىرلەسىپ قايتاردى. اتاپ ايتقاندا, كاندرەۆانىڭ جەتكىزگەن پاسىن بالوتەللي گولعا اينالدىرا ءبىلدى.
يتاليا قۇراماسىنىڭ ويىنشىلارى بۇدان كەيىن دە ەسەپتى ۇلعايتۋدىڭ بىرنەشە قولايلى ءساتىن وڭتايلى پايدالانا المادى. ءدال فينالدىق ىسقىرىق ەستىلەر الدىندا اندرەا پيرلو 30 مەتر جەردەن ايىپ دوبىن ۇرىپ, دوپتى ماڭدايشانىڭ استىنا قاراي زاۋلاتتى. ونى اعىلشىندار قاقپاعا كىرىپ بارا جاتقان جەرىنەن قايتاردى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.