استانا. 14 ماۋسىم. چەمپيوناتتىڭ سالۆادور قالاسىندا وتكەن يسپانيا مەن گوللانديا قۇرامالارى اراسىنداعى كەزدەسۋىندە ءبىرىنشى سەنساتسيا تىركەلدى. ماتچ 5:1 ەسەبىمەن گوللاند فۋتبولشىلارىنىڭ پافداسىنا شەشىلدى. بۇل تۋرالى egemen.kz حابارلادى.
كەزدەسۋدىڭ ءبىرىنشى تايمى يسپاندار ءۇشىن مۇنداي قاۋىپتىڭ بار ەكەنىن بايقاتقان جوق. قايتا الەم چەمپيونىنىڭ باسىمدىلىعىنا ەشكىم كۇمان كەلتىرە المادى. سوندىقتان 27-مينۋتتا يتاليان اربيترى گوللانديالىقتار قاقپاسىنا كۇماندى پەنالتي تاعايىنداعاندا دا, جۇرت ءبىر جاعى مۇنىڭ ادىلدىك سياقتى كورىپ وتىردى. ال ديەگو كوستانىڭ ءوز ەركىمەن قۇلاپ قالعانى ءۇشىن بەلگىلەنگەن 11 مەترلىك ايىپ دوبىن حابي الونسو ءدال ۇرىپ ءتۇسىردى.
يسپاندار بۇدان كەيىن دە ويىن تىزگىنىن قولدارىنان شىعارا قويعان جوق. بىراق اراسىندا قارسىلاستارىنىڭ قارسى قاۋىرت شابۋىلدارىن جىبەرىپ قويىپ جاتتى. گوللانديالىقتاردىڭ بۇل جورىقتارى شىنىندا قاۋىرت جاسالىپ تۇردى. ولار وزدەرىنىڭ قورعانىس شەپتەرىنەن قارسى قاقپا ماڭىنا تەز جەتىپ ءجۇردى. مىنە, سولاردىڭ بىرىندە, 44-مينۋتتا روبين ۆان پەرسي يسپان قاقپاشىسى يكەر كاسيلياستىڭ العا شىعىپ كەتكەنىن ادەمى پايدالانىپ, الىستان تۋ سىرتىنا دوپ اسىردى. سول دوپ جىبەك توردىڭ اۋماعىنا بارىپ كۇمپ ەتتى – 1:1.
ناعىز الامان-تاسىر ويىن ەكىنشى تايمدا باستالدى. بۇل كەزدە بىرنەشە تاجىريبەلى ويىنشىلارىمەن بىرگە جاس فۋتبولشىلاردان قۇرالعان گوللانديا قۇراماسىن ءتىپتى تانىماي قالدىق. ول جاڭا قالىپتاسىپ كەلە جاتقان كوماندانىڭ ەمەس, بولىپ-تولعان تولىمدى توپتىڭ تەگەۋرىنىن كورسەتتى سول كەزدە. الايدا, الدىمەن 52-مينۋتتا ارەن روببەن ءوز ۇجىمىن العا شىعارعاندا دا, جۇرت الەم چەمپيوندارى ءۇشىن ءالى كوپ نارسە جوعالا قويماعانداي, بۇل ولقىلىقتىڭ ورنى تەز تولا قالاتىنداي كورىپ وتىرعان. بىراق 64-مينۋتتا ستەفان دە ۆرەي «قىزعالداقتار ەلى» قۇراماسىن ەكىنشى رەت ىلگەرى ورلەتكەندە (3:1), ءبىر داۋىلدىڭ شىنىندا ءۇيىرىلىپ كەلە جاتقانىن جۇرەك سەزدى. بۇدان ءارى قارسى شابۋىلدىڭ قىزىعىنا ءتۇسىپ قانا قويماي, ودان ءسات سايىن ناتيجە شىعارۋعا بەيىمدەلە بەرگەن گوللاندتار ولاڭ ۇستىندە بارىنشا سەنىمدى كورىنە باستادى. سونىڭ ارقاسىندا دۋبلگە قول جەتكىزگەن روبين ۆان پەرسي 72-ءشى, ارەن روببەن 80-ءشى مينۋتتاردا يسپانيا قۇراماسىن جەرمەن-جەكسەن ەتۋدى جاقىنداتا ءتۇستى. وسىلايشا ەسەپ 5:1-گە جەتتى.
دامير قوجامقۇل.
دەرەككوز: چەمپيونات.رۋ.
فوتو: چەمپيونات.رۋ.