استانا. 14 ماۋسىم. چەمپيوناتتىڭ ناتال قالاسىندا وتكەن ەكىنشى كەزدەسۋىندە مەكسيكا جانە كامەرۋن قۇرامالارى ۇشىراسىپ, بۇلاردىڭ الدىڭعىلارى 1:0 ەسەبىمەن جەڭىسكە جەتتى. بۇل تۋرالى egemen.kz حابارلادى.
برازيليا مۋنديالىنداعى تورەشىلەر جۇرتتى تاڭ قالدىرۋلارىن جالعاستىرىپ جاتىر. كەشەگى ءبىرىنشى بەتاشار ويىندا عانا جاپون رەفەريى يۋيتي نيسيمۋرا برازيليالىقتار پايداسىنا حورۆاتتار قاقپاسىنا بولماعان پەنالتيدى بەلگىلەسە, كەلەسى ماتچتا كولۋمبيالىق ۆيلمار رولدان ءۇش بىردەي گولدى ساناماي تاستاپ, ايدى اسپاننان ءبىر-اق شىعاردى. ول مۇنىڭ بارىنە «ويىننان تىس قالۋ» دەگەن ۇكىمدى شىعاردى. ەگەر شىنىندا دا كامەرۋن فۋتبولشىلارىنىڭ گولى وفسايدتان سوعىلسا, مەكسيكا سايىپقىراندارى تۇسىرگەن ەكى گول دا تا بولاتىن. دەگەنمەن, جوعارىدان باقىلاپ تۇرعان قۇدىرەتتىڭ كۇشى بار ەكەن, اتستەكتەر ۇرپاقتارى اقىرىندا ءبىر گولدىڭ قارىمتاسىن قايتارىپ, سوڭعى ساتتەردە جەڭىستى قارسىلاستارىنان تىستەرىمەن ج ۇلىپ اكەتتى.
جەڭىمپازداردان بۇل كۇنى دجوۆاني دوس سانتوس پەن وريبە پەرالتا تاندەمى كەرەمەت ونەر كورسەتتى. جەڭىس دوبىن دا وسى جۇپ سالدى. ال ايقاس بارىسىندا جاڭبىردىڭ قۇيىپ تۇرعانىنا قاراماستان, ولار ءۇشىن گول سوعاتىن ماۋرىتتەر تولىپ جاتتى. بۇل ماتچتىڭ تارتىمدىلىعى مەن قىزىقتىلىعى تۇساۋكەسەر كەزدەسۋدەن كەم تۇسكەن جوق. البەتتە, ءتاپ-ءتاۋىر ءوربىپ جاتقان ويىندى ءالسىن-ءالسىن كولۋمبيالىق تورەشىلەر بۇزۋمەن بولدى. مۇنىڭ ۇستىنە, كامەرۋن فۋتبولشىلارى وتە لاس, دورەكى وينادى. بىراق, سوعان قاراماستان, تۇتاستاي العاندا, ماتچتىڭ ادەمىلىگى مەن شيەلەنىسى ساقتالىپ قالدى. ونىڭ قورىتىندىسى دا قيسىنعا ساي كەلدى.
دامير قوجامقۇل.