قازاقستان رەسپۋبليكاسىنىڭ مەملەكەتتىك حاتشىسى ادىلبەك جاقسىبەكوۆ برازيليادا ساپارمەن بولدى, دەپ حابارلادى پرەزيدەنتتىڭ ءباسپاسوز قىزمەتى.
2014 جىلعى 11 ماۋسىمدا قازاقستان رەسپۋبليكاسىنىڭ مەملەكەتتىك حاتشىسى, قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆتىڭ حالىقارالىق فۋتبول فەدەراتسياسى (FIFA) كونگرەسىنىڭ 64-ءشى وتىرىسىنا قاتىسۋعا بايلانىستى برازيلياعا جۇمىس ساپارى شەڭبەرىندە, ونىڭ «ەڭبەكشىلەر پارتياسىنىڭ» ليدەرى, لاتىن امەريكاسىنىڭ ەڭ بەدەلدى جانە تاجىريبەلى ساياساتكەرى, برازيليا فەدەراتيۆتىك رەسپۋبليكاسىنىڭ ەكس-پرەزيدەنتى لۋلا دا سيلۆامەن كەزدەسۋى ءوتتى.
جىلى جانە دوستىق جاعدايدا وتكەن كەزدەسۋدە ءا.جاقسىبەكوۆ لۋلا دا سيلۆاعا قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ اتىنان وعان مىقتى دەنساۋلىق پەن قاجىماس قايرات, اعىمداعى جىلدىڭ قازان ايىندا ءوتۋى جوسپارلانىپ وتىرعان پرەزيدەنتتىك جانە پارلامەنتتىك سايلاۋدا بيلىكتەگى «ەڭبەكشىلەر پارتياسىنا» تابىستار تىلەدى, سونداي-اق الداعى فۋتبولدان الەم بىرىنشىلىگىندە برازيليانىڭ ۇلتتىق كومانداسىنىڭ چەمپيوندىق اتاققا يە بولۋىنا ءوز تىلەكتەستىگىن ءبىلدىردى.
ل.سيلۆا, ءوز كەزەگىندە, قازاقستان رەسپۋبليكاسىنىڭ پرەزيدەنتى ن.ءا.نازارباەۆتى ءوزىنىڭ جاقسى دوسى, ورتالىق ازيا ايماعىندا عانا ەمەس, سونداي-اق, جالپى ەۋرازيا قۇرلىعىنداعى مەملەكەتتەر ىشىندەگى بەدەلدى مەملەكەت باسشىسى رەتىندە اسا قۇرمەتتەيتىنىن ءبىلدىردى. سونىمەن قاتار, الەمنىڭ كوپتەگەن مەملەكەتتەرى, ونىڭ ىشىندە برازيليا باسشىلارىنىڭ قولداۋىنا يە بولعان ەلباسىمىزدىڭ ماڭىزدى حالىقارالىق باستامالارى تۋرالى ايتىپ ءوتتى. سونداي-اق, ول سوڭعى جىلدارى ەكونوميكاسى قارقىندى دامۋ ۇستىندەگى قازاقستانعا ساپارمەن بارۋعا دايىن ەكەنىن مالىمدەپ, ەلباسىنا ەڭ ىستىق تىلەگىن, ال قازاقستان حالقىنا گۇلدەنۋ مەن وركەندەۋ تىلەيتىنىن جەتكىزۋدى سۇرادى.