پاۆلودار وبلىسىنىڭ تۇرعىنى ۆيكتوريا چەركاشينا اقش-تان ساتىپ العان كولىگىن 10 جىلدان كەيىن زاڭداستىردى, دەپ حابارلايدى Egemen.ءkz ىىم ءباسپاسوز قىزمەتىنە سىلتەمە جاساپ.
37 جاستاعى ايەل MINI Cooper كولىگىن اقش-تان ساتىپ العان.
«مەن اۆتوكولىكتى زاڭداستىرۋ قىزمەتىن العاشقىلاردىڭ ءبىرى بولىپ پايدالاندىم. مەنىڭ كولىگىم اقش-تان, قازاقستانعا سوناۋ 2012 جىلى اكەلىنگەن. سول كەزدە قولدانىستا بولعان 30% كەدەندىك باج سالىعى تولىعىمەن تولەندى. مەن كولىكتى بىردەن تىركەمەدىم, ويتكەنى شەتەلگە شىعۋدى جوسپارلادىم. بىرنەشە جىل بويى ەلدە بولمادىم. سول ارالىقتا قايتا وڭدەۋ اقىسى مەن باستاپقى تىركەۋ ءۇشىن جاڭا تولەمدەر ەنگىزىلگەن. كولىك قايتا وڭدەۋ تولەمى ەنگىزىلگەنگە دەيىن اكەلىنگەندىكتەن ونى تولەۋدىڭ قاجەتى بولمادى, بىراق باستاپقى تىركەۋ ءۇشىن 500 اەك كولەمىندە الىم تولەۋ قاجەت بولدى. سوما از ەمەس. سوندىقتان مەنىڭ كولىگىم گاراجدا تۇرا بەردى», دەدى ول.
پاۆلودارلىق تۇرعىن پرەزيدەنت اۆتوكولىكتەردى زاڭداستىرۋ جانە ونى وتكىزۋ شارتتارى تۋرالى جاريالاعان كەزدە قۋانعانىن جاسىرمادى. ول 23 قاڭتاردا ەلەكتروندى ۇكىمەت پورتالى ارقىلى ونلاين ءوتىنىم بەرگەن. جاۋاپ 3-4 مينۋت ىشىندە كەلىپتى.
«كريميناليستەر كورپۋستىڭ جانە باسقا اگرەگاتتاردىڭ نومىرلەرىن, سونداي-اق بارلىق قۇجاتتاردى سالىستىرىپ تەكسەردى. ءوتىنىم ماقۇلداندى. كەيىنىرەك قۇجاتتاردى تاپسىردىم. 10 مينۋتتان كەيىن قۇجاتتاردىڭ دايىندىعى تۋرالى حابارلاما الدىم. 10 جىلدان كەيىن مەن ءوز كولىگىمدى ەسەپكە الىپ, ءارى وتباسى بيۋدجەتىن ۇنەمدەي الدىم», دەدى ۆيكتوريا چەركاشينا.
وسى رەتتە پوليتسەيلەر قازاقستان ازاماتتارى اكەلگەن شەتەلدىك ەسەپتەگى جەڭىل اۆتوكولىكتەر, شاعىن جانە ورتا اۆتوبۋستار, شاعىن جۇك كولىكتەرى, باسقارۋ ورگاندارى وڭ جاقتا ورنالاسقان كولىك قۇرالدارى زاڭداستىرۋعا جاتاتىنىن ەسكە سالدى. بۇل پروتسەسس 2023 جىلدىڭ 1 شىلدەسىنە دەيىن جالعاسادى.