وتكەن جىلى كوپبالالى وتباسىلارعا بەرىلەتىن مەملەكەتتىك جاردەماقى تولەمدەرىن جالپى سوماسى 346,8 ملرد تەڭگەگە ورتا ەسەپپەن 501,2 مىڭ وتباسى الدى. ونىڭ ىشىندە جەلتوقسان ايىندا 530,8 مىڭ وتباسىنا 31,2 ملرد تەڭگە جاردەماقى تولەندى, دەپ حابارلايدى Egemen.kz.
«بۇل مەملەكەتتىك جاردەماقىعا 4 جانە ودان دا كوپ بىرگە تۇراتىن كامەلەتكە تولماعان نەمەسە 23 جاسقا دەيىنگى كۇندىزگى بولىمدە وقيتىن ستۋدەنت بالالارى بار وتباسىلار تابىسىنا قاراماستان ۇمىتكەر بولا الادى», دەلىنگەن ەڭبەك جانە الەۋمەتتىك قورعاۋ مينيسترلىگى تاراتقان اقپاراتتا.
تولەم مولشەرى بالا سانىنا قاراي ەسەپتەلەدى. كوپبالالى وتباسىلارداعى:
- 4 بالاسى بار وتباسىلارعا – 16,03 اەك (2022 جىلى – 50 976 تەڭگە, 2023 جىلى – 55 304 تەڭگە);
- 5 بالاعا – 20,04 اەك (2022 جىلى – 63 728 تەڭگە, 2023 جىلى – 69 138 تەڭگە);
- 6 بالاعا – 24,05 اەك (2022 جىلى – 76 479 تەڭگە, 2023 جىلى – 82 973 تەڭگە);
- 7 بالاعا – 28,06 اەك (2022 جىلى – 89 231 تەڭگە, 2023 جىلى – 96 807 تەڭگە);
- 8 جانە ودان دا كوپ بالاسى بار وتباسىلارعا – ءار بالاعا 4 اەك مولشەرىندە (2022 جىلى – 12 720 تەڭگەدەن, 2023 جىلى – 13 800 تەڭگەدەن).
كوپبالالى وتباسىلارعا ولاردىڭ تابىسىن ەسەپكە الماي بەرىلەتىن مەملەكەتتىك جاردەماقى قازاقستاندا 2020 جىلدىڭ 1 قاڭتارىنان باستاپ ەنگىزىلدى.
2023 جىلعى 1 قاڭتاردان باستاپ بالالى وتباسىلارعا تاعايىندالاتىن مەملەكەتتىك جاردەماقىلاردىڭ مولشەرى 8,5%-عا ارتتى.