قر سىرتقى ىستەر مينيسترلىگىنىڭ رەسمي وكىلى يتاليادا قايتىس بولعان 27 جاستاعى سالەرنو ۋنيۆەرسيتەتىنىڭ دوكتورانتۋرا ستۋدەنتى اسەم جاربوسىننىڭ دەنەسى اپتانىڭ سوڭىنا دەيىن قازاقستانعا جەتكىزىلەتىنىن حابارلادى, دەپ جازادى Egemen.kz.
ايبەك سمادياروۆ سىرتقى ىستەر مينيسترلىگى شەتەلدە قيىن جاعدايعا تاپ بولعان ازاماتتارىمىزعا كومەك كورسەتۋ ءۇشىن قاراجات قاراستىرعانىن ايتتى.
ونىڭ ايتۋىنشا, فورس-ماجور نەمەسە كۇتپەگەن جاعدايلار بولعان جاعدايدا بارلىق شىعىنداردى مەملەكەت تولەيدى.
«وتكەن اپتادا قايعىلى وقيعا بولدى. ءبىزدىڭ ازاماتشا جول-كولىك وقيعاسى سالدارىنان قايتىس بولدى. اسەم جاربوسىننىڭ تۋىستارى بىزگە ءوتىنىش ءبىلدىرىپ, مارقۇمنىڭ دەنەسىن ەلگە جەتكىزۋدى سۇرادى. قازىر بۇعان قاراجات ءبولىنىپ جاتىر. قۇجاتتار جاقىن ارادا رەسىمدەلەدى, مەنىڭ ويىمشا, مارقۇمنىڭ دەنەسى اپتانىڭ سوڭىنا دەيىن قازاقستانعا جەتكىزىلەدى», دەدى ايبەك سمادياروۆ.
ەسكە سالا كەتسەك, 17 قاڭتاردا يتاليادا سالەرنو ۋنيۆەرسيتەتىنىڭ دوكتورانتۋراسىندا وقىعان 27 جاستاعى ستۋدەنت اسەم جاربوسىن جول-كولىك وقيعاسى سالدارىنان قايتىس بولدى. قىزدى ۆەردي تەاترىنىڭ جانىندا 20 جاستاعى Peugeot 308 جۇرگىزۋشىسى قاعىپ كەتكەن.