استانادا وڭىرلىك قولباسشىلىقتاردىڭ قولباسشىلارىمەن, ۇلتتىق ۇلان اكادەمياسىنىڭ باستىعىمەن, قۇرامالار مەن اسكەري بولىمدەردىڭ كومانديرلەرىمەن جانە ولاردىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارلارىمەن, وڭىرلىك قولباسشىلىقتار مەن تىكەلەي باعىنىستى بولىمدەردىڭ, اسكەري پوليتسيا بولىمدەرىنىڭ باستىقتارىمەن وقۋ-ادىستەمەلىك جيىندار وتكىزىلىپ جاتىر, دەپ حابارلايدى Egemen.kz.
ەكى كۇن ىشىندە باسشىلىق قۇرام وفيتسەرلەرىنىڭ اتىس, دەنە شىنىقتىرۋ, اسكەري-ينجەنەرلىك دايارلىق, رحبز, تەحنيكالىق جانە اسكەري-مەديتسينالىق دايارلىق بويىنشا پراكتيكالىق داعدىلارى تەكسەرىلىپ, قارۋ-جاراق پەن اسكەري تەحنيكانىڭ, ارنايى قۇرالداردىڭ, بايلانىستىڭ تاكتيكالىق-تەحنيكالىق سيپاتتامالارىمەن قوسا كاسىبي-لاۋازىمدىق دايارلىقتىڭ نەگىزگى پاندەرى بويىنشا سىناقتار قابىلداندى.
ساباقتىڭ نەگىزگى بولىگى دالا جاعدايىندا ءوتتى. العاشقى كۇنى قر مەملەكەتتىك كۇزەت قىزمەتىنىڭ «مايلان» دالالىق وقۋ ورتالىعىندا, ەكىنشى كۇنى قر ۇلتتىق ۇلانىنىڭ «قاپتاعاي» بىرىككەن وقۋ ورتالىعىندا سىناقتار قابىلداندى.
مەملەكەتتىك كۇزەت قىزمەتىنىڭ پوليگونىندا قولباسشىلار, كومانديرلەر, سونداي-اق ولاردىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارلارى ءۇشىن «ارنايى ماقساتتاعى بولىمشەلەردىڭ ارەكەتى, ءپاراشيۋتسىز ءتۇسىرۋ جانە كورسەتىلگەن شەكارانى باسىپ الۋ بويىنشا» كورنەكى ساباق ۇسىنىلدى.
«2022 جىلدىڭ جازىندا الماتى وبلىسىنىڭ جەتىگەن كەنتىندە وقۋ-ادىستەمەلىك جيىندار وتكىزىلگەن. قازىر ءبىز استانا ماڭىنداعى ەكى ءتۇرلى پوليگوندا وتكىزىپ جاتىرمىز. جەدەل دايىندىق بارىسىندا وفيتسەرلەرمەن پراكتيكالىق ساباقتار وتكىزۋگە باستى نازار اۋدارىلادى. كومانديرلەر مەن ولاردىڭ ورىنباسارلارى ۇلتتىق ۇلاننىڭ قارۋلانۋىندا تۇرعان ءارتۇرلى پوزيتسيالار مەن قارۋ-جاراق تۇرلەرىن: تاپانشالاردى, اۆتوماتتاردى, تەگىس ۇڭعىلى مىلتىقتاردى, گراناتااتقىشتاردى جانە قىس مەزگىلىندە ءىرى كاليبرلى پۋلەمەتتەردى اتۋ بويىنشا ءوز شەبەرلىكتەرىن كورسەتتى. سونداي-اق جاۋىنگەرلىك گراناتالاردى لاقتىرۋدا جانە بروندى ماشينالاردان اتىس جۇرگىزىلىپ جاتىر», دەدى جاۋىنگەرلىك دايارلىق باس باسقارماسىنىڭ باستىعى پولكوۆنيك نۇرلان مۇحامەدوۆ.
جيىن بارىسىندا وفيتسەرلەرمەن قۇقىقتىق ءتارتىپ اسكەرلەرىنىڭ قىزمەتتىك-جاۋىنگەرلىك قىزمەتىن قامتاماسىز ەتۋدىڭ نەگىزگى تۇرلەرى بويىنشا وقۋ-ادىستەمەلىك, نۇسقاۋلىق جانە كورنەكى ساباقتار وتكىزىلدى.
ايتا كەتەيىك, جەدەل دايارلىق شەڭبەرىندە وفيتسەرلەرگە «ۇلتتىق ۇلاننىڭ جەكە قۇرامىمەن تاربيە, الەۋمەتتىك-قۇقىقتىق جانە يدەولوگيالىق جۇمىستى ۇيىمداستىرۋدىڭ جاڭا ەرەجەلەرى» تانىستىرىلدى.