مىڭعىرتىپ قوي-ەشكى اسىراعانمەن, قىرىققان ءجۇنى ىسىراپ بولىپ, كۇرەسىندە جاتىر. راس, قولدا بار تەرى مەن ءجۇندى كادەگە جاراتا الماي كەلە جاتىرمىز. ەسەسىنە جۇننەن توقىلعان كيىم-كەشەكتى, بىلعارى كۇرتەلەردى شەتەلدەن جەتكىزەمىز. شىعىستا تەرى مەن ءجۇن وڭدەيتىن بىردە-ءبىر كاسىپورىن جوق. ايتەۋىر, كوكپەكتى اۋدانىنىڭ تۇرعىنى ءنۇريلا ماقىم حالىقتان ءجۇن قابىلداپ, كورپە, جاستىق تىگەتىن كىشىگىرىم تسەح اشىپتى. سوعان قۋاندىق. شارۋانى دوڭگەلەتىپ اكەتۋ ءۇشىن مەملەكەتتەن قولداۋ بولسا دەپ تىلەدىك.
ەستەرىڭىزدە شىعار, توقسانىنشى جىلدارى سوعىم ناۋقانىندا اتشانامەن ءۇيدى-ءۇيدى ارالاپ, تەرى جينار ەدى عوي. قوي مەن ەشكىنىڭ تەرىسىنە دەيىن جيناپ الىپ كەتەتىن. تارازىعا سالىپ ولشەپ, سالماعىنا قاراي قۇن تولەيتىن. ءجۇن جيناۋ ءداستۇرى جانە بار-تۇعىن. ول سەمەيدىڭ تەرى-بىلعارى كومبيناتىنىڭ دۇركىرەپ تۇرعان شاعى شىعار. قازىر ءبارى قۇلاعان, كۇيرەگەن. سەمەيدەگى تريكوتاج فابريكاسى دا توقىراۋدا توقتاپ تىنعان. قازىر قىلاياعى ش ۇلىقتى دا شەتتەن الامىز. اسىرەسە ىرگەدەگى موڭعوليانىڭ تۇيە ءجۇن ش ۇلىعىنا جاپا-تارماعاي تالاسامىز. ءتورت ت ۇلىگىمىزدى ورگىزىپ وتىرعانىمەن, تەرىسى مەن ءجۇنىنىڭ كەرەكسىز بولىپ جاتقانى جانعا باتادى. كوكپەكتى اۋدانىنىڭ تۇرعىنى ءنۇريلا ماقىم سەكىلدى كاسىپكەرلەر ءار اۋداننان تسەح اشىپ, ءجۇن قابىلداسا, از دا بولسىن, ءوز ءونىمىمىزدى تۇتىنار ما ەدىك؟!
2018 جىلى كۇزدە مەملەكەتتىك «ەڭبەك» باعدارلاماسى ارقىلى سوناۋ تالدىقورعان وبلىسىنان كوكپەكتى اۋدانىنا قونىس اۋدارعان بۇل وتباسى بۇگىندە كىشىگىرىم كاسىپ باستاپ, ناپاقالارىن ايىرىپ وتىر. ءنۇريلا ماقىمنىڭ جولداسى مال ساۋداسىمەن اينالىسسا, ءوزى كوكپەكتى اۋىلىنىڭ ورتاسىنان تىگىن تسەحىن اشقان. جۋىقتا تسەح جۇمىسىن ارنايى بارىپ كوردىك. شاعىن عانا سۇر عيمارات. قۇرىلىسى تولىق اياقتالا قويماعان عيماراتقا جىلۋ تارتىپ ۇلگەرمەپتى. كورپە, جاستىق جينالعان تىگىن تسەحىنىڭ ءىشى اڭىراپ تۇر. تاباننان وتكەن سىز ماڭدايدى سولقىلداتادى. قىستىڭ قاقاعان ايازىندا كۇن ۇزاق مۇندا جۇمىس ىستەۋ مۇمكىن ەمەس. ايتۋىنشا, ازىرشە ەسكى ءجۇندى قايتا ءتۇتىپ, كورپە تىگۋمەن اينالىسادى. تاپسىرىسقا قاراي جاستىق قاپتاپ, باسقا دا ۇساق-تۇيەك تىگىن تىگەدى. ال كەلەر جىلى حالىقتان ءجۇن جيناپ, كاسىپتى كەڭەيتۋدى كوزدەپ وتىر. قازىردىڭ وزىندە ءجۇن تۇتۋگە ارنالعان ەكى اپپارات الىپ قويعان. قوس اپپاراتتى قاتار ىسكە قوسسا, توننا ءجۇندى ءاپ-ساتتە ءتۇتىپ شىعاتىن سياقتى. ءجۇندى تۇتكەن سوڭ كورپە باساتىن اپپاراتى جانە بار. كورپەگە ارنالعان بۇلدى كەرىپ قويىپ, ۇلبىرەگەن ءجۇندى مولشەرلەپ توسەپ شىعادى ەكەن. سودان سوڭ كوكتەپ تىكتى, سىرىپ تىكتى... ايتەۋىر, ءسۇت ءپىسىرىم مەزگىلدە ءبىر كورپەنىڭ جوباسىن جاساپ قويدى. ايتۋىنشا, پايدالانىپ وتىرعان قۇرىلعىنىڭ ءبارىن ءوز قاراجاتىنا ساتىپ العان. ەكىبولمەلى عيماراتتى دا ءوز كۇشتەرىمەن كوتەرگەن. كاسىپ اشۋ ءۇشىن بەرىلگەن مەملەكەتتىك گرانت 580 مىڭ تەڭگە. بۇل سوما تسەح اشۋعا جەتپەگەنىمەن, از دا بولسا سەپ. كەيبىر كاسىپكەرلەر گرانت ارقىلى العان اقشانى اينالىمعا سالىپ, شارۋالارىن شىر اينالدىرىپ وتىر. ارينە, تاپقان تابىس تاڭداعان كاسىپ كوزىنە بايلانىستى.
– ءبىز 2008 جىلى قىتايدان ەلگە ورالدىق. تالدىقورعاندا تۇرىپ, 2018 جىلى «ەڭبەك» باعدارلاماسىمەن كوكپەكتىگە قونىس اۋداردىق. اۋدان اكىمدىگى شاقىرعان سوڭ جولداسىم كەلىپ كورىپ كەتتى. ۇنادى دەدى. بىراق كوشىپ كەلگەن جىلدارى قينالدىق. بالالارىم اۋىردى, قىسىلدىق... ارينە, قارجىلاي قولداۋ بولدى. الايدا كاسىپ اشۋ ءۇشىن جەر سۇراپ ەدىك, الا المادىق. اۋىلدىڭ شەت جاقتارىنان عانا ۇسىندى. كەيىن ءوزىمىز ساتىپ الدىق. تىگىن تسەحىن اشۋ ءۇشىن 580 مىڭ تەڭگە قايتارىمسىز گرانت بەردى. ءتورتبالالى انا ەدىم, تاعى دا جەڭىلدىكتەر بولا ما دەپ ويلاسام, جوق ەكەن. سەبەبى ءبىر بالام كەمباعال, ۇكىمەت قاراماعىندا. سوندىقتان زاڭ جۇزىندە كوپبالالى انا ەمەس ەكەنمىن, – دەيدى كوكپەكتىلىك كاسىپكەر ءنۇريلا ماقىم.
جالپى, كوكپەكتى اۋدانىنا 2017-2021 جىلدار ارالىعىندا وزگە وبلىستاردان «ەڭبەك» باعدارلاماسى اياسىندا 46 وتباسى, ياعني 171 ادام قونىس اۋدارعان. ولارعا مەملەكەت تاراپىنان ءتيىستى كومەك كورسەتىلىپ, كاسىپتەرىن دوڭگەلەتۋگە بار مۇمكىندىك جاسالعان كورىنەدى.
اباي وبلىسى
كوكپەكتى اۋدانى