مەملەكەت باسشىسىنا ءوڭىردىڭ بىلتىرعى الەۋمەتتىك-ەكونوميكالىق دامۋى جونىندە ەسەپ بەرىلىپ, وسى جىلعا ارنالعان جوسپارى تانىستىرىلدى, دەپ حابارلايدى Egemen.kz.
ەرالى توعجانوۆتىڭ ايتۋىنشا, اقتوبە وبلىسىندا تۇراقتى ماكروەكونوميكالىق جاعداي قالىپتاسقان. ونەركاسىپ, اۋىل شارۋاشىلىعى, ينۆەستيتسيا جانە تۇرعىن ءۇي قۇرىلىسى سالالارىنداعى نەگىزگى الەۋمەتتىك-ەكونوميكالىق كورسەتكىشتەردىڭ ءوسىمى قامتاماسىز ەتىلگەن.
پرەزيدەنتكە ينۆەستيتسيا تارتۋ جونىندەگى شارالار تۋرالى باياندالدى. وتكىزىلگەن ينۆەستيتسيالىق فورۋمداردىڭ ناتيجەسىندە تەك سوڭعى ءۇش ايدا جالپى قۇنى 3 تريلليون تەڭگەدەن اساتىن 12 مەموراندۋمعا قول قويىلدى. سونداي-اق ءوڭىردىڭ ەكولوگيالىق احۋالىن جاقسارتۋ جۇمىستارى جاندانا ءتۇستى.
بۇدان بولەك, اگروونەركاسىپ كەشەنى مەن اۋىلدىق جەرلەردى دامىتۋعا قاتىستى پرەزيدەنت تاپسىرماسىنىڭ ورىندالۋى جونىندە مالىمەت بەرىلدى. وبلىس اكىمى وڭىردەگى 315 ەلدى مەكەندى كەشەندى تۇردە دامىتۋ تۇجىرىمداماسى ازىرلەنىپ جاتقانىن جەتكىزدى.
ايتا كەتسەك, ايماقتا «اۋىل اماناتى» جوباسى جۇزەگە اسىرىلىپ جاتىر. جوبانى قارجىلاندىرۋعا 2022 جىلى رەسپۋبليكالىق بيۋدجەتتەن 3 ميلليارد تەڭگە, بيىل قوسىمشا 3,5 ميلليارد تەڭگە بولىنگەن.
سونىمەن قاتار ء«بىلىم All» جوباسى اياسىندا 10 مىڭعا جۋىق بالا وقيتىن 120 شاعىن جيناقتى اۋىل مەكتەبىنىڭ ءبىلىم ساپاسىن ارتتىرۋ شارالارى قابىلدانىپ جاتىر.
كەزدەسۋ سوڭىندا پرەزيدەنت ءوڭىر ينفراقۇرىلىمىن دامىتۋ جانە وبلىس تۇرعىندارىن الاڭداتاتىن الەۋمەتتىك ماسەلەلەردى شەشۋ جۇمىستارىن جالعاستىرۋدى تاپسىردى.