قاراعاندى وبلىسى نۇرا اۋدانىندا ىشىمدىك ساتپايتىن ءارى ونى تاتىپ المايتىن اۋىل بار. بۇل اۋىل تىكەنەكتى اتالادى. تاعى ءبىر قىزىعى, اۋىلدا ەكى جىلدا بىردە-ءبىر قىلمىس تىركەلمەگەن. ىشىمدىك اتاۋلى اۋىلدان الاستالعان ەكى جىلدا بىرەۋدىڭ بىرەۋ الا ءجىبىن اتتاپ كورمەپتى. اۋىلدا 226 ادام تۇرادى. تىكەنەكتى ەلىمىز بويىنشا «ۇلگىلى اۋىل» اتاندى.
اۋىل تۇرعىندارى قىلمىستىڭ ايىلىن جيۋىن ىشىمدىكتەن باس تارتۋمەن بايلانىستىرادى. مۇنداي تىيىمعا باستاما بولعان اۋىل اكىمى ەرلان وسپانوۆ پەن ۋچاسكەلىك پوليتسيا ينسپەكتورى الىبەك وسپانوۆ ەكەن.
– اۋىل اكىمى ەكەۋمىز وسىنداي باستاما كوتەرىپ ەدىك, قوعامدىق كەڭەستىڭ توراعاسى قولداۋ كورسەتتى. ءوزىمىز انىقتاپ, بەلگىلەپ العان وسى باعىتتا جۇمىستى جالعاستىرامىز. جاستاردىڭ قىلمىستان اۋلاق بولۋىن, سالاماتتى ءومىر سالتىن ۇستانۋىن تىلەيمىز, – دەدى ۋچاسكەلىك ينسپەكتور.
تىكەنەكتى وزگە اۋىلدارعا ۇلگى كورسەتەرىنە ينسپەكتور سەنىمدى.
جاقىندا تىكەنەكتى اۋىلىنىڭ اكىمى ەرلان وسپانوۆ ىشكى ىستەر ءمينيسترى مارات احمەتجانوۆتىڭ قولىنان ء«تارتىپتى قامتاماسىز ەتۋگە قوسقان ۇلەسى ءۇشىن» مەدالىن الدى. ال اۋىلدا ينفراقۇرىلىمدارعا جوندەۋ جۇرگىزىلىپ, الەۋمەتتىك-ەكونوميكالىق الەۋەتى كوتەرىلىپ كەلەدى. ورتالىقتاندىرىلعان اۋىز سۋ جۇيەسى تارتىلعان. ينتەرنەت جانە ۇيالى بايلانىس بار. كوشەلەرى جارىقتاندىرىلعان.
بيىل اۋىلداعى ءۇش كوشەنىڭ جولدارى ورتاشا جوندەۋدەن وتپەك. تاعى 14 جارىق باعانىن ورناتۋ جوسپاردا. مامىردا زاماناۋي بالالار ويىن كەشەنى بوي كوتەرمەك, – دەدى نۇرا اۋدانىنىڭ تۇرعىن ءۇي-كوممۋنالدىق شارۋاشىلىق, اۆتوموبيل جولدارى جانە تۇرعىن ءۇي ينسپەكتسياسى ءبولىمىنىڭ باسشىسى نۇرجان ورالباەۆ.
قاراعاندى وبلىسى