2 قاڭتار. اق تۇتەك بوران. قار بەلۋاردان. سەمەيدەن كەلگەن دەمالۋشىلار قازىمبەت اۋىلىنان 6 شاقىرىم جەردەگى التى اي جاز قايناپ جاتاتىن ومارتا شارۋاشىلىعىنا سەرۋەندەپ قايتپاق بولىپ, موتوشاڭعىمەن جولعا شىققان. وتباسىلى ءۇش دەمالۋشىلاردىڭ ءبىرى 9 جاستاعى قىز بالا ەدى...
بوراندى كۇنى اۋىل اراسىن قويىپ, اۋىل ىشىندە اداسىپ كەتىپ جاتقانداردى دا ەستىگەنبىز. ونىڭ قاسىندا دالالى جەردە قاۋىپ ەكى ەسە. ءتورت كۇن ءوتىپ, دەمالۋشىلاردان حابار بولماعان سوڭ 5 قاڭتاردا تۋىسقاندارى ءۇرجار اۋدانى اكىمدىگىنەن كومەك سۇرايدى. اۋدان باسشىلىعى جەدەل شتاب قۇرىپ, تارباعاتاي ۇلتتىق پاركىنىڭ ديرەكتورى مىندەتىن اتقارۋشى قالدىبەك سارسەمباەۆپەن اقىلداسا كەلە, پارك قىزمەتكەرلەرىن ىزدەۋگە جىبەرۋدى ءجون كورەدى. قالاي دەگەنمەن, ينسپەكتورلار ماڭايدىڭ وي-قىرىن جاقسى بىلەدى عوي.
تاپسىرمانى قۇپ العان پارك قىزمەتكەرلەرىنىڭ ءبىرى موتوشانا ءمىنىپ, ەندى ءبىرى شاڭعى بايلاپ, تۇسكى ساعات ون ەكىلەردە ومارتا بەتكە الىسقان. بۇل كۇنى دە بوران باسەڭدەي قويماعان ەدى. بەت قاراتپايدى, ءجۇرىس وندىمەيدى. ون-ون بەس مينۋتتا جەتىپ باراتىن ومارتاعا ورمانشىلار كەشكى جەتىدە ءبىر-اق ىلىنگەن. سويتسە, دەمالۋعا كەلگەن وتباسى قوجالىققا جەتۋىن جەتكەنمەن, قار قۇرساۋىنا قامالىپ, كەرى قايتا الماعان ەكەن. قار باسقان تاۋلى جەردە قىبىر ەتكەن جان, كولدەنەڭ ءىز بايقالماعان سوڭ جولعا شىعۋعا دا تاۋەكەل ەتپەگەن. ونىڭ ۇستىنە, تەلەفون بايلانىسى دا جوق ەدى. ينسپەكتورلار جەتە سالا راتسيا ارقىلى جاعدايدى بايانداپ, الاڭداۋلى تۋىستارىن ءبىر قۋانتقان. ال, وزدەرى دەمالۋشىلاردى الىپ, جولعا ەرتەسى كۇندىز بىراق قامدانعان ەدى.
جالپى, توتەنشە جاعدايلار دەپارتامەنتى قىزمەتكەرلەرى بوران-شاشىندى كۇنى جولعا شىقپاۋ كەرەكتىگىن قانشا ەسكەرتكەنىمەن, كەيبىرەۋ قۇلاق اسا بەرمەيدى. قۇلاق اسا بەرمەگەن سوڭ وقىس وقيعالارعا تاپ بولىپ جاتادى.
اباي وبلىسى,
ءۇرجار اۋدانى