2022 جىلى ەكسپورتتاۋشى كومپانيالارعا شىعىنداردى وتەۋگە بولىنگەن قاراجات كولەمى وتكەن جىلمەن سالىستىرعاندا 2,8 ەسە ۇلعايىپ, 8,8 ملرد تەڭگەنى قۇراعان. سول سياقتى 2021 جىلى 306 ءوتىنىم ماقۇلدانسا, 2022 جىلى ونىڭ سانى 486-عا جەتتى. وتەلۋگە جاتاتىن شىعىنداردىڭ بارلىق ءتۇرىنىڭ ىشىندە ەكسپورتتاۋشىلار اراسىندا تاۋارلاردى تەمىرجول كولىگىمەن جەتكىزۋ ەڭ سۇرانىسقا يە ءوتىنىم بولىپ تۇر.
تاۋارلاردى تەمىرجول كولىگىمەن تاسۋ باعىتى بويىنشا بارلىعى 7,05 ملرد تەڭگەگە 328 ءوتىنىم نەمەسە جالپى سومانىڭ 79,7 پايىزى ماقۇلدانىپتى. تاۋارلاردى جىلجىتۋ شىعىندارىن وتەۋ بويىنشا 0,3 ملرد تەڭگەگە 49 ءوتىنىم ماقۇلدانعان. ساۋدا جانە ينتەگراتسيا مينيسترلىگىنىڭ حابارلاۋىنشا, سالالار بويىنشا 2022 جىلى ازىق-ت ۇلىك وندىرۋشىلەرى ءداستۇرلى بەلسەندىلىك تانىتتى. ولاردىڭ باسىم بولىگى – ماي, ۇن, نان-توقاش, ۇننان جاسالعان كونديتەرلىك ونىمدەر, ماكارون ونىمدەرى, اۋىز سۋ مەن سۋسىندار, بالىق وڭدەۋشى كاسىپورىندار. اۋىل شارۋاشىلىعى سالاسىندا جۇمىس ىستەيتىن ەكسپورتتاۋشى كومپانيالارعا جالپى سوماسى 3,7 ملرد تەڭگەنى قۇرايتىن 229 ءوتىنىم ماقۇلداندى.
«2021 جىلمەن سالىستىرعاندا وتىنىمدەردىڭ بارلىق ءتۇرى بويىنشا وتەماقى كولەمىنىڭ ءوسۋى بايقالدى. قاعاز جانە قاعاز ونىمدەرىن وندىرۋشىلەردىڭ وتىنىمدەرى بويىنشا تولەمدەر ايتارلىقتاي ءوستى – 5,5 ەسە, حيميا ونەركاسىبى ونىمدەرى – 4,7 ەسە, بالىق ءوسىرۋ كاسىپورىندارى – 4,5 ەسە, توقىما بۇيىمدارىن وندىرۋشىلەر – 3,8 ەسە. ماقۇلدانعان وتىنىمدەردىڭ ەڭ كوپ سانى قوستاناي وبلىسىنا, الماتى قالاسىنا, الماتى, قاراعاندى, پاۆلودار وبلىستارىنا جانە شىمكەنت قالاسىنا تيەسىلى. 2022 جىلى شىعىنداردىڭ ءبىر بولىگىن وتەگەن شاعىن جانە ورتا بيزنەس كاسىپورىندارى نەگىزىنەن دايىن ءونىمدى جاقىن ەلدەرگە ەكسپورتتايدى. ونىڭ ىشىندە قازاقستاندىق تاۋارلاردىڭ 17,8 پايىزى وزبەكستانعا جونەلتىلەدى, رەسەيگە ەكسپورتتىڭ 16,1 پايىزى اپارىلادى, ودان ءارى اۋعانستان, تاجىكستان جانە قىرعىزستان بار. وسى بەستىكتەن باسقا وتاندىق كومپانيالار ونىمدەردى ەۋروپا ەلدەرىنە, سونداي-اق ءباا, كانادا, اقش جانە باسقا دا كوپتەگەن الىس شەتەلدەرگە ەكسپورتتايدى», دەلىنگەن ۆەدومستۆو حابارلاماسىندا.
2022 جىلعى جەلتوقساندا ەكسپورتتاۋشىلارعا شىعىنداردىڭ ءبىر بولىگىن وتەۋ ەرەجەسىنە وزگەرىستەر بەكىتىلدى. ەكسپورتى بويىنشا شىعىستارى وتەلۋگە جاتاتىن تاۋارلاردىڭ تىزبەسىنە 1 146 تاۋار پوزيتسياسى قايتارىلدى. ونىڭ ىشىندە ۇن, ەت, تۇز جانە باسقالارى بار. قايتارۋ نەگىزىنەن تومەنگى شەكتى پوزيتسيالارعا اسەر ەتتى.
«2022 جىلى QazTrade كولەمى جاعىنان دا, سوماسى جاعىنان دا وتەماقى الۋعا وتىنىمدەرمەن اۋقىمدى جۇمىس جۇرگىزدى. بيىل ۇلكەن مىندەتتەر تۇر. ەڭ الدىمەن, 2022 جىلعى وتىنىمدەردى قاراۋ پروتسەسىن اياقتاۋ قاجەت. بۇل 7 ملرد تەڭگەگە 300-گە جۋىق ءوتىنىم. بۇل ماسەلە بويىنشا شەشىم قابىلدانىپ, بيۋدجەتتە قاجەتتى قاراجات قاراستىرىلعان. ەكىنشىدەن, وتىنىمدەردى جاڭا قابىلداۋدى جاريالاۋ ماسەلەسى پىسىقتالۋدا. QazTrade, ارينە, ءبىزدىڭ ەكسپورتتاۋشىلاردىڭ بەلسەندىلىگىنە سەنەدى», دەدى QazTrade ورتالىعىنىڭ باسشىسى نۇرالى بوكەيحانوۆ.
«QazTrade» ەكسپورتتاۋشىلاردى قولداۋدىڭ مەملەكەتتىك شارالارىنىڭ وپەراتورى رەتىندە ساۋدا جانە ينتەگراتسيا مينيسترلىگىمەن بىرلەسىپ شىعىنداردى وتەۋ پروتسەسىنىڭ تيىمدىلىگىن وڭتايلاندىرۋ جانە ارتتىرۋ جونىندەگى جۇمىستى بيىل دا جالعاستىرماق.
2022 جىلى «QazTrade» كومپانياسىنا 259 ەكسپورتتاۋشى كومپانيادان بارلىعى 621 ءوتىنىم كەلىپ تۇسكەن.