سەنات توراعاسى ماۋلەن اشىمباەۆ Facebook پاراقشاسىندا جاڭا 2023 جىلمەن قۇتتىقتادى, دەپ حابارلايدى Egemen.kz.
«بارشاڭىزدى كەلىپ جەتكەن جاڭا 2023 جىلمەن شىن جۇرەكتەن قۇتتىقتايمىن!
بۇل – بارىمىزگە كوتەرىڭكى كوڭىل-كۇي سىيلايتىن, ارقايسىمىز ەرەكشە قارسى الاتىن شاتتىققا تولى مەرەكە. وسى ساتتە وتكەندى وي ەلەگىنە سالىپ, الداعى كۇندەردەن ايرىقشا ءۇمىت كۇتەمىز.
ءوتىپ بارا جاتقان 2022 جىل ەلىمىز ءۇشىن وڭاي باستالعان جوق. قاسىرەتتى قاڭتار وقيعاسى ەلدىگىمىز بەن ەگەمەندىگىمىزگە ۇلكەن قاۋىپ ءتوندىردى. ءبىز, شىن مانىندە, تاۋەلسىزدىك جىلناماسىندا بۇرىن-سوڭدى بولماعان سىن-قاتەرمەن بەتپە-بەت كەلدىك.
دەگەنمەن, مەملەكەت باسشىسى قاسىم-جومارت كەمەل ۇلى توقاەۆتىڭ باتىل شەشىمدەرى مەن حالىقتىڭ ىنتىماعىنىڭ ارقاسىندا قيىندىقتاردى ەڭسەرە بىلدىك. تاۋەلسىزدىگىمىزدى نىعايتىپ, مەملەكەتتىلىگىمىزدى ساقتاۋ جولىندا ناقتى قادامدار جاسادىق. سونىڭ ناتيجەسىندە بۇگىندە ەلىمىزدە كەشەندى رەفورمالار جۇيەلى تۇردە ىسكە اسىرىلىپ جاتىر.
جالپى 2022 جىل بىزدەر ءۇشىن تۇبەگەيلى وزگەرىستەر جىلى بولدى دەسەك, ارتىق بولا قويماس. الداعى ۋاقىتتا قولعا العان باستامالار لايىقتى جالعاسىن تاۋىپ, 2023 جىل ەلىمىز ءۇشىن تابىستى, بەرەكەلى, قۇتتى جىل بولادى دەپ سەنەمىز. ول ءۇشىن بارلىق ىستە جۇدىرىقتاي جۇمىلىپ ارەكەت ەتۋ اسا ماڭىزدى. سوندا عانا كوزدەگەن ماقسات-مىندەتتەرىمىزگە قول جەتكىزەمىز.
جاڭا جىلدا ءار وتباسىنا قۋانىش, جاقسىلىق, اماندىق تىلەيمىن! ەگەمەن ەلىمىز ءوسىپ-وركەندەي بەرسىن! ءاردايىم ىرگەمىز ءبۇتىن, بىرلىگىمىز بەكەم بولسىن! جاڭا جىلدارىڭىزبەن!», دەلىنگەن قۇتتىقتاۋدا.