پرەزيدەنت اكىمشىلىگىنىڭ كەلىسىمى بويىنشا, پاۆلودار وبلىسى اكىمىنىڭ وكىمىمەن اكىمنىڭ ءبىرىنشى ورىنباسارى بولىپ حاسار حابىلبەكوۆ تاعايىندالدى. ول ەنەرگەتيكا, تۇرعىن ءۇي-كوممۋنالدىق شارۋاشىلىق جانە قۇرىلىس ماسەلەلەرىنە جەتەكشىلىك ەتەتىن بولادى, دەپ حابارلايدى Egemen.kz
بۇرىن وسى لاۋازىمدا قىزمەت اتقارعان ولەگ كرۋك ءوز ءوتىنىشى بويىنشا قىزمەتىنەن بوساتىلدى.
حاسار ايتپەك ۇلى 1986 جىلى تۋعان, ەكى جوعارى ءبىلىمى بار, 2006 جىلى قازاق قۇقىقتانۋ جانە حالىقارالىق قاتىناستار ينستيتۋتىن «قۇقىقتانۋ باكالاۆرى» ماماندىعى بويىنشا, 2014 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىن «كولىك قۇرىلىسى» ماماندىعى بويىنشا اياقتاعان. تەحنيكا جانە تەحنولوگيا ماگيسترى.
ەڭبەك جولىن 2008 جىلى مەملەكەتتىك ەمەس قۇرىلىمداردا باستاعان. 2017 جىلدان 2021 جىلعا دەيىن وبلىس اكىمى اپپاراتىنىڭ باس ينسپەكتورى, تەرەڭكول اۋدانى جانە شارباقتى اۋدانى اكىمدەرىنىڭ ورىنباسارى, ەكىباستۇز قالاسى اكىمىنىڭ ورىنباسارى, اقسۋ قالاسى اكىمى اپپاراتىنىڭ باسشىسى, «پاۆلودار وبلىسىنىڭ قۇرىلىس باسقارماسى» مم باسشىسى قىزمەتتەرىن اتقاردى.
2021 جىلدىڭ تامىز ايىنان باستاپ وسى ۋاقىتقا دەيىن پاۆلودار قالاسى اكىمىنىڭ ورىنباسارى قىزمەتىن اتقاردى.
اسايىن بايحانوۆ پاۆلودار وبلىسى اكىمىنىڭ ءبىرىنشى ورىنباسارى الدىندا تۇرعان مىندەتتەردى اتاپ ءوتتى. ءبىرىنشى كەزەكتە وعان ەكىباستۇز قالاسىنا بارىپ, جەرگىلىكتى جەردە تۇرعىن ۇيلەردى جىلۋمەن جابدىقتاۋ جۇيەسىن رەتتەۋ بويىنشا جۇمىستار جۇرگىزۋ, توتەنشە جاعدايدان كەيىن قالاداعى جاعدايدى جاقسارتۋ بويىنشا جەدەل ارەكەت ەتۋ جانە شەشىمدەر قابىلداۋ تاپسىرىلدى.