فاريزا وڭعارسىنوۆا اتىنداعى №77 مەكتەپ-گيمنازياسىنىڭ ءماجىلىس زالىندا مەملەكەتتىك سىيلىقتىڭ لاۋرەاتى, كورنەكتى اقىن فاريزا وڭعارسىنوۆاعا ارنالعان «اقىن جۇرەگىندەگى ەلوردا» اتتى ەسكە الۋ كەشى ءوتتى. شاراعا پارلامەنت ءماجىلىسىنىڭ دەپۋتاتتارى ساۋىتبەك ابدراحمانوۆ, دارحان مىڭباي, قوعام قايراتكەرى زەينوللا الشىمباەۆ, ادەبيەتتانۋشى-عالىمدار باۋىرجان وماروۆ, امانتاي ءشارىپ, اقىندار وڭايگۇل تۇرجان, جانات اسكەربەكقىزى سىندى زيالى قاۋىم وكىلدەرى قاتىستى.
شارا باسىندا اقىن ومىرىنەن سىر شەرتكەن قويىلىم قويىلىپ, ومىرگە كەلگەن ساتىنەن ەل قوشەمەتىنە بولەنگەن تۇسىنا دەيىنگى شەجىرەلى ءومىرى ورنەكتەلدى. مۇنان سوڭ اكادەميك, جيىننىڭ مودەراتورى كارىمبەك قۇرماناليەۆ كەلگەن قوناقتارعا ءسوز بەردى.
قوعام قايراتكەرى زەينوللا الشىمباەۆ وتكەن شاققا كوز جۇگىرتىپ, فاريزا – جىردىڭ بولاشاقپەن قاۋىشقانىن ايتتى.
«60-جىلدارى, ستۋدەنت كەزىمىزدە, جاستاردا ادەبيەتكە دەگەن ەرەكشە قۇشتارلىق بولاتىن. گازەتتىڭ بەتىنە جاقسى ولەڭدەر شىقسا, ىزدەپ ءجۇرىپ وقيتىنبىز. فاريزا اپامىزدىڭ ولەڭدەرىن ءا دەگەننەن-اق وقىپ, ءسۇيسىنىپ جۇرەتىنبىز. حالقىمىزدىڭ بەلگىلى اقىنى ءابدىلدا تاجىباەۆتىڭ فاريزا تۋرالى «ولەڭشىمەن ەمەس, اقىنمەن كەزدەستىم, كەزدەستىم دە شەكسىز قۋاندىم» دەيتىن ءسوزى بار. ءبىز بۇگىن بولاشاقپەن جۇزدەسكەن اقىن اپامىزدىڭ شاراسىندا وتىرمىز», دەدى.
ال تانىمال قالامگەر ساۋىتبەك ابدراحمانوۆ ەلىمىزدىڭ ەسەسى كەتكەن سىندارلى ۋاقىتتا اقىننىڭ داتكە قۋات بولعانىن جەتكىزدى.
ء«بىز بۇل كۇنگە وپ-وڭاي جەتكەن جوقپىز. وسى قالانىڭ اتى تسەلينوگراد ەدى. بۇل قالادا جالعىز عانا قازاق مەكتەبى بار-تىن. ونىڭ كوشەسى «كازاحسكايا» دەپ اتالاتىن. ءتىپتى رەسپۋبليكامىزدىڭ سول كەزدەگى استاناسى الماتىدا جالعىز قازاق مەكتەپ-ينتەرناتى بولاتىن. سونداي زاماندار بولعان. اعالارىمىز ء«بىز وسى قالادا اۆتوبۋستا قازاقشا سويلەپ كەلە جاتساق, ءبىزدى توقتاتىپ ورىسشا سويلەڭدەر دەپ ايتاتىن, قورىققانىمىزدان تۇسكەنشە ورىسشا سويلەيتىنبىز» دەيتىن. وسىنداي قىتىمىر زاماندا فاريزاداي ەرلەر شىققان. ءبىز نەگە فاريزا اپامىزدى وسىنشالىق ايالايمىز, ارداقتايمىز, قۇرمەتتەيمىز؟ ويتكەنى كەشەگى قىستالاڭ زاماندا قازاقتىڭ ەسەسى كەتىپ, ۇپايى ۇتىلىپ جاتقان كەزدە سىزدەردىڭ مەكتەپكە اتى بەرىلگەن, اڭىزعا اينالعان قازاقتىڭ قايسار قىزى ۇلتتىڭ مۇڭىن مۇڭداپ, جوعىن جوقتاعان. فاريزا اپامىزدىڭ ەڭبەگىن تەك قازاق پوەزياسىنا سىڭىرگەن ەڭبەگىمەن باعالاۋعا بولمايدى. جالپى, فاريزا – جالعىز ادەبيەت پەن مادەنيەتتىڭ اۋماعىنا سىيمايتىن ادام» دەپ سالماقتى ويىن ساباقتادى قالامگەر.
اقىن وڭايگۇل تۇرجان پوەزياداعى ۇستازىنىڭ ماحاببات ليريكاسىنا وزگەرىس اكەلگەنى تۋرالى تولعادى.
«فاريزا اقىننىڭ ماحابباتتى نازىك, مۇڭايعان, ءالسىز, جارىمجان, ءتۇرتىپ قالساڭ, ەڭىرەپ قويا بەرەيىن دەپ تۇرعان جىلاۋىق ۇعىم شەكاراسىنان اسقاق تا ءور سەزىم دەڭگەيىنە الىپ شىققانى شىنىندا دا ۇلى وزگەرىس ەدى. شىنىندا دا رەۆوليۋتسيا ەدى. ال قانداي توڭكەرىس بولسا دا, قاشاندا قارسىلىققا تاپ بولىپ وتىراتىندىعىن تاعى بىلەمىز. سوسىن, سىنعا ۇشىرايدى. وزىندىك وپپوزيتسيانى قالىپتاستىرادى.
«جانىم-اي, ءوزىڭ بە بۇل,
بارمىن با مەن؟
قانشا كۇن بۇل ءسات جايلى ورتەدى ءۇمىت.
كەۋدەمدى جاناعاندا بالعىن دەنەڭ,
دۇنيە كەتتى-اۋ دەيمىن توڭكەرىلىپ», –
دەگەنىن ولەڭىن گازەت بەتىنەن وقىعان كەزدە, 70-جىلداردىڭ سىنشىلارى شوشىپ كەتتى. تەك مۇنىڭ عاجاپ پوەزيا ەكەندىگىن العاش مويىنداعان ءبىر ادام بولدى. ول قازاق پوەزياسىنىڭ كلاسسيگى ءابدىلدا تاجىباەۆ ەدى. «ادامنىڭ شارتتى تۇردەگى ەرەجەلەرگە, كانوندارعا, ەسكىرگەن ادەت, داستۇرلەرگە تۇتقىن بولىپ قالماي بوسانۋىن, ءوز سەزىمىن ۇرلاماي, جاسىرماي, بۇكپەي سويلەۋىن قازاق پوەزياسىندا باتىل جىرلاعان وسى فاريزا», دەدى اقىن.
شارا بارىسىندا قوناقتارعا «فاريزاتانۋ» بولمەسى تانىستىرىلىپ, «مەكتەپ تىنىسى» اتتى وقۋشىلاردىڭ شىعارماشىلىق جۇمىستارى كورسەتىلدى. سونىمەن قاتار مەكتەپتەگى ۇلت اسپاپتار وركەسترىنىڭ سۇيەمەلدەۋىمەن كۇي ورىندالىپ, كەشتىڭ كوركىن كىرگىزدى.