بۇل كۇندەرى الماتىدا سپورتتىق مەديتسينا جانە وڭالتۋ ورتالىعىنىڭ مۇرىندىق بولۋىمەن وتاندىق سپورت دارىگەرلەرىنىڭ بىلىكتىلىگىن ارتتىرۋ كۋرستارى وتۋدە. اتالعان شاراعا جەرلەستەرىمىزدەن بولەك, رەسەي, بەلارۋس, ءۇندىستان جانە يراننان كەلگەن بىلىكتى كاسىبي ماماندار قاتىسۋدا, دەپ حابارلايدى Egemen.kz.
قازاقتىڭ سپورت جانە تۋريزم اكادەمياسى عيماراتىندا ءوتىپ جاتقان جيىن بارىسىندا الەمدىك دەڭگەيدەگى ساراپشىلار جوعارى ناتيجەلەرگە قول جەتكىزۋ ءۇشىن كوپتەگەن سپورت ءتۇرى وكىلدەرىنىڭ قولدانىپ جۇرگەن بىرەگەي تاجىريبەلەرى مەن ادىستەردى تانىستىرادى. سالماق قۋدان كەيىن سپورتشىنىڭ قايتا قالىپا كەلۋى, جاراقاتتانۋدىڭ الدىن الۋ, رەجيم ساقتاۋ مەن ءار جارىستان سوڭ وڭالتۋ پروتسەسسىنىڭ قالاي جۇرگىزۋ قاجەت جانە سول سەكىلدى تاعى باسقا كەلەلى ماسەلەلەر بويىنشا كەڭىنەن اڭگىمە قوزعالدى. وسى سالادا ەڭبەك ەتىپ جۇرگەن تراۆماتولوگ, ورتوپەد, رەابيليتولوگ, فارماكولوگ, نۋتريتسيولوگ جانە ديەتولوگ ماماندارى, عىلىمي قىزمەتكەرلەر, باپكەرلەر مەن سپورتشىلار تاراپىنان تۇيدەك-تۇيدەك ويلار ايتىلدى.
«قازاقستاننىڭ سپورتتى زاماناۋي تالاپتارىنا ساي دامۋى ءۇشىن وسىنداي جيىنداردىڭ ءجيى ۇيىمداستىرۋ قاجەت. قازىرگى كەزدە سپورت ءبىر ورنىندا تۇرعان جوق. ول ۇنەمى دامۋ ۇستىندە. مەديتسينا دا ءدال سول سەكىلدى. سول سەبەپتى دە ءبىز وسى ينفراقۇرىلىمعا كىرەتىن بارلىق ينستيتۋتتاردى قالىپتاستىرىپ, ەلدەگى سپورتشىلاردى قولداۋ جۇيەسىن بارىنشا دامىتۋىمىز كەرەك. ال ول ءۇشىن مەديتسينا سالاسى بويىنشا مىقتى ماماندار دايارلاپ, ولاردىڭ بىلىكتىلىگىن ۇنەمى جەتىلدىرىپ وتىرۋىمىز قاجەت. بۇگىنگى تاڭدا مەديتسيناسىز سپورت العا جىلجىمايدى. سونى ءبىر ساتكە دە قاپەردەن شىعارۋعا بولمايدى», دەدى سپورتتىق مەديتسينا جانە وڭالۋ ورتالىعىنىڭ ديرەكتورى ازامات نۇرماتوۆ.
سونداي-اق وسى جيىن بارىسىندا قازاقستاندىق مەيىربەك كولباەۆ, رەسەيلىك ماكسيم نيكيتين, يراندىق رامين اميرساسان, بەلارۋسسيالىق ەۆگەني اكيموۆ, ۇندىستاندىق ااشيش چاۋدحري جانە تاعى باسقا ءوز سالاسىنىڭ بىلگىر ماماندارى بايانداما جاسادى. اتالعان شارا 22 جەلتوقسانعا دەيىن سوزىلادى.