ەلوردادا قازاقستان مەن وڭتۇستىك كورەيا رەسپۋبليكاسى اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولۋىنا, كورەي ەتنوسىنىڭ قازاقستانعا قونىستانعانىنا 85 جىل تولۋىنا وراي قايىرىمدىلىق كونتسەرتى ءوتتى.
مۇنداعى باستى ماقسات – تۇراقتىلىق پەن ۇلتارالىق كەلىسىمدى نىعايتۋ. ەلىمىزدىڭ مادەنيەتارالىق جەتىستىكتەرىمەن ءبولىسۋ, سونداي-اق قازاقستاندا تۇراتىن ەتنوستاردىڭ ادەت-عۇرپى, سالت-ءداستۇرى مەن مادەنيەتىنە قۇرمەتپەن قاراۋعا تاربيەلەۋ.
استانا قالاسىنداعى كورەي ەتنوسىنىڭ ەتنومادەني بىرلەستىگى شىعارماشىلىق ۇجىمدارى ۇيىمداستىرعان شاراعا وڭتۇستىك كورەيانىڭ قازاقستانداعى تۇراقتى جانە وكىلەتتى ەلشىسى كۋ حونگ-سوك جينالعان جۇرتشىلىقتى تاۋەلسىزدىك مەرەكەسىمەن قۇتتىقتاپ, يگى تىلەگىن ءبىلدىردى.
«بۇل جىلى كورەي ەتنوسىنىڭ قازاقستانعا قونىستانعانىنا 85 جىلىن تويلاۋى ماعان وتكەنگە كوز جۇگىرتۋگە مۇمكىندىك بەردى. سوناۋ قيىن-قىستاۋ زاماندا تاعدىر-تالايىمەن قازاقستانعا تەنتىرەپ كەلگەن كورەي حالقىن قۇشاق جايا قارسى الىپ, باۋىرىنا باسىپ, قولىنداعى ءبىر ءۇزىم نانىمەن ءبولىستى. وسى ءبىر قىسىلتاياڭ شاقتاعى اۋىرتپاشىلىقتا قول سوزعان قازاق حالقىنا ريزاشىلىعىمىزدى بىلدىرەمىز. قازىر قازاقستان ازاماتى رەتىندە ەلدىڭ دامۋىندا يىق تىرەسە جۇمىس ىستەپ, ۇلەس قوسىپ جاتىر», دەيدى كۋ حونگ-سوك.
كەشكە قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ, ىشكى ساياسات باسقارماسىنىڭ ورىنباسارى ءلاززات قۇسايىنوۆا قاتىستى.
قايىرىمدىلىق كونتسەرتىندە حالىقارالىق بايقاۋلاردىڭ لاۋرەاتتارى «Art music» توبى, ماسكەۋ كامەرالىق فيلارمونياسىنىڭ جانە نيۋ-يورك قالاسىنىڭ «جاڭا ءداۋىر – جاڭا ەسىمدەرى» جوباسىنىڭ ءسوليسى تەن يلونا, «سالمۋنوري» بارابانشىلار توبى ونەر كورسەتتى.
ۇيىمداستىرۋشىلاردىڭ ايتۋىنشا, جينالعان قارجى قيىن ومىرلىك جاعدايعا تاپ بولعان ەڭبەك ارداگەرىنىڭ يگىلىگىنە جۇمسالادى.
زەيىن ەرعالي,
«Egemen Qazaqstan»