قازاقستاندا 2023-2025 جىلدار اراسىندا «جايلى مەكتەپ» ۇلتتىق جوباسى اياسىندا مەملەكەت باسشىسىنىڭ تاپسىرماسى بويىنشا 400-دەن اسا مەكتەپ سالىنادى. پرەمەر-ءمينيستردىڭ ورىنباسارى التاي كولگىنوۆتىڭ باسشىلىعىمەن ۇكىمەتتە وتكەن كەڭەستە وسى جوبانى ىسكە اسىرۋ ماسەلەلەرى قارالدى.
كەڭەسكە وڭىرلەر مەن قالالار اكىمدىكتەرىنىڭ, وقۋ-اعارتۋ مينيسترلىگى, يندۋستريا جانە ينفراقۇرىلىمدىق دامۋ مينيسترلىگىنىڭ, «Samruk-Kazyna Construction» اق جانە باسقا دا مەملەكەتتىك ورگانداردىڭ باسشىلارى قاتىستى.
ۇلتتىق جوبانى ىسكە اسىرۋ ارقاسىندا رەسپۋبليكادا 840 مىڭنان اسا وقۋشى ورنى (ەكى اۋىسىمدا) قۇرىلادى. ا.كولگىنوۆ قاجەتتىلىك بار قالالار مەن اۋدانداردا جاڭا فورماتتاعى مەكتەپتەر سالۋدىڭ ماڭىزدى ەكەنىن اتاپ ءوتتى. ماسەلەن, 2023 جىلى اكىمدىكتەر وقۋ-اعارتۋ مينيسترلىگىمەن جانە جانە «Samruk-Kazyna Construction» اق ۇلتتىق جوباسىنىڭ بىرىڭعاي وپەراتورىمەن بىرلەسىپ, 467 800 وقۋشىعا ارنالعان 221 مەكتەپ سالۋعا كىرىسۋى قاجەت.
ء«ىرى قالالاردا ىشكى كوشى-قوننىڭ ۇلەسى ەداۋىر ەكەنىن, تۋ كوەففيتسيەنتى مەن حالىقتىڭ تىعىزدىعى جوعارى ەكەنىن ەسكەرە وتىرىپ, مەكتەپتەردە 2,5 مىڭ وقۋشىعا ارنالعان ورىن بولۋى كەرەك. مۇنداي ۇلكەن مەكتەپتەر تيپتىك مەكتەپتەرمەن سالىستىرعاندا 2-3 ەسە كوپ وقۋشى ورىندارىن قۇرۋعا مۇمكىندىك بەرەدى. بۇل اپاتتى مەكتەپتەردى جويۋ, ءۇش اۋىسىممەن وقىتاتىن جانە تىعىزدالعان وقىتۋ رەجىمى ماسەلەلەرىن شەشۋگە, ءبىلىم بەرۋ ساپاسىن ەداۋىر ارتتىرۋعا جانە وقىتۋ ءۇشىن قولايلى جاعدايلار جاساۋعا مۇمكىندىك بەرەدى. بۇل ماسەلە – مەملەكەت باسشىسىنىڭ باقىلاۋىندا», دەدى ا.كولگىنوۆ.
ۆيتسە-پرەمەر وسى جىلدىڭ سوڭىنا دەيىن ۇلتتىق جوبانى ىسكە اسىرۋدىڭ ناقتى مەرزىمدەرىن كورسەتە وتىرىپ, جول كارتاسىن بەكىتۋ, باسشىلىقتان جاۋاپتى تۇلعالاردى بەكىتۋ, وقۋ وردالارىنىڭ قاجەتتىلىكتەرىن ەسكەرە وتىرىپ, جەر ۋچاسكەلەرىن راسىمدەۋ بويىنشا جۇمىستى اياقتاۋ, 2023 جىلدىڭ كوكتەمىندە جاڭا فورماتتاعى مەكتەپتەردىڭ قۇرىلىسىن باستاۋ بويىنشا مىندەتتەردى ناقتىلادى.