كەنيانىڭ ماكۋەني اۋدانىندا تۇراتىن ءتورت جاسار بالا افريكانىڭ ءشول دالاسىندا التى كۇن اداسىپ جۇرگەن, دەپ حابارلايدى Egemen.kz.
بالا اعالارىمەن ايدالادا مال باعىپ ءجۇرىپ اداسىپ كەتكەن. ونى ىزدەۋگە 70 ادامنان تۇراتىن ىزدەۋ-قۇتقارۋ توبى كىرىستى. سونداي-اق ولارعا David Sheldrick Trust ۇيىمى كومەكتەسىپ, جوعالعان بالانى اۋەدەن ىزدەي باستاعان.
تولاسسىز جاۋىن سالدارىنان بالانىڭ ءىزىن تابۋ مۇمكىن بولماي قالعان.
ء«تورت ساعاتتىق ىزدەستىرۋدەن كەيىن ءبىز بوس جانارماي باگىنان باسقا ەشتەڭە تاپپادىق. سونداي-اق جىرتقىشتاردى كەزدەستىردىك. مۇنداي ورتا كىشكەنتاي بالانى ايتپاعاندا, وندا جالعىز جۇرگەن كەز كەلگەن ادام ءۇشىن وتە قاۋىپتى. بالا شولدەگەندە جاڭبىر سۋىن ءىشىپ, جان باققان», دەدى David Sheldrick Trust ۇيىمىنىڭ ۇشقىشى روان كارر-حارتلي جۋرناليستەرگە بەرگەن سۇحباتىندا.
ىزدەستىرۋ جۇمىستارىنىڭ التىنشى كۇنى قۇتقارۋشىلار جوعالعان بالانىڭ ىزدەرىن كەزىكتىرگەن. كارر-حارتلي تەز ارادا ۇشاققا ءمىنىپ, كورسەتىلگەن كوورديناتتار بويىنشا ۇشىپ جەتەدى. ءبىراز ۋاقىتتان كەيىن ول بۇتالاردىڭ اراسىندا تىعىلىپ جاتقان بالانى بايقاعان.
«مەن ءوز كوزىمە ءوزىم سەنە المادىم. شەكسىز جابايى تابيعات اياسىندا كىشكەنتاي بالانىڭ امان-ەسەن تابىلۋى تاڭعالارلىق», دەيدى ۇشقىش.
بالا قورىققاننان قايتا اداسىپ كەتپەس ءۇشىن قۇتقارۋشىلار بالانى اينالا قورشاپ, جاقىنداعان. سودان كەيىن العاشقى مەديتسينالىق كومەك كورسەتىلگەن.
بالانىڭ بۇكىل دەنەسىن تىكەندى بۇتالار جىرىپ كەتكەن. ءوزىن ابدەن ماسا شاققان. بالا قازىرگى ساتتە اۋرۋحانادا جاتىر.