سەناتتىڭ قارجى جانە بيۋدجەت كوميتەتىنىڭ دەپۋتاتتارى قارجى مينيسترلىگىنىڭ باسشىلىعىمەن بىرگە ترانسفەرتتىك باعا بەلگىلەۋ ماسەلەلەرىن تالقىلادى, دەپ حابارلايدى Egemen.kz.
كوميتەت توراعاسى سەرىكباي ترۇموۆ وتىرىستى اشا كەلىپ, ترانسفەرتتىك باعا بەلگىلەۋ تەتىكتەرى مەملەكەتتىڭ كەلەشەكتەگى كىرىستەرىنىڭ جويىلماۋىنا ىقپال ەتەتىن ءتۇرلى فاكتورلاردى رەتتەيتىنىن اتاپ ءوتتى.
«ەلىمىزدە ترانسفەرتتىك باعا بەلگىلەۋ تۋرالى زاڭ 10 جىلدان استام ۋاقىت جۇمىس ىستەپ كەلەدى. وسى ۋاقىت ىشىندە ءتيىستى ورگاندار كوپتەگەن سالىقتىق تەكسەرۋلەرىن جۇرگىزدى, سونىڭ ناتيجەسىندە بيۋدجەتكە قوسىمشا قارجى ءتۇستى», دەپ اتاپ ءوتتى سەناتور.
قارجى ءمينيسترىنىڭ ورىنباسارى ەرجان ءبىرجانوۆ مەملەكەت باسشىسىنىڭ تاپسىرماسى بويىنشا ازىرلەنىپ جاتقان, ترانسفەرتتىك باعا بەلگىلەۋدى باقىلاۋ شارالارىن كۇشەيتۋگە, سونداي-اق ەكونوميكالىق ىنتىماقتاستىق جانە دامۋ ۇيىمىنىڭ حالىقارالىق تالاپتارىن ورىنداۋعا باعىتتالعان زاڭ جوباسى تۋرالى پارلامەنتشىلەرگە ايتىپ بەردى.
كەزدەسۋگە قاتىسۋشىلار «ترانسفەرتتىك باعا بەلگىلەۋ تۋرالى» زاڭعا ەنگىزىلگەن وزگەرىستەردى دە تالقىلادى. دەپۋتاتتارعا زاڭ جوباسىنا بىرقاتار تۇجىرىمدامالىق وزگەرىستەر ەنگىزىلگەنى ايتىلدى. ولاردىڭ قاتارىندا قازاقستاننىڭ تاۋار بيرجالارىندا كاپيتالدى شىعارۋعا باقىلاۋدى كۇشەيتۋ ماقساتىندا نارىق اياسىن ايقىنداۋ تەتىگىن ەنگىزۋ, جاسالعان مامىلەلەردىڭ ترانسفەرتتىك باعا بەلگىلەۋىنە باقىلاۋدى قايتارۋ جانە وزگە دە وزگەرىستەر بار.
سەناتورلار كەزدەسۋ قورىتىندىسى بويىنشا ازىرلەنىپ جاتقان زاڭ جوباسىنا بىرقاتار تولىقتىرۋلار ۇسىندى, ولار كەيىننەن سالالىق مينيسترلىكتىڭ جۇمىسىندا ەسكەرىلەتىن بولادى.