3 جەلتوقسان كۇنى تاڭەرتەڭ مال ىزدەۋگە شىعىپ, ۇيىنە ورالماعان شوپان تابىلدى, دەپ حابارلايدى Egemen.kz قاراعاندى وبلىسى تجد ءباسپاسوز قىزمەتىنە سىلتەمە جاساپ.
«3 جەلتوقسان كۇنى ساعات 19:30-دا قاراعاندى وبلىسىنىڭ توتەنشە جاعدايلار دەپارتامەنتىنە وساكاروۆ اۋدانى تەلمانسكوە اۋىلىنىڭ تۇرعىنى جوعالىپ كەتكەنى تۋرالى حابارلاما كەلىپ ءتۇستى. 1966 جىلى تۋعان ەر ادام تاڭەرتەڭ مال ىزدەۋگە شىعىپ, ۇيىنە ورالماعان», دەلىنگەن حابارلامادا.
تجد مالىمەتىنشە, ىزدەۋ-قۇتقارۋ جۇمىستارىن جۇرگىزۋ ءۇشىن تجد, پوليتسيا, جەرگىلىكتى اتقارۋشى ورگاندار جانە جەرگىلىكتى تۇرعىندار قاتارىنان ىزدەۋ توپتارى جىبەرىلگەن. 4 جەلتوقساندا جوعالعان ادامدى ىزدەۋگە «قازاۆياقۇتقارۋ» اق تىكۇشاعى جۇمىلدىرىلعان. اۋەدەن ىزدەۋ جۇمىستارى تەلمان, شوقاي جانە سارىوزەك اۋىلدىق وكرۋگتەرىنىڭ اۋماعىندا جۇرگىزىلگەن.
4 جەلتوقسان كۇنى تۇستەن كەيىن جوعالعان ادام سارىوزەك اۋىلىنان تابىلعان. ەر ادام قاتتى بوراننىڭ سالدارىنان جولىنان اداسقان. شامامەن 60 كم ءجۇرىپ ءوتىپ, ول ەسكى قاراۋسىز قالعان ءۇيدى پانالاپ, سول جەردە تۇنەگەن. ەر ادامدا ءبارى جاقسى, جىلى كيىنگەنىنىڭ ارقاسىندا جان ساقتاعان ەكەن. مەديتسينالىق كومەك قاجەت بولمادى.