شىلدە ايىندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ جاڭا جۇمىس ورىندارىن اشۋ قاجەتتىگىن بارلىق دەڭگەيدەگى اكىمدەرگە اتاپ تاپسىرعان ەدى.
«ەڭ الدىمەن, جەرگىلىكتى جەرلەردە ءتيىمدى جۇمىس جۇرگىزىلۋى كەرەك. اكىمدەر جىل سايىن ءاربىر 10 مىڭ تۇرعىنعا 100 جاڭا جۇمىس ورنىن اشۋعا ءتيىس», دەگەن پرەزيدەنت تاپسىرماسى قاي كەزدە دە ماڭىزدى. ءوڭىردىڭ ونەركاسىپ سالاسىندا ويىپ تۇرىپ الار ورنى بار, جۇيە قۇراۋشى كاسىپورىن سانالاتىن «Super Pharm» فارماتسەۆتيكالىق زاۋىتى قاسىنان «ەرساد – 2021» زاۋىتى اشىلدى. جاڭا ءوندىرىس وشاعىنىڭ ىسكە قوسىلۋى جەرگىلىكتى تۇرعىنداردى جۇمىسپەن قامتۋعا سەپ بولارى انىق. جالپى, زاۋىت باسشىلىعى سوڭعى ۋاقىتقا دەيىن شيكىزات اتاۋلىنى قىتاي, رەسەي ەلدەرىنەن ەكسپورتتاپ جۇرگەن. ەندى سول ولقىلىقتىڭ ورنى تولتىرىلدى. بۇدان بىلاي قاجەتتى شيكىزاتتى زاۋىت ماڭىنداعى فابريكا قامتاماسىز ەتۋگە قاۋقارلى.
زاۋىت قىزمەتكەرلەرى اۋىل شارۋاشىلىعى, قۇرىلىس, جول قۇرىلىسى, مەديتسينا سالالارىندا قولدانىلاتىن توقىما ەمەس ماتەريال وندىرۋگە باسا نازار اۋدارىپ وتىر.
«ەندى ءبىز شيكىزات ءۇشىن رەسەي مەن قىتايعا تاۋەلدى بولمايمىز. قيىندىقتار كەزدەستى. رۋبل كوتەرىلدى. سوسىن قىتايعا اۋىستىق. ول كەزدە دە ماسەلە تۋىندادى. شيكىزات جەتەدى دەگەنشە 3-4 اي ۋاقىت كەتەدى. جاڭا بيىككە كوتەرىلۋىمىزگە پاندەميا اسەر ەتتى. قيىن-قىستاۋ ۋاقىتتا ءبىز وزگە ەلدەردەن شيكىزات الا المادىق. سول كەزدە: «ورىس پەن قىتايدىڭ قولىنان كەلەتىن ءىستى ءبىز ىستەي المايمىز با؟» دەگەن وي كەلدى. قاجەتتى قۇرىلعىلاردى ساتىپ الىپ, ەكى جارىم ايدىڭ ىشىندە ءىستى باستادىق. ماسەلەن, جول قۇرىلىسىندا بەتوننىڭ استىنا سالىناتىن ماتا بار عوي. ەندى سونى ءبىز وندىرەمىز. جىلىجايلاردى جابۋعا قاجەتتى ماتالاردى دا شىعاراتىن بولامىز. جيھازدى قاپتايتىن ماتالار دا بىزدە وندىرىلمەك. مەديتسيناعا قاتىستى بۇيىمداردى بۇعان دەيىن دە ايتىپ ءجۇرمىز. ونى قايتالاپ جاتۋدىڭ قاجەتى جوق شىعار», دەيدى «Super Pharm» جشس قۇرىلتايشىسى قايرات قايمولداەۆ.
ونىڭ ايتۋىنشا, مۇنداي زاۋىت تمد ەلدەرىندە ءۇش ەلدە عانا بار ەكەن. ونىڭ ءبىرى ماسكەۋدە بولسا, ەكىنشىسى – ۋكراينادا. ءۇشىنشىسى, وسى «ەرساد – 2021» عانا. راس, ماسكەۋدە تاعى بىرنەشە زاۋىت بار. الايدا قۋاتتىلىعى جاعىنان ۇزدىك ۇشتىككە ماڭايلاي المايدى.
«بىزدە جالعىز عانا ماقسات بار. ەلىمىزگە شەتەلدىك ءونىمدى كىرگىزبەۋگە كۇش سالۋعا ءتيىسپىز. بۇل ءۇشىن باعا باقىلاۋدا بولادى. بۇگىندە بىزدە 600-دەن استام ازامات ەڭبەك ەتسە, ولاردىڭ ورتاشا جالاقىسى 180 مىڭ تەڭگەنى قۇرايدى. ودان جوعارى جالاقى الاتىن ازاماتتار دا بارشىلىق. قىزمەتكەرلەردىڭ 99 پايىزى جەرگىلىكتى ازاماتتار ەكەنىن ايتا كەتكەن ءجون. ءشولدالا, ايشا ءبيبى سەكىلدى وزگە دە اۋىلداردان 6 اۆتوبۋس قىزمەتكەرلەرىمىزدى تاسىمالدايدى. تاماعى تەگىن. ولارعا ون ءۇشىنشى, ءتىپتى ون ءتورتىنشى جانە ون بەسىنشى جالاقىنى دا بەرەمىز. ودان بولەك سىياقى الادى», دەدى ق.قايمولداەۆ.
زاۋىت قىزمەتكەرلەرىنىڭ مۇنايدىڭ قالدىعىنان ءجىپ, ودان ماتا شىعارۋدى قولعا العانىن دا ايتا كەتكەن ءجون.
وبلىس اكىمىنىڭ ورىنباسارى قاناتبەك مادىبەكتىڭ ايتۋىنشا, اۋەلدە جۇمىسىن مەديتسنالىق بۇيىمداردىڭ 15 ءتۇرىن وندىرۋدەن باستاعان زاۋىت كەيىننەن 400-گە جەتەقابىل فارماتسۆتيكالىق زاتتارمەن ەلىمىزدى دە, كورشىلەس مەملەكەتتەردى دە قامتىعان ەكەن. وسىلايشا, تۇراقتى جۇمىس ورىندارىنىڭ اشىلۋىنا ىقپال ەتىپ قانا قويماي, جەرگىلىكتى قازىنانىڭ دا ءبۇيىرىن قومپايتا تۇسكەن.
بۇعان دەيىن «Super Pharm» زاۋىتى توقىلماعان ماتەريالدان جاسالعان ءبىر رەتتىك ستەريلدى ەمەس ء«ناريا» مەديتسينالىق حالاتى, حيرۋرگيالىق كيىمدەر جيىنتىعى, مەديتسينالىق بەتپەردەلەر, سيستەمالىق قۇرالدار جانە وزگە بۇيىمداردى ءوندىرۋ ءۇشىن شەتەلگە تاۋەلدى بولسا, ەندى بۇل ماسەلە تولىقتاي شەشىمىن تاپتى. بۇدان بىلاي شيكىزاتتى زاۋىت اۋماعىنداعى فابريكا قامتاماسىز ەتەتىن بولادى. وتكىر ماسەلەنىڭ وڭتايلى شەشىلۋىنە پاندەميانىڭ پايداسى تيگەنىن ق.قايمولداەۆتىڭ ءوزى ايتىپ قالدى. قىسقاسى, پاندەميا قوس بۇيىردەن قىسپاعاندا شيكىزاتقا دەگەن تاۋەلدىلىك تە جويىلماس پا ەدى؟ كىم ءبىلسىن...
جامبىل وبلىسى,
جامبىل اۋدانى,
ايشا ءبيبى اۋىلى