اۋىلى ارالاس, قويى قورالاس جاتقان اعايىنداردىڭ قاي-قايسىسىنىڭ دا ءتۇپ تاريحى, ونەرى مەن سالت-ءداستۇرى, ادەبيەتى مەن مادەنيەتى قازاق ەلىمەن تەرەڭنەن تامىرلاسىپ جاتىر. باۋىرلاس حالىقتاردىڭ ءتۇرلى تاراپتاعى بەكەم بايلانىسى بۇگىنگى تاڭدا دا جالعاسىپ كەلەدى. ماسەلەن, كۇنى كەشە عانا ەل استاناسىندا باستالعان اۋقىمدى ءىس-شارالار وزبەك حالقىنىڭ ونەرىنە ارنالدى. وزبەكستان رەسپۋبليكاسىنىڭ مادەنيەت كۇندەرى اياسىندا ءوتىپ جاتقان رۋحاني جيىن ەكى كۇنگە جالعاسادى.
وزبەك مادەنيەتى كۇندەرىنىڭ دەلەگاتسياسىن مادەنيەت ءمينيسترىنىڭ ءبىرىنشى ورىنباسارى باحادىر احمەدوۆ باستاپ كەلدى. وندا وزبەكستاننان 100-گە تارتا ادامنان تۇراتىن مادەنيەت مينيسترلىگىنىڭ, ونەر اكادەمياسىنىڭ جانە قولونەرشىلەر وداعىنىڭ شىعارماشىلىق ۇجىمدارى بار. اتاپ ايتساق, دەلەگاتسيا قۇرامىندا وزبەكستان باتىرى ءھام حالىق ءارتىسى مۋنوجات يۋلچيەۆ, وزبەكستاننىڭ حالىق ارتىستەرى جەڭىسبەك پيازوۆ, مانسۇر تاشماتوۆ, ماحمۇد نامازوۆ, سونداي-اق مەملەكەتتىك فيلارمونيا, يۋنۋس رادجابي اتىنداعى «ماكوم» ءانسامبلى, «ناۋرىز» بي ءانسامبلى جانە باسقا دا تانىمال مۋزىكالىق ورىنداۋشىلار بار.
وزبەك مادەنيەتىنىڭ العاشقى كۇنىندە استانا قالاسىنىڭ وكج-گە قاراستى كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحاناسىندا ەكى ەلدىڭ ارنايى كىتاپحانالارىنىڭ بىرلەسىپ جاساعان تۇڭعىش جوباسى شوكير حوليكوۆتىڭ «شاي» قىسقامەتراجدى ءفيلمىنىڭ كورسەتىلىمى ءوتتى. ايتا كەتەيىك, بۇل – كانن كينوفەستيۆالىندە مۇمكىندىگى شەكتەۋلى جاندار تۋرالى قىسقامەتراجدى فيلمدەر اراسىنان باس جۇلدەنى يەلەنگەن دىبىسسىز تۋىندى. استانا قالاسىنىڭ ارنايى كىتاپحاناسىنىڭ اتسالىسۋىمەن فيلم زاعيپ جاندارعا ارنالىپ دىبىستالدى.
جيىنعا وزبەكستان رەسپۋبليكاسى مادەنيەت مينيسترلىگى جانىنداعى رەسپۋبليكالىق ورتالىق زاعيپتار كىتاپحاناسىنىڭ ديرەكتورى فارحود دجۋراەۆ, انديجان وبلىستىق زاعيپتار كىتاپحاناسىنىڭ ديرەكتورى ۋرمان نۋرماتوۆ, ناۆوي وبلىستىق زاعيپتار كىتاپحاناسىنىڭ ديرەكتورى باحتيور ابدۋللاەۆ, قاراقالپاقستان رەسپۋبليكاسى رەسپۋبليكالىق زاعيپتار كىتاپحاناسىنىڭ ديرەكتورى اليما احەتوۆا, قازاقستان رەسپۋبليكاسى مادەنيەت جانە سپورت مينيسترلىگى مادەنيەت كوميتەتى مۋزەيلەر مەن كىتاپحانالار باسقارماسىنىڭ باسشىسى گۇلزەينەپ پازىلوۆا, استانا قالاسى مادەنيەت باسقارماسىنىڭ باسشىسى سانات شاپاشوۆ, پرەزيدەنت جانىنداعى ۇلتتىق قۇرىلتاي مۇشەسى, استانا قالاسى وزبەك ەتنومادەني ورتالىعىنىڭ توراعاسى شەرزود پۋلاتوۆ قاتىستى.
ۇيىمداستىرۋشىلار اتالعان ءىس-شارا ەكى ەل ىنتىماقتاستىعى مەن بىرلەستىگىن نىعايتا ءتۇسۋ جۇمىستارىن مولايتىپ, ەكى ەل كىتاپحانالارىنىڭ وقىرماندار ءۇشىن بىرلەسە جۇمىس اتقارۋىنىڭ باستاماسى بولۋ, سونداي-اق ەرەكشە جاندار تۋرالى ءفيلمدى كوپشىلىك قاۋىمعا, قازاقستان جۇرتشىلىعىنا كەڭىنەن ناسيحاتتاۋ, جاستاردىڭ ۇلكەنگە دەگەن, قوعامداعى ادامداردىڭ ءبىر-بىرىنە دەگەن قامقورلىعى مەن مەيىرىمىن ارتتىرا تۇسۋگە شامالى بولسا دا تۇرتكى بولۋدى ماقسات ەتىپ وتىر دەدى.
كورسەتىلىم بارىسىندا ەلورداداعى وزبەك مادەني ورتالىعىنىڭ ونەرپازدارى ءھام ارنايى مادەني كىتاپحانانىڭ زاعيپ وقىرماندارى ونەر كورسەتىپ, ەكى تاراپتان كورمە ۇسىنىلدى. سونىمەن قاتار «كورۋ قابىلەتى ناشار ادامدار ءۇشىن قولجەتىمدى ورتا قۇرۋ» تاقىرىبىندا دوڭگەلەك ۇستەل ۇيىمداستىرىلدى. ودان بولەك قازاق ۇلتتىق ونەر ۋنيۆەرسيتەتىندە وزبەكستان رەسپۋبليكاسىنىڭ حالىق جانە ەڭبەك سىڭىرگەن ارتىستەرىنىڭ قاتىسۋىمەن شەبەرلىك سىنىپتارى ءوتتى.
وزبەك مادەنيەتىنىڭ قازاقستانداعى ەكىنشى كۇنىندە قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ساحناسىندا شىعارماشىلىق ۇجىمداردىڭ, وزبەكستاننىڭ مادەنيەت جانە ونەر وكىلدەرىنىڭ قاتىسۋىمەن مەرەكەلىك گالا-كونتسەرت وتەدى. وعان قوسا تەاتر فويەسىندە وزبەكستاننىڭ ۇلتتىق قولونەر جانە بەينەلەۋ ونەرى ۇلگىلەرىنىڭ كومپوزيتسيالىق كورمەسى قويىلادى. ايتا كەتەيىك, بۇل ءىس-شارانىڭ ەكىجاقتى ماڭىزى ۇلكەن. ويتكەنى 23 قاراشادا قازاقستان رەسپۋبليكاسى مەن وزبەكستان رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا 30 جىل تولادى.