قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى ورتالىق ازيا مەملەكەتتەرى جانە ەۋروپالىق وداقتىڭ سىرتقى ىستەر ۆەدومستۆولارى باسشىلارىنىڭ 18-ءشى كەزدەسۋىنە قاتىستى, دەپ حابارلايدى Egemen.kz.
ەو دەلەگاتسياسىن ەۋروكوميسيانىڭ ۆيتسە-پرەزيدەنتى جانە ەو سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى ج.بوررەلل مىرزا باسقاردى.
كەزدەسۋ بارىسىندا وزەكتى وڭىرارالىق جانە جاھاندىق ماسەلەلەر, سونىڭ ىشىندە قاۋىپسىزدىكتىڭ جالپى سىن-قاتەرلەرى, اۋعانستانداعى جاعدايدى قوسا العاندا, ەكونوميكالىق, ساۋدا جانە ينۆەستيتسيالىق ىنتىماقتاستىقتى, قورشاعان ورتانى قورعاۋ, سۋ پايدالانۋ جانە كليمات, سونداي-اق ءبىلىم, عىلىم جانە يننوۆاتسيا سالالارىنداعى ءوزارا ءىس-قيمىلدى تالقىلاندى.
قازاقستاندىق دەلەگاتسيا باسشىسى 2022 جىلعى 27 قازاندا استاناداعى ورتالىق ازيا مەملەكەتتەرى باسشىلارىنىڭ جانە ەۋروپالىق كەڭەس پرەزيدەنتىنىڭ تاريحي العاشقى كەزدەسۋىنىڭ نەگىزگى قورىتىندىلارىن اتاپ ءوتىپ, جوعارى دەڭگەيدە قول جەتكىزىلگەن ۋاعدالاستىقتاردى ءىس جۇزىندە ىسكە اسىرۋدىڭ ماڭىزدىلىعىنتوقتالدى. ول سونداي-اق الەمدە جانە وڭىردە قارقىندى وزگەرىپ جاتقان احۋال جاعدايىندا ءوزارا مۇددەلەردى ساقتاي وتىرىپ, تاراپتاردىڭ كۇش-جىگەرىن ۇيلەستىرۋدى كۇشەيتۋدىڭ ماڭىزدىلىعىن اتاپ كورسەتتى.
م.تىلەۋبەردى قازاقستاننىڭ عىلىمنىڭ, تەحنولوگيالار مەن يننوۆاتسيالاردىڭ نەگىزگى رولىنە نازار اۋدارا وتىرىپ, جان-جاقتى ىنتىماقتاستىقتى ارتتىرۋعا جانە ەۋروپالىق ارىپتەستەرمەن ءوزارا بايلانىستى جاقسارتۋعا دايىندىعىن اتاپ ءوتتى.
وسىعان بايلانىستى ول ەۋروپالىق تاراپقا جاڭا وڭىرارالىق ءوزارا ءىس-قيمىل باعدارلامالارىن باستاۋ تۋرالى ۇسىنىس جاسادى.
قازاقستاننىڭ باستاماسىن ورتالىق ازيانىڭ بارلىق مەملەكەتتەرىنىڭ وكىلدەرى تولىق قولدادى.
ءسىم باسشىسى سونداي-اق قازاقستاندا شەتەلدىك ينۆەستورلار ءۇشىن جاسالعان قولايلى ينۆەستيتسيالىق احۋال تۋرالى اتاپ ءوتتى, ەلگە 400 ملرد.دوللاردان استام شەتەلدىك ينۆەستيتسيالاردى تارتۋعا ىقپال ەتتى.
كەزدەسۋ قورىتىندىسى بويىنشا بىرلەسكەن مالىمدەمە قابىلداندى.
ايتا كەتسەك, 2023 جىلدىڭ مامىرىندا استانا قالاسىندا ەكىنشى وا-ەو ەكونوميكالىق فورۋمى وتەدى.